Bizkaia

“Aurrekontu sozialena”

EAJk eta PPk lortutako akordioari esker, Bizkaiko Foru Aldundiak ez du arazorik izango bere aurrekontu proiektua onartzeko. Joan den asteko osoko bilkuran, PSE-EEk eta Bilduk aurkeztutako osoko zuzenketak ez ziren onartu, EAJk aurka bozkatu zuelako eta PP abstenitu egin zelako. Asteon zuzenketa partzialak eztabaidatzen hasi dira. Hurrengo urratsa Gernika-Lumoko batzar etxean egingo den osoko bilkuran proiektua behin betiko onartzea izango da. PPk aurreratu du bozketa horretan abstenitu egingo dela, euren proposamenak aintzat hartu diren arren ez delako euren proiektua. Beraz, 22 aldeko boz —EAJ— eta 21 aurkako —Bildu eta PSE-EE— jasoko ditu.

Bai Lorea Bilbao bozeramaile jeltzalea bai Esther Martinez bozeramaile popularra "oso pozik" eta "harro" agertu dira, "ezberdinen arteko akordioa" erdietsi dutelako. "Alderdikerien gainetik, Bizkaiaren eta bizkaitarren interesak jarri ditugu", azaldu dute biek. Martinezek, gainera, "aurrekontu egokitua Bizkaiko historiako sozialena" dela uste du.

Akordio horren bidez, 5.550.000 euroko aldaketa egingo zaio foru aldundiak aurkeztutako proiektuari. Jose Maria Iruarrizaga foru aldundiko Ogasun diputatuak azaldu duenez, diru sarreretan ez da igoerarik egon; beraz, adostutako gastu berriak asetzeko beste diru sorta batzuetatik hartu behar izan dute. Horietatik ia 3 milioi ordainketa osagarrietako mailegutik hartuko dira; hau da, badaezpada ezustekoetarako gordea izaten den dirutik. Bozeramaile popularraren esanetan, "ez zen beharrezkoa hainbeste diru gordetzea, hainbeste premia daudenean".

Lehendakaritza Sailaren aurrekontuan suhiltzaileen parke bat eraikitzeko lursaila erosteko diru kopuru bat ageri zen. Hori ere PPrekin adostutako aldaketetara bideratuko da. "Ez zegoen erabakita non eta noiz erosiko zen lursaila", azaldu du Martinezek. Bestelako diru sorta txikiago batzuetatik ere hartu da dirua, baina Iruarrizaga diputatuak ez du zehaztu zeintzuetatik.

Bi alderdiek ukatu egin dute Bizkaiko negoziazioa Araba eta Gasteizko aurrekontuen inguruan egin denari lotuta egon dela. "Erabateko askatasunez jokatu dugu, loturarik gabe. Gure lehentasuna krisiari aurre egin eta bizkaitarren premiei erantzutea izan da. Gainera, Arabako aurrekontuan onartu ez ziren egunaren biharamunean aurkeztu genituen zuzenketa partzialak. Bizkaiko aurrekontua baldintzatu gura izan bagenu, osoko zuzenketa aurkeztuko genukeen, baina ez genuen egin", dio Martinezek.

Negoziazioak, "zabalik"

Bozeramaile jeltzalearen esanetan, alderdi guztiekin ahalegindu dira, baina PPrekin baino ez dute lortu. "Bilduk hasieratik zarratu zituen aukera guztiak, eta talde sozialistarekin ez da posible izan". Gainera, ohartarazi du ez dela aliantza bat: "Aurrekontua onartzeko akordioa da, eta onartzean bukatuko da". Hala, zerga politika berrirako negoziazioak alderdi guztiekin egiteko asmoa iragarri du. "Dena den, oraindik foru aldundiak ez du proiekturik aurkeztu; beraz, ezin da ezer negoziatu".

Makila kolpeen erritmoan

Abarkak oinetan jantzi, makila eskuetan hartu, eta Arratiako abesbatzako kideek kantuan igaroko dute datorren astelehena. Euskal Herriko beste hainbat herritan legez, santa eskean ibiliko dira. Baina ez euren eskualdean soilik, baita Zornotzan eta Bilboko kaleetan ere. Bizkaiko talderik ezagunena da.

