Adopzio gurasoen eta umearen urteen arteko gehieneko aldea. »

Adopziora jotzen duten gurasoen eta adoptatuko duten seme edo alabaren artean, gehienez, 42 urteren aldea egon daiteke. Era berean, gutxienez, 14 urteren aldea egon behar du batzuen eta besteen artean.

Itsasoak gomutak eroan ez ditzan »

Sirena hotsak, itsasotik datorrenaz ohartarazteko, Lemoizko Armintzako portuan. Beldurrik ez da, baina. Bai, ordea, emozioz betetako ekitaldia. Oroitzapenerako tartea. 77 urte igaro dira Matxitxakoko gudua handik gertu gertatu zenetik. Kandelaria Kult…

“Emakumeok ez badugu gure historia kontatzen, ez du inork egingo” »

Emakumeen Dokumentazio Zentroko langilea da Marijo Sola (Bilbo, 1961). Baina lanbide izatetik harago, militantzia ere bada harena. Beste lau andrerekin batera, dokumentazioa bildu, eta emakumeen ondarea gorde eta zabaltzen dute. “Ondarea gordetzea fun…

Portugaleteko alde zaharrerako plana gelditzeko eskatu dute bizilagunek »

Txistuka protesta egin zuten joan den domekan Portugaleteko alde zaharreko hainbat bizilagunek, udalari auzo horretarako onartu duen plan berezia geldiaraz dezala eskatzeko. Portugalete Zaharra auzo elkarteak deituta zegoen protesta. Plana gelditu zioen pankartaren atzean herritarrek “kokoteraino gaude!” aldarrikatu zutela azaldu du elkarteko kide Iñaki Aranak.

Oraingoz, hala ere, “zail” dute euren helburuak betetzea. Izan ere, joan den asteko eguenean atzera bota zuen osoko bilkurak plana geldiarazteko mozioa, PSE-EEren eta PPren botoekin.

Plana osatzeko orduan herritarrek ez dutela parte hartu salatu dute alde zaharreko bizilagunek. “Surposa enpresak lehiaketara atera zuen hirigintza plana eta arkitektura kontsultore enpresa batek irabazi zuen”, azaldu du Aranak. “Zirriborroa egiten hasi zen. Auzo elkarteekin, dendariekin, tabernariekin eta alderdi politikoekin elkartu ziren, bakoitzak ekarpenak egin zitzan. Hala ere, ekarpenok oso azalekoak ziren”, salatu du.

Zirriborroa bukatu zutenean, hasieran, alderdi politikoei soilik aurkeztu zietela ekarri du gogora. “Guk ez genekien ezer. Halako batean Bilduko ordezkariek guregana jo zuten, plana zeukatela eta ezohikoak ziren hainbat gauza ikusi zituztela ohartarazteko. Besteak beste, Renfeko geltokiaren ondoan dauden etxebizitzak aurreko plan berezian hiri antolamendutik kanpo ageri baziren, plan berriak dagoeneko ez dio halakorik; bai, ordea, ez datozela bat antolamenduarekin. Eta, legeari erreparatuz gero, bata zein bestea antzeko gauza dira”. Inguru horretan 27 etxebizitza sartzen zirela konturatu ziren plana aztertzen hasitakoan. “Esaterako, Bermeon gertatutako sutea hemen gertatuko balitz, eragina izango luke” irizpide horrek. “Eraikinek bost solairu badituzte eta berriz eraiki beharko balira, lau soilik altxatu ahalko lirateke. Bosgarreneko familia kalera joango litzateke eta gainerako bizilagunek erosi egin beharko liokete orubearen zati bat. Buruhauste bat izango litzateke”, esan du. “Guretzako hori larria da. Hala ere, badira planean beste hainbat gauza ondo iruditzen ez zaizkigunak”, aitortu du. Portugaleteko Udalak esan du hiri antolamendutik kanpo ez dela “etxebizitza bakar bat ere” geratuko eta “sortutako alarma” gaitzetsi dute.

