Begitu aldizkariak 6.400 ale banatzen ditu hamabostero Arratian eta eskualdetik kanpo dituen harpidedunen artean. Aztikerrek egindako ikerketaren arabera, Arratiako herritarren %70,6k etxean jasotzen dute.
Erlijio Katolikoa ikasgaia aukeratzerakoan
Urtarrilaren 30etik otsailaren 10era ikasleek datorren ikasturterako izena emoteko epea zabaltzen dala-ta, preminazkotzat joten dot eskolako irakaskuntza erlijiosoaren gaur egungo egoereaz hausnarketa egitea. Irakaskuntza erlijiosoa, izatez, zabala eta anitza dala eta kulturak, jakintzak, gaitasunak, giza balioak eta gizarte kezkak buztartzen dituala sinistuta egiten dot.
Familia eta ikasle guztien aukerak errespetatuta, erlijinoko eskola europar legediaren esparru legalaren, espainiar Konstituzinoaren, Hezkuntzarako Lege Organikoaren eta Euskal Eskola Publikoaren Legearen barruan gauzatzeko eskubidea da, eurok bermatzen eta arautzen dabelako dalako eskubide hori.
Erlijinoa irakasgaia eskolako ikasgai lez kokatzeko eta argitzeko lagungarri izan daitekezan kontu batzuk aztertu gura dodaz:
Ba ete dau gaurkotasunik eta etorkizunik erlijinoko eskolak?
Hezkuntza erreferente bezala hartu (esate baterako, Hezkuntzarako Europar Batzordea) eta Europari begiratzen badeutsagu, zera ikusiko dogu: behin eta barriro aitatzen dabela ezinbestekoa dala kultura erlijiosoa geletan. Europar alkarteko herrialde gehienetan egiaztatu daikegu hori, erlijinoa hezkuntza sisteman txertatzen dabelako eta akordioak daukiezalako erlijino sinismen desbardinekin, aukera anitzekin.
Maila zehatzagoan, familia askok eta ikasleek eurek erlijinoa ikasgaia eskatzen dabe eskola publikoan zein kontzertatu ez konfesionalean.
Eskubide hau errespetatu egin behar da eskolan bertan. Ikastetxeak legez derrigortuta dagoz Haur Hezkuntzan, hiru urtekoen geletan, Lehen Hezkuntzan, DBHn eta Batxilergoan —18 urtera arte— erlijinoko eskola eskaintzera. Zoritxarrez, irakaskuntza erlijiosoak era askotako presinoak jasaten ditu leku askotatik, hezkuntza esparru publikotik kanpo iztea edo gurasoei euren seme-alabak ikasgai horretan apuntatzea burutik kentzea helburutzat hartuz, sinisgarriak ez diran argumentuak —askotan ideologiko samarrak— erabiliz eta, batez be, familiei jagoken funtsezko eskubide hau askatasunez betetea galarazoz. Administrazino desbardinek eta ikastetxeek eurek arreta eta ardura jarri behar dabe legaltasuna bete daiten eta, batez be, gure funtsezko ordenamentu juridikoan jasoten danaren arabera, familiek euren uste sendoetan oinarritutako hezkuntza jakin bat aukeratzeko askatasuna gauzatu daien.
Zer eskaintzen deutso erlijinoa ikasgaiak ikasleari eta eskoleari?
Esan daigun, lehenengo eta behin, erlijinoa ikasgaia, abagunea dala, kristinau mezuak eta bere kulturak, beste jakintza eta bidezko aukera batzuekin batera, honeekaz alkarrizketan, eskaintzen daben alderdi pertsonal eta sozialeko hezkuntzaren aldeko aukerea. Eskoleak, laikoa edo konfesionala, publikoa edo kontzertatua izan, jakintza eta balioak, ezagutzak eta gaitasunak buztartu behar ditu, bere baitan onartu behar ditu guztiak, erlijinoen eta euren kulturen munduagazko alkarrizketa eta bizikidetasunean, gaitasun espiritualean hezi behar dau, osoko hezkuntzari begira.
