Kukuek hau esan'ban: 'Andra Marije/martikutik zortzi egunera ez ba'zue/nire kantue entzuten, egikezuez nire/ondra ta olatak'". Labayru ikastegiak argitaratutako Domingo Zuluagaren Ibarrangelu kontu eta kantu liburuan jasotako kopla da. Datorren martit...

Hainbat herritarrek Mungian elkarretaratzea egin zuten martitzenean, Andina Reges Pereiraren hilketa salatzeko. Indarkeria matxistaren ondorioz Bizkaian aurten hil den lehen andrea da. Haren bikotekide ohia atxilotu du Ertzaintzak, eta epaileak espetx...

Bizkaiko Txakolinaren inguruko informazioa eskuratzeko, eta kide diren upategien berri jasotzeko, jo hurrengo webguneetara.

• www.bizkaikotxakolina.org. Bizkaiko Txakolina sor-markaren ataria.

• www.txakolingunea.com. Txakolingunearen webgunea.

Neguan Kantauri itsasoan izandako ekaitzek Bizkaiko kostaldean 14 milioi eurotik gorako kalteak sortu dituzte. Eusko Jaurlaritzak, Bizkaiko Foru Aldundiak eta udalek zenbatu dituzte eurek ordaindu beharreko txikizioak, eta kopuru hori atera zaie guztia batuta. Martxoaren 3ko olatuek eragindakoak neurtu gabe dituzte oraindik. Zenbateko hori beste %10 hazteko bestekoak izan direla uste dute. Eta Espainiako Gobernuak ere ez du bukatu bere kontaketa. Dena den, dagoeneko 500.000 eurotik gorako inbertsioa egin du Nekazaritza, Arrantza eta Ingurumen Ministerioak, martxan dauden konponketa lanak ordaintzeko —Sopelako hondartzan, Gorlizkoan eta Bakioko pasealekuan eta itsasadarrean—.

14 milioi horietatik, erdiak inguru Bermeon zenbatu dituzte. Otsailaren 2ko eta martxoaren 3ko ekaitzetan bertako portuak jaso ditu kolperik latzenak. Pantalanak, portu zaharreko azpiegiturak, dikea, kai muturra, Frantxuako arrantzaleen lonjak... Sartzea lortu duen lekuetan, dena apurtu zuen itsasoak. Lekeition ere milioi bat eurotik gorako gastuak izango dituzte. Estoldetako kutxa txikiak, itsas hesia eta beste hainbat azpiegitura apurtu zituen urak portuan.

Ana Oregi Eusko Jaurlaritzako Ingurumen eta Lurralde Politika sailburuaren esanetan, lehentasuna portuek eta hondartzek izango dute. "Herri hauen ekonomiarako ezinbesteko azpiegiturak dira, arrantzarako, merkataritzako eta turismorako", nabarmendu du. Horregatik, "ahalik eta arinen" konponduta egotea da erakunde publikoen asmoa.

Bi hilabete barru berriro elkartuko dira. Ordurako lan guztiak hasita egongo dira, eta hainbat bukatuta. Hartara, kostu guztiak zehatzago zenbatuta edukiko dituzte. Sailburuaren esanetan, udarako guztia konponduta egotea "ezinbestekoa" da.

Ohiz kanpoko kalteak direla nabarmendu dute guztiek. "Unai Rementeria, Bizkaiko Lehendakaritza ahalduna: "Ditudan 40 urteetan ez dut halakorik ezagutu. Eta aurten zazpi denborale izan ditugu, bata bestearen atzetik. Ikusteko eta argazkiak ateratzeko oso politak izan dira, baina eragin dituzten ondorioak beldurgarriak ere bai. Otsailaren 2koa, bereziki, izugarria izan zen".

