Peru Azpillaga Diez
Lekeitiotik pantaila guztietara. Bihar bertan abiatzekoa da 43. Euskal Zine Bilera, eta ediziorik “berritzaileena” izango da, antolatzaileen esanetan. Osasun larrialdia “erronka” gisa hartuta, pandemiak sortutako oztopoak gainditzeko helburuarekin, formatu berri bat eman diote jaialdiari. Hala, adierazi dutenez, “inoiz baino errazagoa izango da” Euskal Herrian eta euskaraz egiten den Lekeitioko zinema jaialdiaz gozatzea. Izan ere, programazio guztia online emango du aurten bere web orriaren bidez: www.zinebilera.eus-en.
Era horretan, hasieran traba izan zitekeena publiko zabalago batengana heltzeko abagune gisa baliatu nahi izan dute jaialdiko antolatzaileek: “Egun bizi dugun ezohiko egoera honek gure bizitzako arlo guztietan eragiten du. Errealitate berri hau erronkatzat hartuta, bide berriak irekitzeko aukera mahai gaineratu da, jaialdiaren guneak jendez betetako zinematik atera eta edonork eta edonondik ikusi ahalko den jaialdia proposatuz”.
Azaldu dutenez, proposamen berria 2016an sortutako plan estrategiko berritzailearen hurrengo pausoa da, Lekeition sortutako jaialdiaren zabalkundea lortzeko proiektuaren barruan biltzen dena. “Pantailak nonahi daude: etxean, lanean, kalean eta baita gure poltsikoan ere. Ikus-entzunezkoak eskura izan nahi ditugu, eta, horren jakitun, Euskal Zine Bilerak zinematik pantaila guztietara egin du salto”, zehaztu dute. Jaialdi osoa klik bakar batean izango du ikusleak. Zailtasuna erronka bilakatu nahi izan dutela azaldu du Xabier Arrate jaialdiaren koordinatzaileak: “Kontakturik gabeko jaialdi bat egiten gabiltza, baina pantailen bidez hurbil egoten saiatuko gara”.
Hiru ataleko egitaraua
Norabide berri horretan, hiru atal izango ditu Euskal Zine Bilerak aurten: Euskarazko Zinema Sortuz, Euskararen Zinema Partekatuz eta Euskal Zinemagintzarekin Saretuz. Lehendabiziko atalean, zinemaren esperimentazioarekin eta alfabetzearekin lotutako ekimenak izango dira: hala nola, Euskaltzaleen Topagunearekin batera sortutako Kameratoia izeneko gazteei begirako proiektua, Benito Ansola saria eta Zinegin festibalarekin batera landutako Zoom atalaren aurkezpena.
Era berean, zinemaren arlo ezberdinak partekatzeko xedeaz, Euskararen Zinema Partekatuz atala ere izango da Euskal Zine Bileran. Hor sartzen da film lehiaketa, jaialdiaren funtsa. Aurkeztu dituzten 33 lanen artean hautatuak izan diren hemeretzi film laburrek osatuko dute lehiaketa, eta hainbat egunetan proiektatuko dituzte. Hilaren 28an jakinaraziko dute zein den irabazlea. Gainera, euskal zinemagintzaren sinboloak eta ekimenak omentzeko asmoz sortutako Euskal Zinemaren Begirada saria ere izango da. Aurten, Pascal Gaigne musikari eta konpositoreari emango zaio: “Saritua izan da hainbat lehiaketatan, eta, orain, Lekeition ere bai”.
Azkenik, Euskal Zinemagintzarekin Saretuz atalean, euskal ikus-entzunezkoen sortzaile eta erakundeekin harremanetan jarriko da jaialdia. Horren barruan, (H)emen gaude elkartearekin batera, solasaldi bat antolatuko da emakumezkoek euskal zinemagintzan duten lekuari buruz. Gainera, Pantaila Zuria izeneko gunea ere estreinatuko da, ikus-entzunezko beste jaialdiei eta egitasmoei leiho bat irekitzeko. Hain zuzen ere, aurten Zinegoak izango da atal horretako gonbidatua. Antolatzaileek haien lanaren nondik norakoa azalduko dute, eta Zine Bilerak aukera eskainiko du festibalean proiektatutako hainbat lan berriz ikusteko.
Beste saio batzuk ere antolatu dituzte, Hazparnen (Lapurdi) egiten den Zinegi jaialdiarekin elkarlanean: besteak beste, Zinema Gaualdia eta Urtzi Urkizu BERRIA-ko kazetariak eskainiko duen hitzaldia, zinema eta euskal gatazkari buruz. “Euskara hutsezko jaialdi bakarra gara, eta, beraz, naturala izan da elkarrekin aritzea”, esan du Arratek. Azkenik, Atzo8 egitasmoa ere izango da Zine Bileran: iraganeko irudi eta soinuak biltzea du xede.