Aurten, 62. urtea dute. Areatza eta Arteagako abeslariak elkartzean sortu zen taldea, Jabi Arbe kideak gogora ekarri duenez. "Premia jakin bati erantzuteko hasi ziren: lehen urteetan, Bilboko Santa Marina ospitalerako biltzen zuten dirua". Gerora, beharrizanak zeharo aldatu dira, eta, aldian-aldian, helburu ezberdin baterako eskatu izan dute dirua. Azken urteetan, Mundubat gobernuz kanpoko erakundeari eman izan diote, Aljerian dagoen sahararren kanpamentu batean duen proiektua finantzatzeko laguntza modura. Aurten, ordea, bildutakoa etxean uztea erabaki dute: "Bizkaian berton ere badira beharrizana dutenak", dio Arbek.

Herritarrak eskuzabalak direla iruditzen zaio. "Ahal duten neurrian ematen dute, eta, gaur egungo egoeran, askorik ere ezin diegu eskatu. Igartzen da krisian gaudela. Lehen baino askoz gutxiago biltzen dugu. Leku gehiagotan ibiltzen gara eskean, baina, hala ere, nekez biltzen dugu lehen beste diru". Kexatu da banketxeetan espero zitekeen baino gutxiago ematen dietelako. "Esaten digute talde asko joaten garela, eta denen artean banatu behar dutela daukatena". Udalekin, ordea, pozik daude.

Beti-betiko koplak abesten dituzte. "Aita Jose Domingo Ugartetxea karmeldarrak prestatu zizkigunak dira, Santa Agatari eskainiak. Bost ahotsek abesteko konposatu zituen". Dagoeneko buruz dakizkiten arren, aurreko asteetan gogotik entseatzen dute. Arberi, hala ere, iruditzen zaio gehiago egin beharko luketela. Azaroan hasten dira, eta Santa Ageda bezpera iritsi arte, ahal badute behintzat, zapaturo elkartzen dira. 17:00etan izaten dute ordua. "Gurea abesbatza berezia da. Urtero, hiru hilabeteko bizitza izaten du, eta, gero, desagertu egiten da", dio. Nahiz eta hasieran Areatza eta Arteagako lagun haiek sortu zuten, egun Arratiako herri guztietako kideak dituzte taldean. Osotara, 45 bat lagun ibiltzen dira kantuan, eta beste hamar bat dirua biltzen.

Gazterik ez zaie biltzen. "Ez dira animatzen. Oro har, hori da abesbatza guztien arazoa", dio Arbek. Horregatik, Santa Ageda bezpera goizean eskola umeekin abesten dute eskualdean, eta gauean ere, jai berezia egiten dute Arratiako Musika Eskolako ikasleekin batera. "Kanturako eta santa eskerako harra sartzea gura genuke, gero gurekin abesteko".

Hiriburura, diru bila

Duela 30 bat urte hasi ziren Bizkaiko hiriburura ere joaten. "Bilboko udaletxean eta foru jauregian abestu behar genuela azaldu zen, diru gehiago biltzeko. Geroztik, ez dugu behin ere hutsik egin". Eskualdetik kanpora egiten duten irteera bakarra da. Behin, Gernika-Lumora joan ziren, eta beste behin, Durangora. Baina, normalean, Arratia eta Bilbo dira haien plaza.

Urtero, ibilbide berbera egiten dute, bi autobusetan. Hala, entzun gura dituenak badaki nora jo. Eguna Areatzan hasiko dute. 08:30ean, meza entzungo dute Santa Isabel komentuan. Elizatik irtetean, eskolako umeekin abestuko dute. Handik Dimara joango dira, 09:30ean hango eskolako umeekin santa eskean egiteko. Beste horrenbeste egingo dute Lemoan. 10:30ean, Zornotzako udaletxean bilduko dira. Kantatu ostean, hamarretakoa egiten dute, indarberritzeko.

