Duela ehun milioi bat urte arte, gaur egun Erandio dagoen inguruan itsaspeko sumendi bat zegoen. Egun, Axpe mendia dago pare hartan, eta baditu orduko aztarnak. Kike Prada erandiotarrak, EHUko hainbat geologok lagunduta, Axpe mendiaren sumendi ibilbid...

Domeka honetan egingo dute Ugaoko herri krosa, 11:00etan hasita. Urtero legez, hainbat lagun elkartuko dira parte hartzera. Hori aprobetxatuta, herriko neska bati laguntzeko dirua biltzeko kanpaina bat martxan jarriko dute. Udane Eiros dauka izena, 2 ...

Eskrima historikoa pasioz bizi du Daniel Albak (Bilbo, 1981). Aurreko mendeetako militar zein zibilek erasorako edo babeserako erabiltzen zituzten ezpatekin borrokatzea du afizio. Zaletasuna den arren, Eugenio Garciarekin batera eskrima historikoko es...

Zaratamoko Gure Herria auzokideen plataformak eta udalak neurri sorta bat eratu dute garapen iraunkortasuna eta herritarren parte hartzea sustatzeko. Plan horren helburua da eskualdeko ekonomia, gizarte eta ingurumen erronkei aurre egitea.Egitasmo hau...

Ezkerraldeko langile borroken iragana gogora ekarriko du Sestaoko Txirbilenea kulturguneak. 1990eko hamarkadan, enpleguaren aldeko hamaika borroka egin zituzten langileek, baina eskualdeko desindustrializazio prozesuak bertako lantegiak desagerrarazi ...

Euskal Herriko Haur Kantari Txapelketa martxan da. Herrialdeko kanporaketa batzuk jokatu dituzte dagoeneko, eta Bizkaikoak hilabete honetan egingo dituzte. 6 urtetik 15 urte bitarteko ume eta gaztetxoen topagune izan ohi da bi urterik behin lehiaketa ...

Santutxuko Bertso Eskolak eta Bilboko Udaleko Kultura eta Hezkuntza Sailak antolatuta, bihar egingo dute udaberriko lehen bertso saioa. Miren Amuriza, Jon Maia, Unai Iturriaga eta Julio Soto bertsolariak arituko dira 13:00etan, Bilboko Santutxu auzoko Karmelo plazan. Lau saio prestatu dituzte; hiru zapatu eguerdietan izango dira; azkena, berriz, eguen arratsaldean.

Euskal Herri osoko belaunaldi askotako bertsolariak izango dira Santutxun hilabete honetan, auzoa bertsoz girotzeko asmoz. Aurtengoa 29. aldia da, eta, Bilboko bertsozaleak ez ezik, Bizkaiko eta Euskal Herri osokoak ere erakartzen ditu.

Datorren asteko zapatuan Amets Arzallus, Odei Barroso eta Uxue Alberdi arituko dira bertsotan, Arkaitz Estiballes egungo Bizkaiko txapeldunarekin batera. 13:00etan hasiko da saioa.

Leku eta ordu berean izango da hilaren 18ko saioa ere. Egun horretan Andoni Egañaren, Fredi Paiaren, Jone Uriaren eta Alaia Martinen bertsoez gozatuko dute zaleek. Ohi bezala, bertso saio guztiak doakoak izango dira.

'Bat-batean'

Udaberri giroko bertso saio horien azken ekitaldia maiatzaren 23an egingo dute, eguenez. 19:30ean hasita, Bat-batean izeneko munduko musiken inguruko saioa aurkeztuko dute Etxahun Lekue eta Oskar Estanga bertsolariek.

Ezohiko saioa izango da, bertsoak munduko hainbat kulturekin batuko baitituzte. Besteak beste, reggae, samba, sona eta tango doinuak bertsoekin uztartuko dituzte biek. Bat-batean Estangaren azken proiektua da, eta Euskal Herrian barrena herriz herri ari dira aurkezten, leku bakoitzean bertsolari banarekin.

Bizkaiko hiriburuan euskal kultura eta hizkuntza sustatzeaz gain, Udaberriko bertso saioak programa euskaltzaleen arteko topaleku bilakatu nahi dute antolatzaileek. Horrekin batera, Santutxuko Bertso Eskolak Bizkaiko hiriburuan bertsozaletasuna zabaltzeko egiten duen lanari aparteko bultzada eman gura diote.

Etxeko leihotik begiratuta, Santurtziko portua ikusten zuen Miguel Angel Gomez Solaetxek (Santurtzi, 1961). Txikitatik miretsi ditu itsasontziak, eta oso gogoko zuen nasatik nola sartzen eta irteten ziren ikustea. Urteak aurrera egin ahala, zaletasuna ogibide bihurtu zuen: 1994az geroztik, irakasle lanetan dabil Portugaleteko Nautika eta Itsasontzi-makineriako Goi Eskola Teknikoan. Gaur egun, Itsasketaren Zientzia eta Teknikak, Ontzi Makinak eta Ontzigintza Saileko zuzendaria da.

"Ontziak ikustearen ikusteaz hasi nintzen mundu horrekin zaletzen". Portuari begira hazi zen, eta, haren iritziz, "lehen, gaur egun baino askoz mugimendu handiagoa ikusten zen".

Itsasontzien funtzionamendua ezagutzeko jakinguraz, goi mailako ikasketak egin zituen. Baina, portua aldatu den moduan, unibertsitate ikasketak ere aldatu direla dio. Gaur egun, Itsas Ingeniaritzako gradua eta Ingeniaritza Nautiko eta Itsas Garraio gradua eskaintzen dituzte Portugaleteko eskolan. Gomezek azaldu duenez, Espainiako Hezkuntza eta Zientzia Ministerioak helarazten dizkien parametroei heltzen diete. Horretaz gain, Nazioarteko Itsas Erakundeak agintzen dituen ezagutzak ere kontuan hartzen dituzte. "Alde teorikoa gainditzen dutenean, nabigatzera irten daitezke ikasleak".

