BEDIA. Arratiek badeko etorkizune, eraiki deigun dinamikaren baitan martxa egingo dute bihar. Bediako Incoesa enpresatik abiatuko da 11:00etan, eta Igorren bukatuko da 13:00 inguruan. Ekitaldia egingo dute iritsitakoan.

Goi mailako teknologia garatzen duten enpresak batzen dira Bizkaiko Zientzia eta Teknologia Parkean. Ohiko enpresetatik haratago doaz, eta ikerketa, joera berriak eta produktuen garapena dituzte helburu. Bikaintasun teknologikoa bilatzen dute. Hori ho...

Hil ala bizi Meatzaldean liburua aurkeztu du Meatzaldea Bizirik ekologista taldeak. 240 orrialdeko lan "kolektibo" gisa deskribatu du Tomas Angel Gonzalok, egileetako batek (Abanto, 1953). Izan ere, jende askok parte hartu du liburuan, eta kolaborazio...

San Valentin eguna modu soil bezain bitxian ospatu ohi dute Zeanuriko Eleizondo auzoan. Hain zuzen, Piedadearen ermita aurrean dagoen artea neurtzeari ekingo diote beste urte batez.12:30ean egingo dute neurketa. Duela 55 urte ekin zioten lan horri ele...

Igorreko Udala duela bost urte hasi zen margolaritza mintegiak antolatzen. Ordutik, urtean sei larunbatetan, Ines Medinak gidatutako tailerrak egiten dituzte. Saio horietan margotzen ikasi, eta beraien kontura hasi dira lanean Bizkaiko hainbat herrita...

Sestao, Europako beste bost hirirekin batera, parte hartzen ari da Eu-Gugle egitasmoan. Bost urteko epean, zaharberritze energetikorako proiektuak egin beharko dituzte, bakoitzak bere hirian. Ereduak finkatuko dituzte, epe hori igarotakoan Europa osor...

• Iaz foru aldundiaren aholkularitza jasotako nekazariak. 327 nekazaritza ustiapen ibili ziren iaz foru aldundiaren nekazaritza aholkularitzaren programan. 145.000 euro inbertitu zituen higiene, elikadura segurtasun eta hobekuntza genetikoan.

Meatzaritzak izan duen garrantziaz jabetuta, jarduera bera eta meatzarien lana gogorarazteko programa abiatu du Bilbo Historikok: Bilboko Meatzeak. Hainbat erakusketak, hitzaldi ziklo batek eta bisita gidatuek osatzen dute.

Kultur egitasmo horren bitartez, "motor ekonomikoa eta Bilbo eta Bizkaia garatzeko elementu erabakigarria izan zen meatze jarduerara" hurbildu gura dituzte belaunaldi berriak. Horretarako apirilera bitartean hainbat jarduera egingo dituzte.

Eguaztenean inauguratu zuten programari hasiera eman dion erakusketa: Bilbo Historikoko Meategiak maketen bilduma. Bilboko Berreginen Museoan dago ikusgai, eta hainbat alor ezagut daitezke. Besteak beste, mineralak erauzteko prozesu osoa. Haien tratamendua eta garraioa irudikatzen duten hogei maketa jaso dituzte. Meategi baten anatomia ere badago. Horrez gain, itsasadarreko zamaketetaraino bagonetak, zaldiak edota tren txikiak erabiliz egiten zuten lehorreko garraioa zer-nolakoa zen ezagutzeko aukera izango da.

Bestalde, kaietan zeuden kargatzeko tokiak identifikatu dituzte. Horien artean, Martzana, Urazurrutia eta Ibenia aldea ikus daitezke. Baita Miribilla eta Muturreko Meategia eremuak lotzeko itsasadarraren gainetik igarotzen zen tranbiaren irudikapena ere. Lan horiek guztiak Jaime Laita artistak egin ditu.

Maketez gain, Euskal Herriko Meatzaritzaren Museoak utzitako argazkiak eta garai hartako meatzariek erabiltzen zituzten jatorrizko piezak jaso dituzte erakusketan. Meatzaritza pil-pilean zegoen garaiko lan eta bizimodu latzak gogora ekarriko dituzte erakusketa horren bitartez.

Apirilera bitartean, baina, jarduera gehiago izango dira. San Frantzisko auzoan dago Bilbo Historiko, eta haren Expogelan Emilio Cobosen All Iron instalazioa ikusteko aukera izango da, martxoaren 6tik aurrera.