Handik Bilbora joango dira, Begoñako basilikara, 11:00etako meza bukaeran kantatzeko. Segidan, behera jaitsiko dira, San Anton eliza atarira. Erriberako merkatuan eta Plaza Barrian kantatu ondoren, udaletxera joango dira. 12:45ean, Iñaki Azkuna alkatea izango dute zain. Horren ostean, Kale Nagusira joango dira: El Corte Inglesen, BBVAn, Kutxabanken eta beste hainbat banketxetan kantatuko dute, 13:45ean foru jauregian bukatzeko. Jose Luis Bilbao ahaldun nagusiak egingo die harrera.

Eguerdian, Igorreko ostatuan bazkalduko dute: "Indabak, urtero bezala". 17:00etarako itzuliko dira Bilbora, Guggenheimen abestera. Handik, San Nikolas eliza aurrera joango dira; Bilboko metroaren Zazpikaleetako geltokian ere abestuko dute. 18:00etan, Santiago katedralean dute ordua. "19:30ean izango dugu agurra, Arriaga aurrean, Arratiara itzuli aurretik". Bedian, musika eskolako umeak izango dituzte zain. Igorre, Arantzazu, Arteaga eta Zeanurin gelditu ostean, Areatzan kantatuko dute bukatzeko (21:30). "Jai polit bat izaten dugu, eta txokolatea banatzen dugu entzutera etortzen direnen artean".

Loiuko Udalak 58 baratze ekologiko eskainiko dizkie herritarrei

Loiuko Udalak bere orube batean 58 baratze sortuko ditu herritarrek nekazaritza ekologikoa landu dezaten; hau da, ortu horietan aritzeko baldintza bakarra produktu kimikoak ez erabiltzea izango da.

Bizente Arteagoitia Loiuko alkateak jakinarazi duenez, obrak 2013ko lehenengo hiruhilekoan hasiko dira. Udal teknikariek bi urte daramatzate lanean egitasmoa aurrera atera dadin. Proiektuak bi fase izango ditu, eta lehenengoak 100.000 euroko kostua eragingo dio udalari. Oraingoz, 50 herritarrek baino gehiagok eman dute izena. Laborantza esparru hauetako bat lortzeko, ostera, "prezio sinboliko" bat ordaindu beharko da: urteko 100 euro, gutxi gorabehera.

Udalak azaldu duenez, udaletxearen inguruetan balio ekologiko handia duten eta erabiltzen ez diren lur sail publikoak daude. Lur eremu hori Elizondon dago, eta Errotatxuko bideak zeharkatzen du. Orotara, 15.000 metro koadro ditu; baina laborantzarako esparrua 6.000 metro koadrokoa izango da. Hala, erabiltzaile bakoitzak 58 metro koadro izango ditu erabilgarri. Horrez gain, ureztatzeko ur harguneak ezarriko dira, eta Loiuko lorategietatik ateratako material organikoak konpost moduan erabiltzeko aukera izango dute.

Urduñak ere emango ditu

Urduñako Udalak ere lursailak banatuko ditu. Helburua lehenengo sektoreko jarduera ekonomikoa sustatzea da. Horretarako, udalbatzak, herritarrei lur sail publikoak eman ahal izateko, udal arautegi berria idatziko du.

Lurrak lagatzeko epea abenduaren 31n bukatu zen; baina, testu berria onartu bitartean, eskaera epea luzatu egin dute. Interesa dutenek lurra zertarako erabili nahi duten azaldu behar diote udalari; autokontsumorako den edo jarduera ekonomikoren baterako erabiliko den zehaztu beharko dute. Udalak azaldu duenez, langabeziari aurre egiteko asmoz, enpresa proiektuek eta ortuetatik lortutako produktuak merkaturatzeko xedeek izango dute lehentasuna.

Elkartasun gala, Bizkaiko Elikagaien Bankuarentzat

Gizentasunaren aurkako kanpainaren amaieran, abenduaren 17an, sustatzaileek gala bat antolatuko dute Bilboko Euskalduna jauregian, Bizkaiko Elikagai Bankuarentzat dirua biltzeko xedearekin. Egun, oinarrizko elikadura ordaindu ezin duten 28.000 pertson...

