Barakaldo

Bizkaiko Antzerki Ikastegiak ACT Nazioarteko Sortzaile Berrien Antzerkialdia antolatu du aurten ere. Ekintza, hausnarketa eta harremanetarako guneak sortzea eta eszena artista berriak bultzatzea da ACTren helburua.

Hamargarren jaialdia da aurtengoa, eta, ohi bezala, bertako zein nazioarteko artista hasiberrien topaleku izango da. Hain zuzen ere, besteak beste, Euskal Herriko, Andaluziako, Portugalgo, Italiako, Erresuma Batuko, Herbehereetako, Suitzako eta Belgikako ordezkarien sormen lanak egongo dira ikusgai.

Astelehenean hasi bazen ere, bihar arte hamaika emanaldiz gozatzeko eskaintza egon da Barakaldo antzokian eta Bilboko Kafe Antzokian, Itsas Museoan eta Guggenheimgo Zero espazioan. "Gainera, aurten eszena garaikidea hurbilduko diogu ikusleari ohikoak ez diren agertokietan", esan dute antolatzaileek.

Hamaika lan labur lehian

Erakustaldiez gain, sortzaile berriek sortu, antzeztu eta zuzendutako hamaika lan labur lehiatuko dira jaialdian. Irabazleak 2.000 euroko saria eta Bizkaiko Antzerki Ikastegiaren Bilboko egoitzan hilabeteko egonaldi artistikoa egiteko laguntza jasoko ditu.

Gaur, Barakaldoko antzokian eta Bilboko Kafe Antzokian hainbat saio egingo dituzte. Lehenengoan, 19:00etan, Unidentititled eta A Solas lanen emanaldiak izango dira. Bigarrenean, Gaan, Hier un eta That's It izango dira ikusgai 22:00etan hasita.

Bihar, 18:00etan, Bilboko Itsas Museoan Colección no permanente eta Seven Fall lanak antzeztuko dituzte. Kafe Antzokian, jaialdiaren amaiera ekitaldian, lehiaketaren sari banaketaren aurretik, iazko irabazle Ana Mendes portugaldarrak Dance Play ikuskizuna eskainiko du (22:00etan). Gero, sariak banatu ostean, Homo Ridens Bilbao saioarekin datorren urtera arte agurtuko da jaialdia.

ACT JAIALDIA

Zer. Hamargarren Nazioarteko Sortzaile Berrien Antzerkialdia antolatu du BAIk.

Non. Barakaldo antzokian, Guggenheimeko Zero espazioan, Bilboko Itsas Museoan eta Kafe Antzokian.

Noiz. Gaur eta bihar.

Bermeo

Kontserba industriaren erakusleiho bihurtuz, Bermeok XIX. Arrain Azoka egingo du gaurtik domekara arte. Ekintza horren bidez, sasoiko arrainak jateak duen garrantzia azpimarratuko dute.

Idurre Bideguren Bermeoko alkateak azaldu duenez, sasoiko arrainak jatearen abantailak asko dira: "Euskal kostaldeko arrantzaleen onurarako da, arrainen bizitza zikloa zaintzen du eta gure elikadura ere hobetzen du".

Aurten, hogei erakustoki egongo dira. Horietan, askotariko produktuak dastatzeko zein erosteko aukera egongo da. Horrez gain, jarduerez beteriko egitarau zabala prestatu dute. Gaur, esate baterako, 19:00etan, Jose Maria Ferarios Azti-Teknaliako Arrantza eta Itsas Teknologia Saileko teknikariaren Dakarreko kanpainak liburua aurkeztuko dute.

Bestalde, bihar, 11:30ean, argazki rallya eta Latie emongotsut izeneko Bermeoko kontserba enpresen inkesta-jolasa egingo dira. Jolas horren bitartez, Bermeoko kontserbak bultzatu nahi dituzte. Horretarako, bisitariei kontserba bat dastatzea proposatuko zaie, eta burura datorkien hiru hitz esateko eskatuko zaie. Ondoren, kontserba lata bat oparituko diete.

Azokak iraun bitartean, Urpeko zinemaren zikloa, dokumentalak, pintxo lehiaketa, erakusketak, marrazki txapelketa, umeentzako ekintzak, fanfarreak, dantzak, danborradak, txistulariak, trikitilariak eta erraldoiak izango dira, besteak beste.

Arraina protagonista nagusia izango denez, karpa jatetxe bat ere ipiniko dute, eta, alboan, arraindegi bat egongo da. Bertan, arrain freskoa eskuratu ahal izango da, etxera eramateko eta jatetxean prestatzeko.

Txangoak ere antolatuko dituzte astebururako; hala, nagusiek eta umeek Hegaluze itsasontzian Ogoño parera joateko aukera izango dute.

XIX. ARRAIN AZOKA

Noiz. Gaurtik domekara arte egongo da zabalik, goizez eta arratsaldez.

Non. Bermeon egingo dute. Kulturarekin harremana duten ekintza ugari Nestor Basterretxea aretoan izango dira.