Galdamesko Loizaga dorrean Europa mailako Rolls-Royce ibilgailuen bilduma osatuena dago ikusgai. 1907tik 1990era enpresak egindako modelo guztietatik gutxienez ibiligailu bat dute ikusgai.

Arrantzaleen Museoa Bermeoko Ertzilla dorrean dago, portu zaharraren gainean. Hiribilduaren historia, Matxitxakoko gudua eta itsasoari lotutako ekonomia, bizimodua eta ohiturak bertatik bertara ezagutzeko aukera ematen dio bisitariari.

Itxi zituzten arte Bizkaiko Labe Garaietan eta Babcock Wilcox altzairutegian zeuden artelanak erakusteko sortu zuten Rialia industriaren museoa, 2006an, Portugaleten.

Plentziako Aramburu farmazia 1888an zabaldu zuten, eta ordutik erabilitako botika, tresna eta errezetak ikusgai ditu horretarako beren-beregi sortutako museoan; 2010ean ireki zuten. Botikak nola erabili izan diren jakiteko aukera ematen du.

Mañariko Hontza museoa da natur zientzien Bizkaiko aurrena. Mundu osoko 45.000 espezieren aleak ditu; horietako 1.500 dauzka erakusgai. Besteak beste, funtzio hezitzailea eta ikerketa ditu ardatz.

Muskizko Pobaleko burdinola museoan Bizkaiko industriaurreko bi jarduerarik garrantzitsuenak erakusten dira: burdingintza eta errotaritza. Salazar familiak eraiki zuen, XVI. mendearen hasieran.

Durangoko Arte eta Historia Museoak ildo bi ditu: batetik, herriaren historia kontatzen du historiaurretik hasita, eta, bestetik, euskal sortzaile garaikide garrantzitsuenen lanak biltzen ditu.

Bilboko Berreginen Museoak antzinako Greziako eskulturarik ezagunenen erreplikak ditu ikusgai. Artelan originalak dauden museoei erositakoak dira Bilbon ikusgai dauden pieza gehienak.

Duela ia 40 urte ireki zuten Medikuntza eta Zientzia Historiaren Euskal Museoa, EHUren Leioako campusean. XIX. eta XX. mendeetako gailu teknologikoak ditu.

Plasentia de Butron museoak Plentziako historia kontatzen dio bisitariari. Sorreratik, ontzigintzari eta itsas merkataritzari lotutako hiribildua izan da, eta hori ikusten da erakusketetan. Besteak beste, itsasontzien maketak daude ikusgai.