Itsasertzean sortutako kalteak Espainiako Gobernuak ordainduko ditu, harena baita itsasbazterra mantendu eta kudeatzeko eskumena. Honela azaldu du Rementeriak: "Gure esku daude hondartzak; udalek egin behar dute hiri altzarien mantentzea, eta Jaurlaritzak portuena". Bilboko portua da salbuespena, Espainiako Sustapen Ministerioarena baita. Herri administrazioei gogoratu die foru aldundiak baduela larrialdietarako funts bat: "Eurek ordaindu beharreko gastuei aurre egiteko, hiri altzariak eta bestelako kalteak konpontzeko, berbarako, ezustekoetarako funts horretara jo dezakete udalek".

Europari laguntza eskatzea ere ez dute baztertu. Eusko Jaurlaritzak adierazi duenez, Kantabriako Gobernuaren egitekoa izango litzateke eskaera egitea, hura baita une honetan Ardatz Atlantikoaren Batzordeko burua. Hala ere, laguntza horiek iritsi bitartean zain egon beharrean, beharrean hastea erabaki dute.

Joan den otsailaren 13an aurkeztu zuen EH Bilduk frankismo garaiko alkateen erretratuak udaletxetik kentzeko ekimena. Biktimekiko "iraingarritzat" jo zuten irudiok korridoreetan egotea. PSE-EE ere koadrook kentzearen alde agertu zen; PPk, aldiz, propo...

Martxoak jarduera ugari ekarriko du Bizkaiko museoetara. Hala iragarri du Bizkaiko Foru Aldundiak, museoetako hil horretarako programazioa aurkeztu duenean.

1. Arkeologi Museoa

Arkeologi Museoak bisita gidatuak antolatu ditu Sakonako erromatar garai berantiarreko altxorra (Errigoiti) programaren barruan. Txanpon bereziak erakutsiko dituzte. Txanponok arkeologia indusketetan hartutakoak zein museoak gordailuetan dituenak dira. Sakonako altxorra izeneko erakusketa 1.700 urte baino gehiago dituzten ehundik gora txanponek osatzen dute. Hain zuzen, Kristo ondorengo III. mendeko azken herenetik IV. mendeko lehenengo hamarkadetara bitartekoak dira.

Bisitak zapatuetan eta domeketan egin daitezke. Zapatuetan bi aukera daude: 13:15ean eta 18:15ean; domeketan, berriz, 13:15ean hasiko dira. Maiatzaren 5era arte dago bisitok egiteko aukera. Horretarako, baina, beharrezkoa da lekua hartzea 94-404 09 90 telefono zenbakira deituta edo helbide elektroniko honetara idatzita: arkeologimuseoa@bizkaia.net.

Mallonako eskaileretan dagoen museoan jarduera gehiago ere izango dira: hain zuzen, Arkeotxotxongiloak familia arteko tailerrak prestatu dituzte. Parte hartzen dutenek txotxongiloak sortzeko aukera izango dute; baita Neolito garaian girotutako ipuin bat antzezteko ere. Helburua sasoi hartako eguneroko bizimodua ezagutaraztea da.

Datorren domekan egongo da tailer horretan parte hartzeko aukera. Hurrengoak hilaren 16an, 20an eta 30ean izango dira. Egun horietan guztietan, 11:30etik 13:00era artean egingo dituzte. Horietan parte hartzeko ere, beharrezkoa da aurretik izena ematea. Bisita gidatuetarako aurreikusitako bide berberak erabil daitezke: telefonoa eta helbide elektronikoa.

2. Euskal Herria museoa

Gernika-Lumoko Euskal Herria museoak Udaberriko larunbatak. Museora familiarekin izeneko tailerrak emango ditu martxotik ekainera bitartean. Koloretako artelanak, piratak eta altxorrak eta Euskal dantzak izeneko tailerrak izango dira, besteak beste. Horrez gain, Emakumea eta euskal pilota aldi baterako erakusketa bisitatzeko aukera ere badago, apirilaren 20ra arte.

Jarduerotan parte hartzea doan bada ere, aurretiaz izena eman behar dela jakinarazi du foru aldundiak: 94-625 54 51 telefono zenbakira deituta edo euskalherriamuseoa@bizkaia.net helbide elektronikora idatzita.

