Gaur hasi eta domekara bitartean, deriotarrek San Isidro jaiak ospatuko dituzte. 19:00etatik aurrera, Herria martxan, martxa herrian ekitaldiaren barruan biribilketa egin ostean, herriko plazan hainbat jarduera egingo dituzte. 20:30ean, pregoia eta traka egin, eta txitxiburruntziarekin hasiko dituzte jaien ospakizunak. Gauean bost musika talderen kontzertuak egongo dira txosnetan.

Bihar goizean sukalkia, eskulangintza azoka eta umeentzako jolasak egingo dituzte. Gauean Mental Eraser, Hesian eta Vendetta taldeen eta DJ Bullen emanaldiak izango dira. Etzi, elikadura azoka eta eskualdeko dantza taldeen alardea egingo dituzte goizean. Arratsaldean, ostera, pelota eta briska txapelketak izango dira. Baita txitxarrilloa eta salsa dantzen erakustaldiak ere.

Eguaztena, San Isidro eguna, haur eta gaztetxoentzako ekintzez beterik dago. 11:30etik 13:00etara eta 16:00etatik 19:00etara haientzako jarduerak eta marrazki lehiaketa izango dira. Bestalde, urtero legez, San Isidro elizan meza egongo da goizean. Jaiei amaiera emateko txokolate jana egingo dute arratsaldean.

Txorierrin Larrabetzuk ere ospatuko du baserritarren eguna. Goizean herriko ekoizleen produktuak salerosteko azoka egongo da plazan. 11:00etatik 15:00etara egongo dira erakusmahaiak zabalik. 12:00etan, umeentzako jolasak izango dira. 12:30ean, berriz, baserritarrek eurentzat prestatutako luntxa izango dute, trikitilariek lagunduta. 14:30ean, gainera, bazkaltzeko elkartuko dira. Bazkalostean briska eta mus txapelketak izango dituzte eta 17:00etan emakumezkoen pala txapelketa jokatuko da.

Arrietan, eguazten goizean meza eta baserritarrentzako omenaldia eta hamaiketakoa izango dituzte. 19:00etan, berriz, hiru uztarriren arteko idi probak izango dira probalekuan. Lemoizen goizean egingo diete omenaldia herriko baserritarrei, meza ostean.

Zeanuriko feria

Zeanurin egun handia izaten da San Isidrorena. Abere, Artisau eta Nekazaritza Produktuen 32. Azoka egingo dute, urteroko legean, eguaztenean. 10:00etan zabalduko dute azoka. Besteak beste, ardiak eraisteko zein gaztagintza erakustaldiak, ardi mozketa lehiaketa eta artxo errearen dastaketa egingo dituzte. 11:00etan, meza izango da, San Isidro elizan. 12:00etan, Arrikibar dantza taldekoen emanaldia eta azokako sari banaketa izango dira, plazan. Arratsaldean, idi probak egingo dituzte probalekuan: Zeanuriko Mintegi baserriko idiak, Mungiako Iñaki Lopategirenak eta Gatikako Jon Ander Bilbaorenak lehiatuko dira.

Zapatuan bukatuko dira jaiak , segalarien arteko lehiarekin, triki poteoarekin eta bertso afariarekin. Andoni Egaña eta Sebastian Lizaso ibiliko dira kantuan.

SANISIDROAK

Zer. Baserritarren egunaren inguruko ospakizunak.

Noiz. Asteburuan eta eguaztenean.

Non. Derio, Larrabetzu, Zeanuri, Arrieta, Lemoiz...

Durangaldeko Anboto aldizkaria argitaratu zutenetik 10 urte bete ziren iaz. Gaur, berriz, 500. zenbakia atera dute. "Urteurrena konturatu barik heldu zitzaigun, eta ez genuen jairik antolatzeko astirik izan. Orduan pentsatu genuen 500. zenbakia argita...

Bilboko Udaleko Osasun eta Kontsumo Sailak eta Slow Food Bilbo-Bizkaia Elkarteak II. Amama Eguna antolatuko dute biharko. Errezeta onena hautatzeko lehiaketa izango da ardatza. Parte hartu nahi duten aitona-amona guztiek bilobekin joan beharko dute Er...

Zornotzako Elizetan jaialdia bihar hasiko da. 14. ekitaldia izango du honako hau. Maiatz osoan, asteburu oro, musika klasiko kontzertuak izango dira herriko landa auzoetako baselizetan. Ganbera musikaren egitaraurik originalena da Zornotzakoa, kontzertuen agertoki bitxiagatik. Gainera, baserri ingurura halako musika gerturatzen duen bakarra da Bizkaian. Doakoak dira, eta gerturatzeko doako autobus zerbitzua jarriko du udalak erdigunetik. Nafarroa zentrotik abiatuko dira, emanaldia hasi baino ordu erdi lehenago.

