Api 20, 20122012-04-20Iritzia0

Izanaren izenean

Izena eta izana bihotz bakarreko siamdarrak ei dira. Ezin bata bestea barik bizi, ezin bata bestea barik izan. Aspaldiko kontua dugu, ez pentsa: izena duen guztia omen da dio esaera zaharrak, hizkuntza delako pentsamenduaren euskarria, hizkuntza delako identifikatzen gaituena, haur jaio berriekin gertatzen den modura: zelan dauka izena?

Gaur egungo joerei erreparatuz gero ere, sarean izenik ez duena ez ei da existitu ere egiten. Merkatuari begira ere, enpresetako berritasun-plan guztien arabera, argi eta garbi dago: izenaren bidez besteengatik bereiztea ezinbesteko baldintza da, izena marka bat da, eta marka horren barruan biltzen dira salgai dagoen produktua, produktu horrekin loturiko balore eta ezaugarriak zein produktuaren sortzailea, hots, enpresa.

Beraz, itxura guztien arabera, izena = izana binomioak banaezina dirudi, mendeak mende, sasoiak sasoi, joerak joera, pentsamenduak pentsamendu eta patroiak patroi.

Saia gaitezen, baina, binomio horren zatiak banan-banan aztertzen.

Batetik, izen berba daukagu, hizkuntzalarien arabera, izaki, gauza edo haien multzo bat adierazteko erabiltzen den hitza. Erabilpenari dagokionez, hiru multzotan banatzen da. Bat, pertsonak izendatzeko erabiltzen den multzoa. Bi, lekuak izendatzeko erabiltzen dena. Eta hiru, animaliak eta landareak izendatzeko erabiltzen duguna. Izen guztiak ez direnez mota berekoak, hor ditugu izen bereziak eta arruntak, zenbakarriak eta zenbakaitzak, bakunak edo elkartuak…

Izan berbari heltzen badiogu, ostera, zer esanahi aurkituko dugu? Izan: naturan aurkitzen den edozerk edo edonork gauzatzeko duen modua.

Bi berbok konparatzen baditugu, zein izango litzateke, lehenengoa? Ea, esan dugu, izen berbak izaki, gauza edo haien multzo bat adierazteko balio duela. Izan berba, berriz, zera dela, naturan aurkitzen den edozerk edo edonork gauzatzeko duen modua. Ondorioz, izan litzateke aurrenekoa, gauzatzea bera adierazten duelako, eta izen, aldiz, ondorengoa, gauzatze hori bereizteko erabiltzen dugulako.

Zer gertatzen da, baina, ordena alderantziz jartzen denean, hau da, aurrena izen bat asmatu eta ondoren izen berri horrentzat izan bat, izate bat, asmatzen dugunean? Ba, binomioak berdin-berdin funtzionatzen duela. Begiratu, bestela, sormenarekin zerikusia duen edozein diziplina.

Gauzak honela, eta behin honaino iritsita, galdetuko duzue, zertarako hainbeste hausnarketa?

Ba, labur-labur azalduko dizuet mezu nagusia. Krisialdiak diruak behar diren gauzetan erabiltzera bideratzen gaituen modura, zergatik ez gauza bera egin hitzekin?

Imajinatu, hemendik aurrera, izate zehatz batekin identifikatzea nahi duzula. Zer izen jarriko zenioke zeure buruari?

Jolas bat baino ez da, joko sinple bat, burrundara zorabiatzaile artean, zeure burua berrasmatu eta berrizendatzeko, zeure gustuko izanaren izenean.

Api 20, 20122012-04-20Asteburuko proposamena0

Plaza, letren gunea

Liburu azoka

Barakaldo

Liburu eta diskoek hartuak dituzte Barakaldoko Herriko Plazako txoko guztiak. Egunotan, Barakaldoko 22. Liburu Azoka egiten ari dira.