3. Rekalde aretoa

Rekalde aretoan, martxoaren 20an hasi eta 23ra bitartean, Arte Argitalpenen II. Jaialdia egingo dute. Arte argitalpenen inguruko topaketak eta hitzaldiak egingo dituzte bertan.

4. Santimamiñe

Santimamiñeko kobazuloaren inguruak eta barrualdea bisita birtual bidez ezagutzeko aukera ere egongo da martxoan. Basondoko Santimami baselizaren ondoko kioskoan hasiko dute ibilbidea (Kortezubi). Kobazulora bidean, artadi kantauriarra eta bertako landareak eta animaliak aurkituko ditu bisitariak parez pare.

Gero, haitzulorako sarrerako korridorera iritsita, duela urte batzuk aztarnategiari buruz berriz abiatutako ikerketa lanen eta haiei esker lortutako ondorioen berri jaso ahal izango dute. Santimami baselizara itzulita, kobazuloaren hiru dimentsioko erreplika birtual bati esker, haitzuloaren barnealdea ezagutu ahal izango dute; haren eraketa eta morfologia ulertu eta koba horren ospetsu bihurrarazi zuten historiaurreko pinturak ikusi ahal izango dituzte.

Bisitok ordu eta erdiko iraupena dute. Betiere gidari baten laguntzarekin egiten dira, eta 10:00etan, 11:00etan, 12:00etan eta 13:00ean egin daitezke.

5. Pobaleko burdinola

Muskizko Pobaleko burdinolak lehenengo aldiz gogoratuko du Uraren Nazioarteko Eguna, martxoaren 22an, zapatuz. Horretarako, Tresna hidraulikoak industriaren zerbitzuan izeneko jarduera prestatu dute, Busturiko Madariaga Dorretxearekin batera.

Bisita gidatu "berezi" bat antolatu dute. Energia hidraulikoa hainbat lanetarako erabiltzeak sortu zuen iraultza teknologikoa izango da jardueron ardatza. Beraz, Pobalen ikus daitezkeen bi industria tradizional nabarmenduko dituzte, batez ere: burdingintza eta errotak. Bi ordu iraungo du ibilbideak, eta ohiko bisitetan ikusten ez diren leku eta instalazio batzuk erakutsiko dituzte. 10:30ean hasiko dute bisita. Hiru euro ordaindu behar dituzte helduek, eta 12 urtetik beherakoentzat doakoa izango da. Lekua hartzeko, 629 27 15 16 telefonora deitu edo info@elpobal.com helbidera idatzi behar da.

6. Ondare aretoa

Argazki lehiaketa antolatu dute Bilboko Ondare aretoan. Lehen eta Bigarren Hezkuntzako ikasleek parte hartu ahal izango dute. Hilaren 25a baino lehen aurkeztu behar dira lanak; gaia natura izango da.

2003 eta 2012 bitartean, garraio publikoak 9,7 milioi erabiltzaile galdu zituen. Hala baieztatu du Bilboko Auzo Elkarteen Federazioak Bilbo eta inguruetako garraio publikoari buruzko Liburu Zuriaren eguneratzearen berri ematean. Datuok jasota, garraio publikoaren alorrean egindako politiken "porrota" salatu dute.

Francisco Javier Muñoz auzo elkarteen federazioko presidenteak jakinarazi ditu, beste batzuekin batera, datuok. 2007 eta 2013 artean gauza azpimarragarriak gertatu zirela deritzo: "Batetik, behera egin zuen garraio publikoaren erabilerak; %7,8, hain zuzen. Hala ere, batez beste, garraio publikoaren kudeaketa duten enpresek %15,8 diru gehiago bildu dute, eta KPIak %10,9 egin du gora". Langabeziaren gorakada ere aipatu du. "Bitxia da, krisi ekonomikoan murgilduta, erabiltzaileek behera eginda, diru bilketak gora egin izana". Hori horrela izateko tarifak igo dituztela azaldu du. Gehien garestitu diren zerbitzuak trenetakoak izan direla esan du Muñozek: Renfe, FEVE, metroa eta tranbia.