Bihar hasiko dira emanaldiak, Boroa auzoan. San Pedro baselizan daukate musika zaleek hitzordua, 20:00etan. Jorge Arribasen eta Diego Galazen Feten Feten proiektua ezagutzeko aukera izango dute bertaratzen direnek. Emanaldian entzungai egongo diren doinu gehienak eurek biek konposatu dituzte. Balsak, fandangoak, boleroak, tarantelak, Europa ekialdeko erritmoak eta Gaztelako musika dira kontzertuaren osagai nagusiak.

Bigarren emanaldia datorren astean izango da, zapatuz. 20:00etan hasita Gombau hirukoteak Dudeako San Migel elizari musika jarriko dio. Carlos Benito, Carlos Galan eta Alberto Gorrotxategik, biolina, txeloa eta pianoa joko dituzte, hurrenez hurren. Hirurak nazioarteko taldeetan ibilitakoak dira, eta goi mailako zuzendarien esanetara jo izan dute sarritan. Irakasle lanak ere egin dituzte, besteak beste, AEBetan, Frantzian, Novergian eta Suitzan.

Maiatzaren 19an, berriz, 12:15etan izango da kontzertua, Bernagoitiko San Migel elizan. Luis Delgado, Cesar Carazo eta Jaime Muñozek La caracola de Ulises. Un viaje por la cultura mediterránea emanaldia eskainiko dute. Seykiloseko epitafiotik abiatuta, sefardien tradiziora arteko errepasoa egingo dute.

Maiatzaren 24an, 20:00etan, euskal doinuak izango dira Garaitaondoko San Isidro baselizan. Khantoria hirukoteak Bereterretcheren oinatzak izeneko lana taularatuko du. Bereterretcheren khantoria doinu ezagunaren jatorria ikertuko dute.

Azken emanaldia 26koa izango da. 12:15ean, Etxanoko Andra Mari elizan Bios Kamara orkestra ko Belen Fernandez, Sergio Gomez, Oihana Landa eta Eduardo Oiloki, Ana Uriarte zornotzarraren zuzendaritzapean ariko dira musika barrokoa jotzen.

TxirrindularitzaMungiaSaiatu Fundazioak, Valentin Uriona Txirrindulari elkartearekin elkarlanean, XVII. Bizkaiko Paracycling Bira antolatu du astebururako Mungian.Nazioarteko txirrindulari egokitu onenak elkartuko dira herria zeharkatzeko. Birak hiru ...

URDUÑA. 21:00etan hasiko dira Otxomaioak, txupinazoarekin. 23:00etan Izargi taldeak dantzaldia eskainiko du, eta 00:30ean Placton taldeak joko du. Bihar, goiz osoan, nekazaritza eta abeltzaintza azoka egingo da. Gauez, mendi bizikleta martxa eta gazte asanbladaren kontzertuak izango dira. Domekan, berriz, tortilla txapelketa, Ama Birjinari eskaintza, txistularien alardea eta izkingileak.

MORGA. Santa Krutz eguneko erromeria ospatuko da etzi, Bizkargi tontorrean. Morgatik, Muxikatik, Larrabetzutik zein Zornotzatik makina bat bizkaitar igoko da, jai giroaz gozatzera. Musika, bertsoa, dantza eta lagunarteko bazkariak ez dira faltako. Gai...

AREATZA. Bihar, 11:00etan abiatuko dira, Areatzako plazatik Santikurutzeko ermitara, bide zaharretik. 12:00etan meza izango dute. Ostean, trikitilariak eta askaria. 14:00etan itzuliko dira plazara. Hankapaluak izango dituzte zain.

Hau Pittu Hauk bere eguna antolatu du biharko. Egun osoko egitaraua prestatu dute. 12:00etan hasiko dira, tortilla txapelketarekin. Bakoitzak etxean egin, eta ordu horretan 7Katu gaztetxean aurkeztu beharko du. Ostean, Somera kalean, garagardo dastatz...

Sopelako AEK-k antolatuta, 20. urtez, Esaera Zaharren Txapelketa jokatuko da bihar, Non zaldarra, han atzamarra lelopean.Izena emateko epea igaro da, baina bertsoak entzunez esaera zaharrak ikasi gura dituztenek jai aparta izango dute. Lehiakideak 11:...