Astelehenera arte daukate handik pasatu ez direnek bisita egiteko aukera. 24 saltokitan eta liburutegi batean hamazortzi argitaletxe eta sei liburu dendaren lanak daude ikusgai eta salgai.

11:00etatik 14:00etara eta 16:30etik 20:00etara egongo da zabalik azoka gaur eta datorren astelehenean. Bihar eta etzi, berriz, ordu erdi lehenago zabalduko dute.

Idazleekin eurekin hartu-emanak izateko aukera ere izango da. Bihar, esaterako, 19:00etan, Toti Martinez de Lezea idazlea izango da azokan, Nur bere lanarekin. Alberto Bargos eta Piedad Ortiz de Urbina ere han izango dira. Domekan, 13:00etik aurrera, Pedro Ugarte, David Gotsidrizde, Mikel Alvira eta Javier Consejo bertaratuko dira. Astelehena izango da idazleek euren lanak sinatzeko azken eguna. Egun horretan, Andres Galan eta Victor Manuel Gete izango dira Barakaldoko azokan.

Prezio merkeagoak

Liburu edo disko berriak erosteko orduan, beherapenak dauzkate bezeroek azoka horretan. Hain zuzen, dendetan baino %10 merkeago aurkituko dituzte. Euskal Pizkundearen garaiko argazki eta liburuen erakusketa bisitatzeko aukera ere izango dute bertaratzen direnek.

Gaztetxoenen aisialdirako jarduerak antolatuko dituzte, bestalde, bihar. 12:00etan, Atarrabi taldeak antolatutako tailerrak izango dira. 16:00etan, sortze-idazkeraren 5. rallya egingo dute. Ibilalditxo bat egin behar dute parte hartzaileek, eta noizean behin bidean geldituta, norberak sentitzen eta ikusten duena paperean idaztean datza jarduera hori. Barakaldoko Udalak gogora ekarri du azken urteetan oso harrera ona izan duela.

18:30ean, Zirkale konpainiak Vaya par! (A ze parea!) kaleko antzezlana interpretatuko du. Domekarako, puzgarriak eta haurrentzako tailerrak antolatu ditu Ainara kultur elkarteak. 18:30ean, Jolas, el científico inventor (Jolas, zientzialari asmatzailea) kaleko antzerkia izango da.

Api 20, 20122012-04-20Asteburuko proposamena0

Kaleko kulturaren ordua

Kaleko kultura adierazpen artistikoen jaialdia da BreakOnStage. 11. ekitaldia izango da aurtengoa, eta berrikuntza nabarmen batekin dator. Bihar agertoki berria izango dute artistek: Bilbo Arena pabiloia. 20:30ean hasiko da ikuskizuna.

Orain arte Casilla pabiloian egiten zen, baina urteekin, nazioartean lortutako oihartzunari esker, geroz eta jende gehiagok parte hartu izan du. Hala, azkenerako txiki geratu da Indautxuko eraikina, eta kokaleku berriari esker parte hartzaile zein ikusle kopuru handiago bati erantzuteko moduan izango dira.

Gainera, antolatzaileek azaldu dutenez, Bilbo Arenak Casillak baino aukera eszeniko malguagoak eta dinamikoagoak eskaintzen ditu. Hala, orain arte eskaintzerik izan ez duten kaleko bestelako kultura adierazpenak izango dira bihar. Besteak beste, Dirt Jump delakoaz gozatuko dute ikusleek. Horretarako, zazpi metroko garaiera duen malda bat jarriko dute agertokian. Euskal herritar batek erabiliko du: Martxel Arribilaga nafarrak, hain zuzen. Ikuskizunen arteko tarteetan, bizikletariak zorabioa eragiteko moduko jauziak egingo ditu.

