Trapagaranen, Larreinetako funikularraren kabina zaharra ikusgai ipini dute, eta azpiegituraren eta meatzaritzaren historia kontatzen duten baliabideekin osatu.

Durangoko Kurutziagako bide gurutzea XVI. mendean egin zuten. Gaur egun, Kurutzesantu museoan dago; gurutzearen, egoitza duen ermitaren, Vera Cruz kofradiaren eta Durangoko heresiaren historia kontatzen dio bisitariari.

Balmasedako La Encartada lantegia ehungintza lantzeko ireki zuten. Prozesu osoa egiten zuten bertan. Gaur egun, makinak martxan jartzen ari dira ostera.

1937ko apirilaren 26ko bonbardaketa kontatzeko sortu zuten Gernikako Bakearen Museoa. Egun, memoria ez ezik, bakea eta giza eskubideak ere lantzen dituzte.

Gautegiz Arteagako Urdaibai Bird Centerrek hamar urte bete ditu asteon. Biosfera erreserbako eremuak eta ekosistemak aztertzen dituzte, horiek kontserbatzeko neurriak hartze aldera.

Elantxobeko Kofradiaren eta Arrantzaren Museoa iaz ireki zuten, portuan. Herriak itsasoarekin izan duen harremanaren historia bildu dute bost paneletan.

Azarotik, Euskal Abertzaletasunaren Museoak Bilboko Sabin Etxean du egoitza. Lehen Aberri eguna, ikurrinaren sorrera, Emakume Abertzale Batzaren historia eta beste ezagut daitezke.

Santurtzik itsasoarekin arlo guztietan duen eta historikoki izan duen lotura erakusten du bertako Itsasoa museoak. 1600. urtetik gaur egunera arte herrian izan duten bizimodua islatzen du.