Alde zaharreko “bizilagun gehienak planaren aurka” daudela dio Aranak. Egunek aurrera egin ahala, gainera, ikusi dute “jendea gehituz doala” eta eurekin bat datorrela. “Beraz, ez da gure kontua edo lau auzokiderena soilik, auzo oso batena da”.

Konponbidea, alegazioak

Udalak erabakitakoaren arabera, auzokideek alegazioak aurkeztea beste aukerarik ez dute. Apirilaren 1era arteko epea daukate horretarako. “Auzokide bakoitzaren alegazioak kontuan hartuko dituztela esan dute. Planaren zirriborroa, baina, aurrera doa. Beraz, gauzatxoren bat edo beste aldatzeko aukera besterik ez dugu izango”, salatu du Aranak. “Gauza mordoa ikusten ditugu aldatu beharrekoak. Ulertzen dugu udal gobernuarentzat plan hau gelditzea eta berriz hasi beharra porrot handia izango litzatekeela. Hala ere, eskatzen duguna da gelditzea, auzokideon proposamenak onartzea eta gauzak aldatzeko aukera egotea”.

Auzotarrek, dena den, badute alegazioak aurkezteko asmoa. Ahal duten heinean, behintzat. “Dagoeneko hasi gara, baina itsaso handia da hau guretzat”, aitortu du Aranak. Abokatu zein kabineteen laguntza behar dute. Izan ere, forma akatsak eta antzekoak saihestu gura dituzte. “Legeari jarraikiz, gauzak ondo egin behar ditugu, alegazioak atzera botatzeko era horretako aitzakiarik egon ez dadin”.

Abokatuak kontratatzeko diru asko behar dutela ere ekarri du gogora. “Komunitate bakoitzeko 4.000 euro eskatzen ari dira. Hori dirutza da”. Beraz, udalak banakako alegazioak eskatu dituen arren, elkarteko kideek auzotarrei jakinarazi diete denek baterakoa aurkezteko alegazioak egin gura dituztela, eta, hala gura duten guztiek, sinatzeko aukera izango dutela.

Alde zaharrerako planaren garrantziaz egin du berba Aranak. “Aurreko planak 24 urte dauzka. Hau ondo egiten bada, erabilgarria izan daiteke. Beste hogeitik gora urte gaizki egindako plan batekin jarraitzeak, ordea, ez du merezi”, iritzi dio. Alde zaharrak “beharrizan handiak” dituela uste du. Beraz, garrantzitsua deritzo “gauzak ondo egiteari”. Udalak, gainera, euren auzoarekiko “utzikeriaz” jokatzen duela salatu du.

Hala ere, oztopoak oztopo, “oso animatuta” daudela eta “jendeak oso jarrera ona” duela deritzo Aranak. “Beraz, lanean jarraitzeko asmoa dugu, plan hau gelditu arte”. Informatzen jarraituko dutela iragarri zuten protestaren ostean. “Orain herritarren esku dago martxan dugun borroka honek aurrera egitea”.

Bildu, goi kargudunen ezohiko sarien kontra »

BILBO. Foru aldundiko goi kargudunen ezohiko ordainsariak ezabatzeko eskatu du Bilduk. Ahaldun nagusia, diputatuak eta zuzendari nagusiak Espainiako Gizarte Segurantzaren erregimen orokorrean txertatzea proposatu du koalizioak. Kargua uztean hilabetek…

Zornotzara iritsiko da ‘Anboto’ aldizkaria »

Euskara hutsez idatzitako aldizkaria euren etxeetan jaso ahal izango dute zornotzarrek martxotik aurrera. Izan ere, Durangaldeko Anboto aldizkariak udalarekin urtebeteko hitzarmena sinatu du, aldizkaria herrian banatzen hasteko. Zornotzako herritarrek harpidetza bete besterik ez dute egin behar aldizkaria euren etxean jaso ahal izateko.