Jaurlaritzaren 2002-2012ko plan gidatzaileak ezarri zituen helburuak paperean geratu zirela deritzo. "Ez dira bete. Asmoa zen ibilgailu pribatuaren erabiltzaileak garraio publikora bideratzea. Bilbon ikusi dugu 2008ra arte metroak irabazi dituen erabiltzaileak —13 milioi— Bizkaibus eta Renferi kendu dizkionak direla —6 milioitik gora, kasu bietan—. 2012ra bitartean, ordea, metroak berak ere galdu egin ditu erabiltzaileak. Ez da ikusi, ordea, Bilbora doazenei edo handik ateratzen direnei dagokienez, gutxitu egin direnik ibilgailu pribatuaren erabiltzaileek". Bilbo barruan, ostera, bai, behera egin du autoan dabiltzanen kopuruak.

Muñozek berba egin du Bizkaiko Batzar Nagusiek eratu duten batzorde txostengileaz ere. "Helburua da garraioaren agintaritza bakarra sortzea". Uste du interesatzen zaion erabiltzaileari abantailak emateko ahalmena izango lukeela erakunde berri horrek, eta aukera hori aprobetxatzea nahi luke. "Esaterako, Bilbora gehienak ibilgailu pribatuan joaten dira. Beraz, Bilborako garraio publikoaren prezioak murriztu daitezke, jendea erakartzeko". Zehaztu du erabiltzaileak eurak ere ohitu egin behar direla garraio publiko batetik bestera aldatzera.

Horrez gain, "prezio bateratuak" eskatu ditu Bilboko Auzo Elkarteen Federazioak. "Ez da gauza bera Bilbora autobusez edo metroz joatea. Garraioaren araberako tarifak daude. Horrez gain, ibilbide horretan bi garraio enpresatako zerbitzuak hartu behar izanez gero, Barik txartela birritan balioztatu behar da, Bilbobusen kasuan izan ezik".

Txartel bakar egokiaz

Txartel bakarrak, beraz, haratago joan beharko lukeela deritzo. "Jatorritik helmugara dagoen distantziaren araberako tarifa eskatzen dugu, garraiobide bat edo beste bat erabiltzen duzula ere". Urteotako balantzeari "oso pobre" iritzi dioten arren, 2013an eta 2014an Barik txartelak "aldaketa txiki bat" ekarri duela aitortu du Muñozek.

Hobetzeko proposamena egin du: "Txartel bakar aproposa litzateke Bartzelonako probintzian dutena. Txartel horrekin batetik bestera joan zaitezke, jatorritik helmugara dauden kilometroen arabera eta igaro behar dituzun guneen arabera neurtuta. Distantzia batek prezio bakarra beharko luke izan, nahiz eta garraio bat baino gehiago erabili. Adibidez, Zornotzatik San Ignaziora (Bilbo) iristeko hau izan daiteke bidaia: Eusko Trenekin iristen zara Atxuriko geltokira, eta han autobusa hartzen duzu, eta, gero, metroa. Horrek prezio eta txartel bakarra izan beharko luke. Egun, hori ezinezkoa da: Eusko Trenek tarifa bat kobratzen dit, autobusak beste bat eta metroak beste bat, nahiz eta guztiak ordaintzeko Barik txartela erabili dudan".

Bestalde, komunikazio eskasagoak dituzten eremuekiko zerbitzua indartu beharraz ere ohartarazi du. Besteak beste, Enkarterriren kasua aipatu du. "FEVEk oso zerbitzu txarra ematen die, eta garestia. Bizkaibusek erabiltzaileak lapurtu dizkio, eta lehia sortzeko geltokiak eta ordutegiak jarri ditu autobus zerbitzuak. Eremu horiek sustatzearen aldeko apustua egin behar da, eta beste leku batzuetatik soberan dauden baliabideak horietara bideratu".