Euren seme-alabak erlijinoa ikasgaian matrikulatzeak daukan garrantzia gogorarazo gurako neuskie kristinau familiei. Benetako hezkuntza, gizakiari errealidade oso-osoa eskaintzea da eta, horregaitik, nahitaezkoa da harek gizakiaren alderdi guztiak bere gain hartzea. Zalantza barik, erlijinoak asko aberasten dau hezkuntza arloa. Erlijinoaren irakaskuntzak berezkoa dauan alderdian hezten dau umea eta gaztea, gizakia ez dalako arrazionala eta soziala bakarrik, alderdi erlijiosoa eta transzendentea be osagaitzat ditualako. Hezkuntza erlijiosoak gure bizitzako eta gure izatearen azken zentzunari buruzko galderarik sakonenei erantzuten laguntzen dau: nondik nator, ze zentzun dauka nire bizitzak, zer itxaron daiket, zer da maitatzea, zergaitik parkatu behar dot, ze zentzun dauka gaixotasunak, zer esan gura dau heriotzak, zelan egin gizarte zuzen eta solidarioa, egian eta guztion ongizatean sustraitutako gizartea, giza bihotzaren guraririk sakonenekin bat datorren gizartea. Gure bizitzari zeru-muga barria dakartsan Nazaretheko Jesusegaz bat egitean eta Bera ezagutzean aurkituko doguz galdera honeei erantzuteko funtsezko giltzak.
Gainera, irakaskuntza erlijiosoak ikaragarri eragiten dau hazkunde pertsonala, eta egian eta onbidean, alkarrenganako errespetu eta tolerantzian, maitasun eta parkamenean, alkartasun eta doakotasunean, zuzentasun eta bakean, erruki eta gupidan, behartsuenenganako laguntasunean eta makalen babes eta tutoretzan sustraitutako gizarte eta munduaren eraikuntzan erabagigarria da. Ekarpen guztiz positiboa dau oinaze eta bidebakokeriak sortzen dituan eukite, menperatze eta aginterako grinan hainbestetan jausten dan mundu hau gizatasunez beteteko.
Era berean, kristinau sustrai sakonak dituan gure kultura baloratzen laguntzen deusku eta, maila pertsonalean zein sozialean, gure izatasuna itxuratu dauan eta kristinautasunaren erreferentzia barik erraz ulertu ezin daiteken gure zibilizazinoaren zutabeetako bat izan dan legaduan parte izaten.
Beraz, arrazoi honeek eta beste batzuek bideratuta eta suspertuta, guraso kristinauek Erlijinoa ikasgaian matrikulatu behar dabez euren seme-alabak.
Lokarria eztula lotzeko
Abadiño
Abadiñok harrera egingo dio gaur urteko jai nagusiari. San Blas eguna ospatuko dute bertan, Euskal Herri osoan ezagun bihurtu den azokarekin. Eztarriko gaitzak uxatzeko bedeinkatutako lokarri eta erroskillaz haratagoko jaialdi bihurtu da, dagoeneko, gaurko ospakizuna. Edozelan ere, horiek ere tartea izango dute.
Ganadua, baserrirako tresnak, burdineria, ortuariak, fruituak, gazta, txakolina, ogia, eztia, artisautza eta landareak aurkituko ditu gaur Abadiñoko azokara biltzen denak. XX. abelburu erakusketa ere izango da.
09:00etan, Txanbolin taldeak alaitutako kalejirak girotuko du herria. Umeek euren txokoa izango dute Txanporta kultur etxeko arkupean, eurentzako tailerrak antolatu dituzte-eta bertan.
12:00etan, bertsolarien txanda iritsiko da. Xabier Amuriza, Garikoitz Sarriugarte eta Eñaut Uruburu ariko dira bertsotan Gogaikarri bertso eskolako ikasleekaz batera, Ferialeku plazan.
Probalekuan herri kirolak izango dituzte 12:30ean, eta, gero, nekazaritza produktuen sari banaketa egingo dute. Eguneko ospakizunei bukaera emateko, Lotxo taldearen erromeria izango da Ferialeku plazan.
Dena dela, idi probek ere lekua izango dute San Blas egunean, eta baita datozen egunetan ere. Gaur, 17:00etan eta 22:00etan egingo dituzte. Bihar ere, ordu beretan izango dira, eta domekan, berriz, 18:00etan. Hurrengo astean ere egongo dira.
San Blas txiki
Etxeko txikienak izango dira bihar Abadiñoko protagonistak, San Blas txiki egunean. 11:00etan eskola arteko krosa jokatuko dute Traña-Matiena auzoan. Bidezabal atletismo taldeak antolatutako txapelketa da hori. Kirolarekin jarraitzeko, 14:30ean, V. Eskola Igeriketa liga izango da udal igerilekuetan.
18:00etan, Tor magoaren magia erakustaldia izango da kultur etxean. Gero, txokolate jana prestatuko du Txirikilla aisialdi taldeak.
Egunari bukaera emateko txosnetan rock jaialdia antolatu dute. Hiru talderen musika zuzenean entzuteko aukera izango da 23:00etatik aurrera: Kruders, Arkada Social eta Itziarren semeak.
‘Aikor’ aldizkariak argitaratzen duen ale kopurua.