Titulu akademikoaz gain, ezagutza praktikoak behar dituzte lanbidean aritzeko. "Itsasontzi batean nola ibili behar diren erakusten saiatzen gara; makina nagusienak eta laguntzaileak nola erabili behar dituzten, edo mantentze eta konpontze lanak nola egin behar dituzten, adibidez".

Azken kurtsoetan, ahalik eta ezagutza sakonenak transmititzen saiatzen da Gomez. "Eskolan ikasitakoa nabigazio egunekin osatzen da". Merkataritza ontzidiko ofizial batek 30 kreditu lortu behar ditu derrigorrezko nabigatze praktiken bidez. Itsas Ingeniaritzako ikasleek sei hilabete igaro behar dituzte nabigatzen. Ingeniaritza Nautikoa eta Itsas Garraioa ikasten ari direnek bederatzi hilabeteko nabigazioa egin behar dute. 3. maila gaindituta egin ditzakete praktikak. Hala ere, kasu bereziak daudela dio irakasleak. "Duela gutxi, neska batek praktikak hasi ditu, nahiz eta 3. maila bukatu ez duen. Ikasgai batzuk baliozkotu dizkiote eta, gainera, nahiko ikasle ona da". Azkenaldian emakumezkoen presentzia nabarmen handitu da sektorean. "Nik ikasketak egin nituenean, emakume bakarra zegoen", azaldu du. "Gaur egun, gizon gehiago daude, baina Itsas Ingeniaritzan haziz doa andreen kopurua".

Praktikak lortzea lan zaila da denentzat oraindik ere. "1985ean egin nituen nik, eta lau hilabete behar izan nituen ontziratze bat lortzeko. Bederatzi hilabete egon nintzen lehorreratu gabe". Prestakuntza praktikarekin lortzen dela dio. "Ni Petronorrek itsasontziak zitueneko garaian ibili nintzen praktiketan, Muñatones itsasontzian". Garai hartatik "oroitzapen politak" ditu. "Denetarik egiten genuen, ofizialarekin zaintzaldiak egiten genituen, eta mekanikariei edo argiketariei ere laguntzen genien. Helburua ahalik eta gehien ikastea zen".

Eskakizunak behera doaz

Gomezen ustez, asko zatitzen dira ikasgaiak gaur egungo ikasketa planean, eta horrek "ezagutzak barneratzea zailtzen du". "Ahalik eta estaldura handiena eman nahi diegu ikasketei, oso denbora gutxian; eskakizunak behera doaz". Ikasgai asko hautazkoak dira, eta lau hilabeteko iraupena dute. "Nire garaian, derrigorrezkoak ziren, eta iraupena luzeagoa zuten". Horretaz gain, dio ikasleak bere kontura, Boloniako ereduari helduz, prestakuntza osatu behar duela. "Irakaskuntza lehen trinkoa zen; orain, berriz, berniz bat da".

Ontzi gutxi, ikasle asko

"Gero eta ikasle gehiago daude, baina ontzien kopurua behera doa", dio Gomezek. Gainera, itsasontzi enpresak ere gutxitzen doazela ohartarazi du. Horren ondorioz, ikasleek atzerrira jo behar izaten dute lan bila. "Beste eskifaia batzuekin lehian aritu behar dute; batez ere, Europako ekialdeko, Peruko, Ekuadorko, Hondurasko edo Kubakoekin, baina ez dute beste erremediorik".

Gomezek dioenez, zailena sektorean hastea da, abiatzea; gero, jarraitzea ez da hain konplexua. "Ontzijabeei beraien balioa erakusten badiete, oro har, kontratatu ohi dituzte ikasleak, eta ikasleak beraiek izaten dira gerora lan hobeago bat aurkitu eta lanpostua uzten dutenak".

Nahiz eta arbel baten aurrean hitz egin edo bulego batetik aritu, inoiz ez dio utzi itsasoa begiratzeari. Irakaslea ikerkuntza lanetan dabil gaur egun, eta itsas sektoreko hainbat enpresarekin harremanetan dabil, askotariko proiektutan parte hartu edo garatzeko. "Biomedikuntza eta ingeniaritza lotzen dituen arloan nabil lanean, baina beti egon naiz itsasontzi sektorearekin lotuta".

Beste alde batetik, iraunkortasuna bultzatu nahian, ontzietan eguzki energia erabiltzeko proiektua ipini gura du martxan Gomezek. "Itsasontzi ekologiko bat garatzeko eskabidea egin dugu; nabigazio berdea sustatzea gustatuko litzaiguke, baina urte bukaerara arte ez digute erantzunik emango".

ARRANKUDIAGA. Udaltalde Nerbioi-Ibaizabalek deituta, bihar Nerbioi ibaiaren ertzetan erne diren landare exotikoak kenduko dituzte. 09:30ean elkartuko dira, Arrankudiagako Arbide auzoan. Besteak beste, artemisia verlotium, cortaderia selloana, arundo d...

LEMOA. Lemoako liburutegiak Espainiako Kultur Ministerioak ematen duen Maria Moliner saria jaso du, 15. ekitaldian. 50.000 biztanle baino gutxiago dituzten udalerrietan irakurtzeko zaletasuna bultzatzeko ekintzarik onenak saritzen ditu lehiaketak. Lem...