Bilbo hegoaldeko saihesbidearen, Artxandako tunelen eta antzeko azpiegituren alde Bizkaiko Foru Aldundiak egin ohi duen apustua ere salatu dute: "Horrelakoak ez dira eraginkorrak, eta garestiak dira".

• Baserritarrek laguntzatan jasotako milioiak. 4.000 baserritarri baino gehiagori 20,8 milioi euroko laguntza eman zien iaz Bizkaiko Foru Aldundiak.

Alkate frankisten irudiek Bilboko udaletxean jarraituko dute. Hala erabaki dute EAJk eta PSE-EEk. Korridoreetatik kendu bai, baina beste leku bat bilatuko diete erretratuoi. Hain zuzen, "testuinguruan kokatutako espazio bat prestatzea" adostu dute jeltzaleek eta sozialistek Leku horretan jarriko dituzte alkate guztien irudiak, "historia ulertzen lagunduko duten beste elementu batzuekin".

Polemika eragin duten alkateok, Bilboren agintaritza euren eskuetan eduki zuten 1937tik 1979ra. Herritarrek hala erabaki gabe, hamar alkate izan ziren, hamahiru, hiru alkate bitartekariak gehituz gero.

1. Jose Maria Areilza

Frankistek Bilbo okupatu eta bi egunera izendatu zuten alkate Jose Maria Areiltza Rodasko kondea. (Portugalete, 1909-Madril, 1998). Zortzi hilabetez izan zuen aginte makila eskuetan, 1937 eta 1938 artean. Hiriburuko hainbat kaleren izenak aldatu zituen karguan egon zen bitartean, terminologia faxista erabiliz. Izendatu zuten egunean bertan, Bilboko udal langile guztiak kaleratu zituzten: 1.800 inguru ziren.

Urteek aurrera egin ahala bere ibilbidea zuzendu egin zuela esan bazuen ere, entzutetsu bihurtu zen haren adierazpenetako bat: "Espainiaren existentzia jokatu da armen taulan. Borrokatu egin da. Irabazi egin da. Ondo uler dezatela denek. Betiko". Diktadorea hil ostean, Juan Carlos Borboikoa Espainiako erregeak hala erabakita, Carlos Arias Navarro Espainiako Gobernuko presidenteak Atzerri ministro izendatu zuen, 1975eko abenduan.

Pio Cabanillasekin batera, lehenengo Alderdi Popularra sortu zuen 1976an. Gerora, UCDn sartu ziren. Alderdia utzi zuen Adolfo Suarez iritsitakoan. 1987an, gainera, Espainiako Errege Akademiako kide izendatu zuten.

Besteak beste, El Correo Español egunkariko kontseilaria izan zen Areiltza; baita Central Siderurgica y Sociedad Española de Amiantoseko presidentea ere.

Mutrikun (Gipuzkoa) dago ehortzita, Mercedes Txurruka Zubiria emaztearekin eta Mercedes alabarekin batera.

2. Jose Maria Gonzalez Kareaga

1938an agintean egon zen sei hilabeteetan, Jose Maria Gonzalez Kareagak (Bilbo, 1899-Madril, 1971) Mola jeneralaren eskultura bat eraikitzeko agindu zion Moises de la Huertari. Udalak ordaindu zuen: orduko 5.000 pezeta izan ziren. Olabarrietako parkearen izena aldatzeko agindua ere eman zuen Gonzalez Kareagak; Condes de Zubiria deitu zuen, industria arloko noble familiaren omenez.

CEPSA enpresako zuzendaritzako kide izan zen. Horri esker, Venezuelan eta AEBetan petrolioarekin lotutako negozioetan aritu zen.

3. Felix Lekerika

Zortzi hilabete egin zituen Felix Lekerikak ere Bilboko alkate (Bilbo, 1891-Bilbo,1963). Hainbat enpresatako kontseilaria izan zen; besteak beste, La Basconia, Urquijo banketxea, Vidrieras Españolas eta Tubos Forjados. Bilboko Patroien Ligako zuzendaria ere izan zen.