“Umeekin jokoak erabili behar dira zer gertatzen zaien jakiteko”

Basurtuko Ospitaleko Psikiatria Zerbitzuko buruak, Miguel Angel Gonzalez Torresek (Bilbo, 1957), esperientzia handia dauka bere jardunbidean. 1986an hasi zen Basurtun lanean, eta, orain, adingabeentzako Osasun Mental eta Entzumen Urritasuneko Unitatean dabil beharrean; Araba, Bizkai eta Gipuzkoan martxan jarri den lehenengoa da. Komunikazio zuzena eta eraginkorra landu nahi dute, umeek eta nerabeek ahalik eta arreta onena jaso dezaten. Medikuen eta gaixoen arteko komunikazioan bitartekari lanak egitea izango da euren zeregina. Oraingoz, Bizkaian emango du zerbitzu unitateak.

Zergatik abiatu da unitate hau Basurtun?

Nik uste dut bi arrazoi daudela. Batetik, Bizkaian, Basurtuko Ospitalea umeen eta nerabeen erreferentziazko ospitaleratze unitatea da. Gainera, aspaldiko kontsulta anbulatorioa daukagu. Umeen eta nerabeen tratamenduan talde garrantzitsua garenez, zentzua dauka hemen sortzeak. Bestetik, pertsona gorren mundua eta keinu hizkuntza oso ondo ezagutzen duten bi lankide elkartu dira batera lanean. Hortaz, ospitaleko zuzendaritzak erraztasunak eman zizkigun, eta lanari ekin genion.

Zeintzuk izan dira proiektua martxan jartzeko erabili dituzuen baliabideak?

Baliabide berriak ekarri barik atera dugu proiektua. Hau da, genituen baliabideak erabili ditugu, eta horrek prozesua erraztu du gaur egungo egoera kontuan izanda. Ospitale honetan talde handia dugu, eta, ondorioz, gauza berriei ekiteko aukera ematen du; haur talde osoa tartean dago.

Entzumenari lotutako urritasunak goiz hautematen dira; batez ere, eskolan.

Adin goiztiarrean, pediatrek probak egiten dituzte entzumen arazoak antzemateko. Oso larriak ez baldin badira, umea eskolan hasiko da arazo horiek agertzen; adibidez, idazterakoan edo entzuterakoan ikusiko dira dituen oztopoak.

Zer desberdintasun dago nerabeen eta umeen tratamenduen artean?

Psikiatria oso eremu espezializatua da. Patologiak eta gaixoengana hurbiltzeko moduak oso desberdinak dira. Umeek ez dute helduek duten komunikatzeko gaitasun bera; beraz, psikologoak askotariko moduak erabili behar ditu umearengana heltzeko. Helduei galderak egiten zaizkie informazioa lortzeko, baina umeekin jokoak erabili behar dira zer gertatzen zaien jakiteko.

Entzumen arazoak dituzten umeek arreta berezia behar dute, eta, maiz, profesional falta sumatu ohi da.

Halaxe da. Osasun mentaleko miatze lanabesa hizkuntza da. Fisikoki, ez dugu ia ezer egiten; batez ere, hitz egitean datza kontua, eta interpretatzaileak behar ditugu komunikazioa egon dadin. Gauza bera gertatuko litzateke gure hizkuntza ez darabilen atzerriko pertsona batekin hitz egingo bagenu. Entzumen arazoak dituen ume batekin lan egitean, ezin da ñabardurarik galdu. Horrez gain, kasu askotan, interpretea umearen familiako kide bat da, eta horrek objektibotasuna galtzea dakar. Afektuagatik, maiz, senideak ez du dena behar bezala kontatzen, nahiz eta munduko afekturik handienarekin egin. Umeak berak ere gai batzuei buruz hitz egitea saihestu dezake interpretea bere ama edo aita delako. Nahiz eta horrela lan egin daitekeen, hobe da komunikazioa zuzena izatea, psikologo edo psikiatrarengandik umearengana.

Jarduera honen bidez, zein aurrerapauso lortzen dira?