Martxoaren 13an, bestalde, Bilboko Itsasadarra Itsas Museoan Meatze Auzoa pintura erakusketa zabalduko dute. Ignacio Ipiña artistaren margolanak jasoko dituzte bertan. Horrez gain, datorren hileko azken zapaturako interpretazio ibilbideak antolatu dituzte San Frantzisko eta Bilbo Zaharreko meatze eremuetatik. Meatzaritzari buruzko gaian sakontzeko, gainera, hitzaldi ziklo bat prestatu dute. Historialariek, profesionalek eta idazleek meatzaritza gizartearen alde guztiak ulertarazten lagunduko dute. Martxoaren 22an eta 23an, gainera, programa kalera ateratzeko asmoz, Burdin Festa ospatuko dute, Martzanako kaian.

Elorrioko Auzoak Koordinakundea Espainiako Auzitegi Gorenera jotzeko bidean da, Hiri Antolamendurako Plan Orokorrak nekazari izaerako lur eremu batzuk industriarako urbanizagarri bihurtzeko aurreikusten duen erabakia atzera botatzeko eskatzeko. Izan ere, EAEko Auzitegi Nagusiak ez die onartu HAPO barruan Pulla Azkarreta eremuari dagokion erabakiaren kontra jarritako helegitearen zati hori. Xabier Zarandona koordinakundeko idazkariak azaldu du "kezkatuta" daudela. "Bertoko alderdi abertzaleek ez dute defendatzen lurzoru horren izaera eta estatuko epaitegietara jo behar izan dugu ea ingurumenarekiko sentsibilitate handiagoa erakusten duten ikustera".

2001az geroztik ibili dira Elorrioko udal gobernuan Hiri Antolamendurako Plan Orokorra osatzen. Euskal Herritarrok alderdiak hasi zuen, ostean EAJk jarraitu zion, geroago EAE-ANVk onartu zuen plana —2011n— eta, egun, EAJk plan horrekin beharrean jarraitzen du.

"Espekulazio" zantzua antzematen dio koordinakundeak aferari. Izan ere, azaldu duenez, 2001 aldera "Sprilur sozietate publikoa agertu zen Elorrion, HAPO eta Durangaldeko Lurralde Zati Plana osatu eta onartu baino lehen". "Nekazari lurrak erosten hasi ziren. 21 hektarea inguru erosi zituzten". Jabe guztiek ez zituzten euren lurrak saldu, baina sozietateak erosi nahi zituen guztien "%60 inguru" eskuratu zituen. Saldu ez zituzten lurretako askotan egun "landaketa ekologikoa garatzen dute edo baserritarrek erabiltzen dituzte", besteak beste.

Orduz geroztik, udalean egon diren alderdi guztiek "premisa berari" eutsi diotela salatu du Zarandonak: Pulla Azkarreta eremuko "nekazari lurretan industrialde bat egin behar dela diote guztiek".

Erabaki horrek, baina, herrian "polemika sortu" zuela ekarri du gogora. "Elorrion degradatutako lur asko dago hiriko hutsuneetan; lantegiak izandakoak, besteak beste". Sprilurrek, baina, lur horiek ez zituela nahi izan salatu du. "Epaiketan bertan argi eta garbi esan zuten: 'Nolatan hasiko gara, baina, eremu horietan kutsadura kentzen? Kostuak oso handiak lirateke'. Beraz, herri osoa degradatutako hutsunez beterik utzi gura dute, kostuak handiak liratekeelako eta nekazari erreserbarik berdeena hartu nahi dute merkeago ateratzen zaielako?".

Ingurumena babesteko arrazoi horrez gain, baina, beste argudio batzuk ere jaso ditu Auzitegi Gorenera bidean daukaten helegiteak. Hain zuzen, Zarandonak azaldu duenez, "Sprilurrek lur horiek erosi zituenean Durangaldeko Lurralde Zati Planean (LZP) ez zen ezer jasotzen eremu horiei buruz. Lurraldeko Baso arloko Planak (LBP), ordea, nekazari balio handia aitortu zien".

LZP behin-behinean onartzeko prozesuari 2008an ekin zioten. "2011n behin betiko onarpena eman zitzaion, hain justu, udalak HAPO onartu baitzuen. LZPn, lur eremu horiei zegokienez, orban bat ageri zen, eta, beharrezkoa balitz, eremu horretan enpresak sor zitezkeela zioen. Kasualitatea ote da?", egin du galdera Zarandonak.

Lurralde Zati Planaren eta Lurraldeko Baso arloko Planaren artean, beraz, "kontraesana" sortu zen. Bigarrenak, ordea, "ez zuen behin-behinekotasunetik aurrera egin. Ez diote behin betiko onarpena eman". Epaia ez dela "mamian sartu" uste du.

