Euskal sortzaileei plaza bat emateko asmoz sortu da Sormene, Galdakaon. Datorren astelehenetik domekara, 34 sortzaile inguruk euren lana erakutsiko dute. %80 emakumeak dira.

Gaurtik martitzenera, Durangoko 55. Azoka egingo da. Aurkezpen, solasaldi eta kontzertuak ikusle kopurua mugatuta egingo dira, eta salmenta, sarean. Sortzaileek azokari eutsi izana eskertu dute

Japoniako lorategiak dira protagonista 23. Bosteko egitasmoan. 'Begirada dibergenteak: shakkei ukitu bat' izenpean, Javier Landeras, Laura San Juan eta Mikel Lertxundi artistek 'shakkei' kontzeptuan oinarritutako obrak landu dituzte. Erakusketa Leioan eta Arrigorriagan egongo da ikusgai datozen asteetan.

Euskal Zine Bilera egitasmoa abiatuko da bihar, Lekeition. Osasun larrialdiaren ondorioz, 43. jaialdia 'online' izango da aurtengoan.

Bihartik azaroaren 29ra bitartean, 39. Bilboko Nazioarteko Txotxongilo Jaialdia egingo da hirian eta Bizkaiko hainbat herritan. Euskal Herriko konpainiak dira nagusi egitarauan.

Udagoieneko Osterak Eñaut Elorrietaren, Zea Maysen eta Izaki Gardenak-en kontzertu bana ipiniko du sarean datozen hiru asteburuetan.

Bilboko Dokumentalen eta Film Laburren Nazioarteko jaialdiak 122 film emango ditu, lau sailetan bereizita. Gaur hasi eta ostiralera arte ikusi ahalko dira lanok, aurrez aurre eta sarean. Film guztiek dituzte euskarazko azpidatziak.

John Carpenter, Donald Cammell eta Bong Joon Ho omenduko ditu FANTek. Laburren atalean emango dituzten lanetatik, bi izango dira euskaraz. Filmak 'online' ikusteko aukera emango dute.

'Musika Eskola Irekia' antolatu dute lehenengo aldiz Getxon. Beethovenen musika klasikoa modu didaktikoan eta berritzailean landuko dute jardunaldietan. Diziplina anitzez osatutako ikuskizunak izango dira. Urriaren 21ean egin zuten lehenengo ekitaldia, eta urtarrilera arte iraungo du zikloak.