Alde batetik, ebaluazio sakonago bat. Miaketa hobeagoa bada, arazoaren ebaluaketa zehatzagoa da. Uste dugu beste zentroetako osasun taldeak laguntzea izango dela geure egitekoetako bat. Guk xehetasunetan sakontzen lagunduko diegu ahalik eta ebaluazio osotuena lortzeko. Beste alde batetik, paziente batzuei guk egingo diegu jarraipen osoa. Tratamendu farmakologikoa eta psikoterapeutikoa geure esku egongo litzateke. Entzumen urritasunak dituen ume batekin komunikatu ezin bazara, tratamendu psikoterapeutikoa ezinezkoa da.

Zertan oinarritzen dira bi jarraipen horiek?

Jarraipen farmakologikoa diagnostikoaren araberakoa da: arreta desoreka, elikatze jokaeraren desoreka, ezaugarri depresiboak... Hala ere, umeekin medikamentu gutxiago erabiltzen dira; baina, behar direnean, horrek efektuen edo albo ondorioen segimendu bat behar du. Ume gorrentzako psikoterapia gutxiegi erabiltzen da profesionalen faltagatik. Psikoterapia elkarrizketan oinarritzen da; hizketa hori egiten ez baldin bada, ezin da jarraitu. Horrexegatik, keinu hizkuntza bikain erabiltzen duten gure bi lankideek badakite psikoterapia ondo egiten.

Kasuek ez dute zertan gora egin. Kalitatea kantitatearen aurrean.

Geure ekarpena ez da bolumenean oinarrituko. Lehenik eta behin, esan behar da entzumen urritasunak dituzten umeak jada zainduta daudela. Guk balio erantsi bat gehitu nahi dugu arretak kalitate handiagoa izan dezan. Hortaz, uste dugu umeen kopurua txikia izango dela, baina jasoko duten arreta garrantzitsua izango da eurentzat.

Zer izan behar da profesional on bat izateko?

Hasteko, ikasketa klinikoak izan behar dira. Horrez gain, keinu hizkuntza menderatu eta gorren mundua ezagutu behar da. Entzumen urritasuna duten pertsonen eguneroko oztopoak ezagutu behar dira gertutik.

Kaleko dantzen lehia

Dantza lehiaketa

Elorrio

Hiriko dantza eskaintzaren erakusleku eta lehiaketa gune bihurtuko da bihar Elorrio. Hain zuzen, Arriola izango da ikuskizun horren agertoki. Bertan, Akadantz kaleko dantzen bosgarren lehiaketa egingo dute. 18:00etatik aurrera jarriko dute martxan.

Bilboko Breakonstage jaialdian —Europan oso garrantzitsua da— parte hartzeko ateak zabaltzeko aukera izango dute biharko lehiaketara aurkezten direnek. Izan ere, Elorrion irabazle ateratzen direnek jaialdi horretan parte hartu ahal izango dute.

Era askotako diziplinatan lan handia egin duten gazteak igoko dira Arriolako agertokira: funky, house, urban dance, hip hop, breakdance, locking, popping... Gazteek eta zaleen mailako dantzariek oholtza gainean egiten dituzten erakustaldiak ikusteko aukera izango dute bertaratzen diren guztiek.

Lehiaketa eta erakustaldi izango den ikuskizun hori hiriko dantzarekiko zaletasuna duten gazte askorentzako topalekua izan ohi dela jakinarazi dute antolatzaileek, kontuan hartuta dantza horren diziplinak entsegu ordu asko eskatzen dituela, akademietan zein lagun artean. Arriola antzokiko kideek jakinarazi dutenez, jaialdiaren helburu nagusia "taldeak lan egiten segitzera bultzatzea eta animatzea da; horrexegatik, Arriola antzokiak euren lanak antzokiaren moduko inguru eszeniko batean erakusteko aukera ematen die".