Udala ez da iritzi berekoa

Auzitegi Nagusiak Lurraldeko Baso arloko Planaren irizpideari jarraitu beharko liokeela uste du koordinakundeak, hasieratik "ideia berari eutsi diolako". Udala, ordea, ez da iritzi berekoa. Joseba Mugika Hirigintza zinegotziak hala dio: "Lurraldeko Baso arloko Plana ez dago onartuta; behin-behineko onarpena besterik ez du. Horren gainetik dago LZP, eta horrek industrial gisa jasotzen ditu lur horiek. Horregatik, Auzitegi Nagusira jo zutenean ez genuen ulertzen oso ondo erabakia, ikusten baitzen bide motza zuela helegiteak. Are zentzu txikiagoa du, gure ustez, Gorenera jotzeak, jakinda lurraldea antolatzeko tresnek nola jasotzen duten eremu horien bokazioa. Uste dugu ez duela ez hanka ez buru onartuta ez dagoen plan bat, balio juridikorik ez duen plan bat, erabiltzeak. Epaileak horretan oinarritu du bere epaia".

Mugikak ezeztatu egin du Lurralde Zati Planak beren-beregi barneratu izana eremu horiek industriarako izaera izateko aukera. "HAPO eta LZP, biak, garai bertsuan garatu ziren. Plan orokorrarekin urte mordoa ibili ginen. LZPren tramitazio faseak HAPOren onarpena baino pixka bat lehenago gauzatu ziren. Ez da egia eurek diotena. Izan ere, epeei erreparatuz gero, paretsu joan ziren, baina LZP ez zen moldatu lurren izaera hori jasotzeko. LZP, gainera, ez du udalak egiten, Eusko Jaurlaritzatik landutako dokumentua da. Udalak alegazioak egin ditzake, baina ez dauka eraginik dokumentu horretan".

Espekulazio zantzuei dagokienez, horrelakorik ez dela izan esan du. Gogora ekarri du HAPOk udaleko ordezkari guztien babesa izan zuela, "zinegotzi independente batena izan ezik". "Ikuspegi politikotik, beraz, berme guztiak ditu. Hirigintza proposamen honen atzean espekulazioa dagoela esatea errealitatea aldatzea da erabat".

Mugikaren ustez, hirigintza proposamen hori "ezinbestekoa da etorkizunean herri honetan garapen ekonomikoa suspertzeko, lanpostuak sortzeko eta herrira aberastasun sozial eta ekonomikoa erakartzeko". Horretarako beste lurrik ez dagoela ohartarazi du, gainera, Hirigintza zinegotziak: "Dauden lurrek jabeak dituzte edo ez dira garapen industriala mamitzeko batere aproposak".

Udalak, bestalde, herritarren artean "polemikarik ez" dagoela deritzo. "Herriak gatazka hori gainditu zuen. Bizilagunek onartuta daukate. HAPO onartu zenean, ordura arte zegoen iskanbila baretu egin zen", esan du. Gorenean, bada, ez dio biderik aurreikusten Auzo Koordinakundearen helegiteari.

Arrazoia koordinakundeari

Bestalde, EAEko Auzitegi Nagusiak HAPOren kontra jarritako helegitearen zati bat onartu dio Auzo Koordinakundeari; San Bizente Zabaletako lur eremuari dagokiona, hain justu. Eremu horri "hiri lurzoru izendapena kentzea" ebatzi du, "betidanik hiri-lurzoru industriala izan baita, oso kutsatua gainera", azaldu du Zarandonak.

Epai hori irmoa da. "Sententziak ez du esaten industriara edo etxeak egitera bideratu behar den. Udalak erabaki behar du zein erabilera eman gura dion". Erabilerei buruzko erabakiak "berriz ere kalkulatu" beharko dituztela esan du. Izan ere, "erabilera industriala ematen badiote, industriara bideratutako lurren kopurua deskontatu egin behar dute Pulla Azkarretatik. Etxeak eginez gero, beste horrenbeste etxebizitzen plan berezitik".

Udalak, oraingoz, ez du erabakirik hartu. Zinegotziak adierazi duenez, "lur horien bizitegi erabilera aurreikusita zegoen arren, erabakia hartzeke dago, eta ez dagokio Alkatetzari soilik".

Bidaideak BSR saskibaloi taldea indartsu dabil. Gurpil aulkian jokatzen dutenen Espainiako Ligako Ohorezko Mailako bigarren fasera igaro den eta Espainiako Kopan lehiatuko den Euskal Herriko lehen taldea da. Denboraldia hasi zenetik "pozarren" egon di...