2001ean sortu zen Anboto, eskualdeko zein tokian tokiko informazioa euskaraz zabaltzeko asmoz. Orain arte, Abadiño, Atxondo, Berriz, Durango, Elorrio, Garai, Iurreta, Izurtza, Mallabia, Mañaria, Otxandio eta Zaldibarren banatu da, eta, hilabete honetatik aurrera, Zornotza gehituko zaio zerrenda horri. Astero, 10.000 ale baino gehiago banatzen dituzte.

Aspaldi sortu zen Zornotzan euskarazko aldizkaria banatzeko nahia. Duela urtebete, euskal hedabideen erronka, helburu eta kezken inguruan hitz egiteko antolatu zen mahai inguruan piztu zen garra. BERRIA egunkariko Juan Mari Larrarte, Argia aldizkariko Xabier Letona, Tokikomeko Mikel Irizar eta Anboto aldizkariko ordezkariak izan ziren bertan. “Mahai ingurua bukatuta, Zornotzan euskara hutsezko hedabiderik ez egotearen kezka piztu zitzaien hainbat herritarri”. Hala adierazi du Jone Guenetxea Anboto aldizkariko zuzendariak. Eta kezka ez zen bere horretan geratu. Anboto aldizkaria Zornotzara heltzeko sinadura kanpaina abiatu zuen herritar talde batek. Gerora, udalean aurkeztu zituzten bildutako guztiak.

“Hor hasi ziren Anboto-ren, Zornotzako Udalaren eta kezka zeukaten herritar taldearen arteko hartu-emanak”, adierazi du Guenetxeak. Urtebeteko harremanaren ondoren iritsi da emaitza: aldizkaria Zornotzan banatzeko ituna sinatu dute udalarekin. “Hasiera batetik, oso borondate ona izan du Zornotzako Udalak”, aitortu du Anboto aldizkariko kideak. Eguaztenean aldizkaria aurkezteko bilera egin zuten herriko eragile eta elkarteekin. Guenetxeak adierazi du askok aldizkaria ezagutzen bazuten arren guztiei aurkeztea beharrezkoa ikusi dutela: “Beharrezkotzat hartu dugu Zornotzako eragileei proiektua aurkeztu, informazioa trukatzeko bideak jarri eta Anboto-ko kontaktua aurkeztea”.

Harpidetza kanpaina

Aldizkaria etxean jasotzeko harpidetza kanpaina abiatuko dute orain. Horretarako, Guenetxeak adierazi du buzoiz buzoi informazioa banatzen hastea pentsatu dutela: “Doakoa izan arren, harpidetza egitea beharrezkoa da”. Lehen urtean 600 harpidetza inguru egitea aurreikusi dute. Baina, nabarmendu du, kopuru horrek ez duela irakurle kopurua zehazten. “Harpidetza kopuruak zenbat etxetan sartzen den adierazten du soilik”.

Etxeetatik egiten den banaketaz gain, beharrezkoa ikusten dute aldizkaria gehiago zabaltzea: “Zelaieta zentroan eta herritarrak biltzen diren beste hainbat tokitan Anboto zabaltzea garrantzitsua da”, adierazi du aldizkariko zuzendariak. Durangaldeko gainontzeko herrietan ere ari dira horrela zabaltzen. “Horrelako tokietan jartzeak duen eragina aztertzen ari gara”. Zornotzan ere, banaketa egiterakoan era bi horiek uztartuko dituztela aurreikusten dute. Urtebeteko ibilbidea bukatutakoan, Zornotzan lortu duten hedapenaren balantzea egingo dute.

54 »

Ikasketak euskaraz egiten dituztenen zenbatekoa. Unibertsitatekoak ez diren ikasketak euskaraz egiten dituztenak %54 dira Bizkaian; Bilboaldean, %45; Arratian eta Hego Uriben, %41; Lea-Artibain, %97; Uriben, %96; Busturialdean, %88.

