Bizkaian filmatzen diren ikus-entzunezkoen kopurua pandemia aurreko datuetara itzuli da: 2020ko beheraldiaren ostean, iaz 161 lan grabatu ziren lurraldean, 2019an baino bederatzi gehiago, Bilbao Bizkaia Film Commissionen arabera. Kudeatutako ekoizpenen kopuruak ere joera positiboa darama.
Azarotik, Euskal Abertzaletasunaren Museoak Bilboko Sabin Etxean du egoitza. Lehen Aberri eguna, ikurrinaren sorrera, Emakume Abertzale Batzaren historia eta beste ezagut daitezke.
Santurtzik itsasoarekin arlo guztietan duen eta historikoki izan duen lotura erakusten du bertako Itsasoa museoak. 1600. urtetik gaur egunera arte herrian izan duten bizimodua islatzen du.
Bilboko XXI. Musika-Musica jaialdia egingo dute gaur hasi eta etzi arte. Naturan oinarritutako lanak biltzen ditu egitarauak, Errenazimentutik gaur egunera bitartekoak. 1.300 musikari ariko dira guztira.
Zinegoak Bilboko LGTBI zinema jaialdiaren XIX. aldia egingo dute astelehenetik martxoaren 7ra. Gero, beste 47 udalerritara hedatuko da.
Misiolariek XIX eta XX. mendeetan bildutako fosil, mineral eta animaliekin sortu zen Loiuko Andres Urdaneta Natur Historiaren Museoa. Besteak beste, kaxalote baten hezurdura dute ikusgai.
Bilboko Fundicion aretoak magia jaialdi bat egingo du, gaurtik etzi arte: 'Ilusionismo'. Saioak formatu txikikoak eta parte hartzaileak izango dira.
Gorbeiak erabateko eragina du Orozko eta orozkoarren nortasunean eta ondarean. Udalerrian bertatik bertara ikus daitekeen horren bilduma dute museo etnografikoan.
Itsasne Zubiri artista bilbotarrak naturan oinarritutako koadro bilduma bat jarri du ikusgai Zornotzako Zelaieta zentroan: 'Natura, kolorea eta mugimendua'. Otsailaren 25era arte bisitatu ahal izango da.
Balmasedako Historiaren Museoak hiribildua erakutsiko dio bisitariari; artxibo historikoak, kultur jarduerak, bitxikeriak eta hango pertsonaia ospetsuak ikusi ahalko dira.