Frantzia nazien esku zegoela, Espainiako enbaxadore izan zen bertan. Milatik gora errefuxiaturen atxiloketen erantzulea izan zen; gehienak, EAJkoak. Jose Antonio Agirre lehendakaria atxilotzen ere saiatu zen. Ez zuen lortu. Bai, ordea, Generalitateko presidente Luis Companys eta Julian Zugazagoitia harrapatzea —1931n Bilboko zinegotzi izan zen hura—. Francok aginduta erail zituzten biak.

4. Jose Maria Oriol

1939an alkatetzara iritsi zenean, Falangeko probintziako buru bihurtu zen Jose Maria Oriol (Santurtzi, 1905-Madril, 1984). 22 hilabetez eutsi zion Bilboko aginte makilari. Berrogei bat enpresatan kontseilari eta presidentea izan zen; besteak beste, Babcock Wilcox, Fenosa, Banesto, Talgo, Hidroelectrica Española eta Unesa. Espainiako lehenengo zentral nuklearrak eraiki zituen, eta Euskal Herrian Lemoizkoa eta Debakoa sustatu. Hitlerrek III. Reicheko Arranoaren zaldun gurutzea eman zion.

5. Tomas Perosanz

Jose Maria Oriolek kargua utzi ostean hartu zuen alkatetza Tomas Perosanzek (Bilbo, 1893-Bilbo, 1959). 1941ean eta 1942an, 22 hilabetez izan zen karguan. Hainbat omenaldi egin zizkien buruzagi frankistei. Itsasontziekin lotutako negozioetan aritu zen.

6. Joaquin Zuazagoitia

Kimika eta Farmazia ikasketak zituen Joaquin Zuazagoitiak (Madril, 1892-Bilbo, 1971). Aurrekoek baino gehiago iraun zuen: 198 hilabetez eduki zuen Bilboko aginte makila, 1942 eta 1959 artean.

Arte Ederretako museoa zuzendu zuen, eta Bilboko talde intelektualei lotutako pertsona zen. El Correo Español-El Pueblo Vasco egunkariko zuzendaria izan zen, 1939an sortu zenetik 1950era bitartean. 1964tik 1971n hil zenera arte, Bizkaiko Kultura Batzordeko presidentea ere izan zen.

7. Lorenzo Hurtado de Saratxo

Enpresa mundutik etorri zen hurrengoa ere: Lorenzo Hurtado de Saratxo (Bilbo, 1889-Getxo, 1984). Izan ere, 1929an Resinera Bilbaina enpresako kontseilari izendatu zuten. Ostean, Firestoneko eta El Pueblo Vasco-ko eta Diario Vasco-ko kontseilaria ere izan zen. Gerra bukatu ostean, Informaciones egunkariaren arduradun nagusia izan zen. 1959an iritsi zen udalera, eta 54 hilabete iraun zuen. Ideologia liberalekoa ze; tokiko administrazioaren legea ez zuen ontzat jo, eta dimisioa eman zuen. 1967ko otsailean, haren izena ipini zioten Begoñako tunelen eta Ibarsusiko bidegurutzearen artean zegoen kaleari.

8. Javier Ibarra

Falangearen sortzaileetako bat izan zen Javier Ibarra (Bilbo, 1913-Getxo, 1977). 67 hilabetez izan zen alkate, 1963tik 1969ra bitartean. 1936ko estatu kolpearen egileetako bat izan zen Bizkaian. Besteak beste, Banco de Vizcaya, Iberduero, Babcok Wilcox eta Constructora Estraunzaren zuzendaria izan zen. 1947an, Bizkaiko Diputazioko presidente izendatu zuten. ETA politiko-militarrak hil zuen, 1977an, Negurin (Getxo).