“Gutzienen hizkuntza” »

Badu, bada. Euskara mundu eleanitzean erakusketa iritsi da Bilboko Alondegira. Donostiako San Telmon izan zen lehenengo, ondoren Baionan eta Gasteizen, eta maiatzaren lau arte izango da Bilbon ikusgai. Agintariek erakusketa aurkeztu zuten, goizean prentsa aurrean eta arratsaldez gonbidapenekin. Goizean goiz, erakusketaren nondik norakoak ezagutzeko asmoz prentsaurrekora bildu ginen, eta hara gure sorpresa, Bilboko Udaleko oharrak horrela zioen “Bilboko udalak euskara eta gutzienen hizkuntzen inguruko erakusketa bat antolatu du AlóndigaBilbaon”. Hizkuntza gutxituen inguruko erakusketa, gutxi batzuk erabiltzen dugun hizkuntzaren inguruko esposizio bihurtu zen. Udalak euskarari ematen dion tratamendua ikusita, titulua ulertzen dugu, euren ustetan gutxi batzuk baikara Bilbon euskaraz lan egiten dugunak eta bizi garenak. Ez da udaleko prentsa oharra ulertezina den lehen aldia; askotan, euskaldunok erdarara jo behar izaten dugu, aurkeztutakoa ulertu ahal izateko. “Hiri erdaldunaren irudia ematen omen du Bilbok, baina egiazki euskaldun gehien dituen munduko hiria da”, eta ez dut nik esan esaldi hau. Horrela kontatu zigun Kike Amonarrizek Tribuaren berbak saioan. Datu mordoa plazaratu zizkigun gure hiriaren inguruan, eta pozik entzun genituen. Bilbokoak ez diren lagunen artean askotan aldarrikatu eta esan behar izan dugu Bilbo hiri euskalduna dela, eta, askok harridura aurpegiaz begiratu arren, sinetsita gaude horrela dela. Baina gure agintarientzat, izen ofiziala Bilbao da, eta Arriaga antzokian aparilan ikuskizun ikaragarriak izango dira. Batek baino gehiagok pentsatuko du horiek akats txikiak direla, idazterakoan konturatu gabe egiten diren horietakoak. Baina akats horiek aldizkari ofizialetan, triptikoetan, iragarki erraldoietan eta prentsa oharretan ikusten ditugunean zalantzan jartzen dugu. Iritsiko da gure instituzioetara egunen batean euskararen marka, eta espero, Gipuzkoako Foru Aldundiak bezala, euskarari lehentasuna ematea, saihestea espainieraz bakarrik aritzea, eduki garrantzitsuak beti euskaraz azaltzea. Badu Bada, erakusketa izateaz gain, espazio egokia eta iradokitzailea izango da hizkuntza gutxituen ezagutza, onarpena eta promozioa ahalbidetuko duten ekintzak burutzeko. Erakusketak bertatik esan beharko digu gure udaleko agintariei euskaratik idatzi behar dituztela prentsa oharrak, euskaraz lan egin nahi dugulako eta bilbotarrak euskaraz bizitzeko eskubidea dugulako, nahiz eta “gutzienen hizkuntzan” mintzatu.

Unamunoren urteurrena ospatuko dute urte osoan »

BILBO. Miguel Unamuno idazle bilbotarra jaio zeneko 150. urteurrena ospatuko dute martxoan hasi eta urte bukaerara arte, Bilbon. Batetik, jarduera akademikoak prestatu dituzte, eta, bestetik, dibulgaziozkoak; hil bakoitzeko jarduera bat.

Ordunteko haize parkea baztertzeko eskatu dute »

Karrantzako Udalak Ordunte mendian eraiki beharreko parke eolikoa bertan behera uzteko eskatu die Eusko Jaurlaritzari eta azpiegitura eraiki behar duen Eolicas de Euskadi enpresari. Izan ere, EAEko Auzitegi Nagusiak lozorroan zegoen proiektua iratzart…