Egun elkarri lotuta dantzatzea ohikoa izan arren, joan den mendean debekatuta egon zen Euskal Herrian. Bizkaian, Zeanuri izan zen azken herrietakoa debekua kentzen.

Bilboko Zinemakumeak Gara jaialdia egingo dute urriaren 31ra arte. Alice Guy zinemagilea oroituko dute, eta hainbat zinemalditan egondako lanak eskainiko.

Sarea Sound System Ugaoko musikazaleen elkarteak hogei urte bete ditu aurten. Herria musikaz blaitzen du elkarteak, hilabetero antolatzen dituzte kontzertuak Jane jauregiko ganbaran. Hortik pasatu dira, besteak beste, Gorka Urbizu eta Anari. Urteurrena ospatzeko jaialdia egingo dute datorren astean..

Loraldia Plazarik Plaza jaialdia egingo dute Zaratamon eta Arrigorriagan, bigarrenez bAskotariko estiloak batuko dituzte. Adibidez, Rafa Rueda eta Igor Elortza egongo dira.

Bizkaiko Bertsolari Txapelketa igandean hasiko da, Mungian. Abenduaren 16an amaituko da, Bilboko finalarekin. Guztira, sei kanporaketa, hiru finalaurreko eta finala izango dira. 36 bertsolari lehiatuko dira herrialdeko txapela lortzeko.

Getxoko Komiki Azoka egingo dute gaur hasi eta etzi arte. Berrogei postu egongo dira, eta askotariko gaiez arituko dira hitzaldietan eta tailerretan.

Sare Antifaxistak Liburu, Fanzine eta Material Politikoaren V. Azoka egingo du, Portugaleten. Gaur emango diote hasiera ekinbideari, eta igandera arte iraungo du.

Sopelako Udalak hamargarren urtez antolatuko du asteburu honetan Sopela Kosta Fest jaialdia, herriko elkarteekin elkarlanean. Hainbat ibilaldi, tailer, erakusketa eta lehiaketa antolatu dituzte. Talde hauen kontzertuak izango dira: Stay Homas, O'Funkillo, Olaia Inziarte, Ezpalak, Ibil Bedi, Cecilia Payne, Pasadena, Rudiger eta Lorelei Green

'Lurrak zerua izan nahi du' erakusketa ondu du Jasone Miranda-Bilbao artistak, Arrietan. Gurasoen etxeko lursailean hainbat artistak egindako obrak egongo dira ikusgai bihar eta etzi. Hamabost metro luze den plataforma batean egokitu ditu lanak. Esan du batzuk inguruarekin elkarrizketan ari direla, baina gainontzekoak, ez.