Lehiaketan hainbat alor izango ditu kontuan epaimahaiak. Hain zuzen ere, "originaltasuna, sormena eta koreografiak egiteko trebezia" aztertuko dituzte, batetik. Bestetik, musika sinkronia izango dute kontuan. Horrez gain, lehiakideek zer-nolako talde lana eratzen duten sarituko dute —bi eta sei gazte arteko taldeak lehia daitezke—. Azkenik, ezarritako iraupena betetzea ere kontuan izango dute —gutxi gorabehera, hiru minutuko erakustaldiak egin behar ditu talde bakoitzak—.

Gazteen sormena du oinarri Akadantz lehiaketak, eta Elorrioko Udalaren eta Bizkaiko Foru Aldundiaren laguntzarekin antolatzen du Arriola antzokiak.

“Emozio eta sentipen denak biltzen ditu flamenkoak”

Urduri bezain gogotsu zegoen Adriana Bilbao Zarraonaindia (Bilbo, 1987) Bilborock aretoan El cuarto escalón aurkeztu aurretik. Izan ere, etxean, familia eta lagunen aurrean egin du bere azken lanaren estreinaldia.

Sevillan bizi da, baina, aurretik, Malagan hasi zuen dantzari profesional gisa bere ibilbidea. Amari zor dio flamenkozale izatea; aitonari Athleticen zale izatea. Telmo Zarraonandia Zarra jokalari mitikoaren biloba da.

Zer esan nahi du zuretzat sorterrian estreinaldia egiteak?

Gauza handia da, ilusio handia egiten dit. Urduri nago, normala den moduan. Erantzukizuna ere handiagoa dela sentitzen dut hemen. Gainera, inguruko batzuek dantzan ikusten nauten lehen aldia ere bada.

Zer da El cuarto escalón?

Kantua, dantza eta jotzea elkartzen dituen ikuskizuna da. Flamenko tradizionala da, hutsa, fusiorik gabea. Bakoitzak bere ukitua, nortasuna ematen dio, eta ez du istorio zehatz bat. Iaz sortu genuen, eta promozio bideo bat ere egin genuen, baina estreinaldi ofiziala Bilbokoa da.

Nondik datorkizu flamenkorako zaletasuna ?

Amarengandik. Hura izan zen umetan sevillanak eta flamenkoa ikastera animatu ninduena. Hasi nintzenean, 9 edo 10 urte nituen, eta ordutik ez naiz gelditu. Ama ere txikitan ibili zen; gero, utzi egin behar izan zuen. Asko gustatzen zaio flamenkoa.

17 urterekin, Bilbo utzi, eta Andaluziara alde egin zenuen. Gogorra izan al zen erabakia hartzea?

Nik argi neukan dantza egin gura nuela eta unibertsitatean ere zerbait ikasi nahi nuela. Ez nekien zer, baina argi neukan unibertsitatera joango nintzela. Familiakoek beti lagundu naute, eta ondo hartu zuten; nire erabakiak ez zituen ezustean harrapatu.

Dantza ikasketak Informazio Zientzien unibertsitate ikasketekin uztartu zenituen.

Bai, halaxe da. Malagako Unibertsitatean egin nuen lau urteko lizentziatura, eta, tarte horretan, Susana Lupiañez Lupi-k erakutsi zizkidan dantzak. Malagan lau urtez egon ostean, Sevillara joan nintzen, eta bertan bizi naiz egun. Sevillan, hainbat eskolatan egon naiz ikasten, Alicia Marquezen gisako profesionalekin, esaterako. Bestalde, iaz Madrilen Arte Eszenikoen masterra egin nuen Juan Carlos Erregea Unibertsitatean.

Flamenkoa ezagutzen ez dutenei zelan azalduko zenieke zer den?

Istorio baten isla da; dantzatzean, kantatzean eta jotzean sentitzen dena. Flamenkoaren hitzek, melodiek betetzen naute, eta horregatik nabil honetan. Sorgindu nauen kultura bat da. Arrazadun artea da, lurrekoa... Asko betetzen nauen zerbait da, euskal kulturak legez. Emozio eta sentipen denak biltzen ditu flamenkoak. Eta dena ez da pena eta mina; jai izaera ere badu. Askok uste dute dena negarra dela, eta ez da horrela. Langile klaseak sortu zuen flamenkoa; nekazariek, meatzariek... Landan, kaleetan eta auzoetan abesten zutenen ondorio da. Askok ez zekiten irakurtzen eta idazten; dena horrela adierazten zuten, kantuz. Hortaz, ahozko transmisioa eta herri nortasuna ditu oinarri flamenkoak.