Aikor aldizkariak 7.000 ale inguru argitaratzen ditu hilero. Aztikerrek egindako ikerketaren arabera, Txorierriko euskaldunen artean %78k irakurtzen dute, eta erdaldunen %16k begiratu bat ematen diote.
Otxarkoagaren historia gogoan
1950eko hamarkadan Otxarkoagaren sorrera zelakoa izan zen ikusteko Bilbo berriaren hastapena, Otxarkoaga erakusketa zabaldu dute Begoñako udaltegian. Auzo horren iragana eta historia berreskuratzea helburu duen erakusketa gisa aurkeztu du Expodistritok, Bilboko Udaleko Kultura eta Hezkuntza Sailak antolatzen duen aldi baterako erakusketa zikloak. Aurten 50. urteurrena betetzen duen Otxarkoagako Familien Elkartearen laguntzarekin antolatu dute .
1950eko hamarkadan auzoa sortzeko beharra eragin zuen egoera ekonomiko eta soziala ez ahaztea du helburu erakusketa honek. Izan ere, Bilbok 290.000 biztanle zituen 1959an, antolatzaileek gogorarazi dutenez. Pertsona horien erdiak 1950eko hamarkada horretan iritsi berriak ziren. "125.000 inguru beste batzuen etxeetan bizi ziren, eta 40.000 etxe klandestinoetan, ezinezkoa zitzaielako etxe duin bat eskuratzea", azaldu du Bilboko Udaleko Kultura Saileko komunikazio arduradun Irma Cerrok.
Garai horretan industrializazioak eskulan falta zuen, eta nekazaritza eremu batzuetako eta besteetako biztanleak hasi ziren lan horretan. Milaka pertsona joan ziren, beraz, Bilbora eta etxebizitza eskari handia sortu zen. Garai hartako agintari frankistak eskari hari erantzun egokia emateko gai ez zirela izan gogorarazi du Bilboko Udalak.
Hain zuzen, sortutako gizarte, ekonomia eta hirigintza arazo larriari aurre egiteko asmoz, etxebizitza multzo bat eraikitzea erabaki zuten. Begoñako lurrak aukeratu zituzten horretarako. "Ingurua eguzkitsua zelako, babestuta zegoelako eta Etxebarriko, Basauriko eta Galdakaoko industrialdeetatik hurbil zegoelako", aditzera eman du Cerrok.
Jose Luis Arrese Etxebizitza ministroak proposatuta, 1958an Bilbon 4.000 etxebizitza eraikitzeko agindua jaso zuten. Halaber, 1959an onartu zuten Bizkaiko gizarte premiarako planari buruzko dekretua, eta bost urtean 50.000 etxebizitza eraikitzea aurreikusten zuen: Otxarkoagan eraikiko zituzten 3.672 etxebizitzaz eta Uretamendiko beste 400 etxebizitzaz gain.
Erakusketaren osagaiak
20 panelek, auzoko biztanleek utzitako materialak, garai hartako egunkari zatiek eta Espainiako Etxebizitza Ministerioak etxebizitza multzo horretarako prestatutako arkitektura proiektuen agiri ofizialek osatzen dute erakusketa. Otsailaren 15era arte egongo da Begoñan. Hilaren 16tik 29ra, Castañoseko udaltegian izango da bisitatzeko aukera.
Performancea, Miarritzeko balletaren eskutik
Gaspar Claus biolontxelo jotzaile eta konpositoreak, Gael Domenger dantzari eta koreografoak, Aymeric Reumaux multimedia artistak eta Jean-Claude Asquie argiztapen sortzaileak bat egingo dute gaur eta bihar Fundicion aretoan. Un coup de des jamais n'abolira le hasard ikuskizuna taularatuko dute.
Miarritzeko Malandain balletak egin ohi dituen tailer koreografikoetako bat eramango dute Bilboko aretora. Bertatik jakinarazi dutenez, performancearen antzeko emanaldi bat izango da, bitxia. "Ezin daiteke azaldu, era horretakoak ikusi egin behar dira", adierazi dute. "Elementu askok hartuko dute parte ikuskizunean".
XIII. Dantzaldiaren barruan antolatutako ikuskizuna da gaur eta bihar 20:00etan hasita emango dutena. Egitarau zabala prestatu dute, dena den, hiriko hainbat gunetan otsail eta martxo bitartean.
Hamar ikuskizun
Domekan, esaterako, Euskalduna jauregian Algerien ballet nazionalak —Frantziako eta Aljeriako kideak ditu — Nya (Chants eta Le Bolero) emanaldia eskainiko du. Matxoaren 29ra bitartean hamar ikuskizun izango dira.