Madrilgo Informaciones arratsaldeko egunkariaren administrazio kontseiluko presidentea izan zen. Donostian, Diario Vascoren kontseilari ordezkari ibili zen, eta, Bilbon, El Correo Español-El Pueblo Vasco egunkariko kontseiluko presidentea zen.

9. Pilar Careaga

Francoren diktaduran alkate kargura iritsi zen lehenengo emakumea izan zen Pilar Careaga (Madril, 1908-Madril, 1993). Vista Alegreko zezen plazan frankismoaren etsaitzat jotako atxilotuak preso hartzeko baimena eman zuen 1973an. 400 gizon-emakumetik gora ziren, salbuespen egoerak eraginda. Nazioarteko prentsak eman zuen egoera haren berri, eta eskandalutzat jo zen.

10. Jose Luis Berasategi

Franco hil aurretxoan aukeratu zuten alkate Jose Luis Berasategi (Bilbo, 1920-Bilbo, 1990). 45 hilabetez izan zen alkate, 1975etik 1979ra bitartean. Bilboko Udal Aurrezki Kutxako hainbat kontseilarik babestu zuen haren izendapena. Irakaslea izan zen Bilboko Merkataritza Ikasketen Goi Eskolan. Diktadura bukatu osteko lehenengo hauteskundeetan EAJko Jon Castañares aukeratu zuten bilbotarrek alkate. Orduan, kargua utzita, bizitza publikotik aldendu zen Berasategi. 1982an, Bilboko Enpresa Ikasketen Unibertsitate Eskolako zuzendari izendatu zuten.

Lehiaketa

Gorliz

Txakurrak eta jabeak batera lehian jarriko dituzte domekan Gorlizko kaleetan, Bizkaiko II. Txakur Krosa jokatuko baita han. Udalak antolatu du proba, Bizkaiko Neguko Kirolen Federazioaren laguntzarekin.

Sei kilometro eta erdiko ibilbidea egin beharko dute lasterketan parte hartzen dutenek. Horietatik, bost kilometro eta 700 metro lur, belar eta harea gainean izango dira; gainerakoak, asfalto gainean.

Hainbat mailatan banatuta egongo da. Federatutako probari dagokionez, emakumeak eta gizonezkoak bereizita lehiatuko dira. Lehiakideak adinaren arabera banatuko dituzte: junior —14 urtetik 16ra bitartekoak—, senior —17tik 39ra artekoak—, master 40 —40tik 49 urtera bitartekoak— eta master 50 —50 urte edo gehiagokoak—. Herri krosean, berriz, emakumeak eta gizonezkoak elkarrekin lehiatuko dira, eta ez dituzte banatuko adinaren arabera.

Sariei dagokienez, hauek jasoko dute garaikurra federatutako proban: senior, master 40 eta master 50 mailetan lehenengo, bigarren eta hirugarren sailkatzen direnek; junior mailari dagokionez, lehenengo sailkatuari baino ez diote emango saria. Berdin gertatuko da herri lasterketan: lehenengo emakumeak eta lehenengo gizonak baino ez dute jasoko garaikurra.

Txakur krosean parte hartzeko, beharrezkoa da izena ematea. Aurreko egunetan izena eman ez dutenak garaiz dabiltza oraindik; izan ere, lasterketa hasi baino ordubete lehenagora arte izango dute horretarako aukera, 10:00etara arte, hain zuzen. 25 euro ordaindu beharko dituzte parte hartzeko, eta dortsalak egunean bertan banatuko dituzte, 09:00etatik 10:30era.

Hasiera, 11:00etan

11:00etan hasiko da, beraz, lehiaketa, Urezarantza kiroldegian. Hala ere, antolatzaileek argi utzi dute parte hartuko duten txakurrek osasun onean egon behar dutela; hain zuzen, albaitari batek kontrola egingo die. Animaliek nahitaezko txertoak hartuta dauzkatela justifikatu beharko dute jabeek. Horrez gain, lehiatzen diren txakurrek gutxienez urtebete izan beharko dute.