Jaialdiak hiru orduko iraupena izango du. Tartean mundu osotik etorritako hainbat artistaren ikuskizunak izango dira. Adibidez, Scott Maruquese AEBetako Atlanta hiritik dator. Popping deitzen diren roboten antzeko mugimenduak egiten iaioa da. Aurrenekoz izango da Europan, Dubset Show izeneko ikuskizunarekin. Bere lana Interneteko bideo bidez zabaltzen du, eta berri bat sareratu orduko 30 milioi bisita lortzen ditu.

Vagabond Crew, berriz, munduko breakdance txapelduna da une honetan, eta bihar Bilbon egingo du erakustaldia. Rapsusklei Zaragozako abeslariak egundoko hip hop kontzertua emango du. Abeslariak mundu osoko agertokietan batetik bestera igaro ditu azken urteak. Iragarri du Bilbora azken berrikuntzekin etorriko dela.

Parte hartzeko aukera

Artista ezagunekin batera, zaleek ere euren tartea izango dute. Horretarako antolatu dute aretoko breackdance lehiaketa. Paristik, Bruselatik, Madrildik eta Zaragozatik etorriko dira lehiakideak, besteak beste.

BREAKONSTAGE

Zer. Kaleko kultura adierazpen artistikoen jaialdia.

Non. Bilbo Arena pabiloian.

Noiz. Bihar, 20:30ean hasita.

Sarrera. Aldez aurretik, 10€; txarteldegian, 12€.

Api 20, 20122012-04-20Asteko Gaiak0

Astialdia, harrapaketa bainoago

Arrantzaren jarduera ezezaguna da arrainen mundutik aparte bizi den jende askorentzat. Horregatik ez da harritzekoa kirol horri buruz gizarteak duen informazio urria. Jarraipen eskasa izan arren, hamasei arrantza klub daude Bizkaian, eta horietako bat...

Api 20, 20122012-04-20Iritzia0

95

• Garellanon zeuden gauzetatik aprobetxatuko dena. Garellanoko eraikinetan (Bilboko Basurtu auzoan) zeuden gauza guztien %95 birziklatu egingo dituzte, era batera edo bestera.

Api 20, 20122012-04-20Asteburuko proposamena0

Done Jurgiren omenezko erromeria egingo dute bihar Gueñesen

Gueñesko Lasier, Lanbarri eta Sologutxi auzoetako herritarrek Done Jurgiren omenezko erromeria ospatuko dute bihar. Duela bi urte berreskuratu zuten jai hori, 40 urtean bertan behera utzita egon ostean. Aurten, berrikuntza modura, bi eguneko egitaraua prestatu dute. Izan ere, gaur arratsalde partean Enkarterriko musika taldeen lehiaketa egingo da.

Biharko, berriz, egun osorako antolatu dituzte ekitaldiak. Goizean, adibidez, txupinazoa, kalejira, umeentzako jolasak, putxera erakustaldia, Done Jurgiren omenezko meza eta euskal dantza tradizionalen alardea izango dira baselizan eta inguruetako landetan. Goiz partea behar bezala bukatzeko, 15:00etarako herri bazkaria antolatu dute. Erreka hotelean egingo da otordua, eta menuaren oinarria putxerak izango dira.

Arratsaldean lehiaketen txanda izango da: 17:00etan mus txapelketa jokatu da eta 18:00etan umeen playback-a. Gauez, berriz, Duo Rolez Show taldearen umore emanaldiak eta dantzaldiak girotuko dituzte festa eguneko azken orduak.

ERROMERIA EGUNA

Noiz. Bihar, larunbata.

Non. Gueñesen, Lasier, Lanbarri eta Sologutxi auzoetan.

Api 20, 20122012-04-20Asteko Gaiak0

Debekatuta dago izokinak arrantzatzea

Zabaldu berri den denboraldian, debekatuta dago izokinak arrantzatzea. Zenbait errekatan —Sopuertan, besteak beste— izokina leheneratzeko lanetan ari direla azaldu du Herminio Perez Garridok. "Kumeak botatzen ari dira uretara, espezie hori lehengoratu guran", esan du.