Sevillan bizi zara orain; aurretik, Malagan egin zenituen lau urte. Handik kanpo dantzatu al zara sekula?

Andaluziako herrietan dantzatu naiz, batik bat; Malaga, Sevilla eta Cadiz aldean. Baina, Madrilen masterra egin nuenez, tablao-etan ibili nintzen. Han, jendea ezagutu eta hainbat artistarekin harremanetan jartzeko aukera izan nuen. Euskal Herrian, Iruñean egon nintzen behin tablao batean. Iaz, esaterako, Europako iparraldean egon ginen, Andaluziako ordezkari gisa, turismoa sustatzeko. 2011ko udan, Italiako Santa Fiora nazioarteko musika jaialdira joan nintzen, eta, azaroan, Kazakhstanen dantzatu nintzen, gala pribatu batzuetan.

Hortaz, denetariko publikoa ezagutzen duzu. Ba al dago alderik?

Bai, aldea badago. Kazakhstanen, esaterako, kontu alaiak eskatzen zizkiguten: buleriak, runbak eta tangoak. Hala ere, topikoak eta estereotipoak leku guztietan dituzte. Askok telebista gaineko soineko motaduna duen panpinarekin lotzen dute flamenkoa. Frankismoak kalte handia egin zion flamenkoari. Flamenkoa sevillanak baino askoz gehiago da; haratago doa, sakonagoa, zabalagoa da... Horregatik, beti saiatzen gara estereotipoak apurtzen.

Azken urteotan, ikasten ez ezik erakusten ere bazabiltza. Zelan moldatzen zara irakasle lanetan?

Ondo, atsegin dut eskolak ematea. Flamenkoan hasiberria naizela esan daiteke, baina ahal dudana eta ikasi dudana erakusten dut. Lupik ondo eta asko erakutsi zidan, eta berdin egiten saiatzen naiz. Eskola batzuetan, pausoak bakarrik erakusten dituzte, zergatia azaldu barik; nondik datorren esan gabe. Bestalde, kantua ere oso garrantzitsua dela uste dut. Beraz, informazio teorikoa, teknikoa eta praktikoa ematen diet nire ikasleei.

Etorkizunera begira, zertan eta non ikusten duzu zeure burua?

Auskalo, ni haizeak mugitzen nau. Ez dakit datorren urtean zer egingo dudan. Lanbide hau irregularra da, proiektu batekin pare bat hilabeterako atzerrira joateko aukera sor daiteke edo hainbat hilabetez ezer ez. Argi daukat nagoen lekuan nagoela beti egongo naizela prest ikasteko eta klaseak hartzeko. Bestalde, noizbait neure eskola zabaltzea ere gustatuko litzaidake, eta Bilbon ahalko banu, hobeto.

Bilbotarra eta Zarra futbol jokalari ezagunaren biloba izanda, athleticzale amorratua izatea ez da arraroa. Nola daramazu hori Andaluzian?

Ondo, sekula ez dut arazorik izan; alderantziz, han ere Athletic maite dutela esaten didate. Igandean, poz itzela hartu nuen Atleticori irabazi ziolako. Partida dagoenean, beti janzten dut Athleticeko kamiseta, eta auzokoak barre egiten dit. Batzuek badakite noren biloba naizen, eta hitz ederrak baino ez dizkidate esaten hari buruz. Aitonaz zerbait esaten didaten bakoitzean, irribarre zabala ateratzen zait.

Gure auzokide eta auzoaren duintasunaren alde

Urtarrilaren 17an eta 18an, Ertzaintza Deustuko Erribera eta Zorrotzaurre auzoko fabrika abandonatu batean sartu zen. Hainbat urte dira pertsona talde bat gure auzoko fabrika horretan bizi dela, oso egoera txarrean. Bertan zeudenek adierazitakoaren ar...