Bizkaiko Basoen Kudeaketari buruzko Ikerketa Batzordeak amaitu du bere ibilbidea Batzar Nagusietan: martxoaren 20an egindako azken saioan, ondorioen txostena onartu zuen, eta dokumentuak lanketa eredu berri bat finkatzeko hamazazpi gomendio jaso ditu. Bizkaiko basoen «osasuna, gizartearen ongizatea eta lurraldearen garapen jasangarria bermatzeko» neurriak zeintzuk izan beharko liratekeen jakinarazi du foru lege berri bat egiteko asmoz abian jarritako batzorde bereziak. Ondorioen txostena Batzar Nagusien osoko bilkuran aurkeztuko dute, bertan eztabaida dezaten. Onartzekotan, jendaurrera atera eta zuzenketak aurkezteko epea zabalduko dute.
EH Bilduk izan ezik, alderdi politiko guztiek ontzat eman dute dokumentua. EH Bilduk, bozketan abstenitu, eta boto partikularra aurkeztu du. Izan ere, haren ustez, Basogintza Batzordean parte hartu duten adituek adierazitako hainbat arlo «ez ditu jasotzen» idatziak.
Duela 30 urte baino gehiago onartutako Mendiei eta Babespeko Naturaguneen Administrazioari Buruzko Araudia ordezkatu behar duen foru araua egiteko erabiliko dute ondorioen txostena. «XXI. mendeko erronketara egokitutako kudeaketa jasangarriago eta integralagoaren beharra» azpimarratu du idatziak, baita «klima aldaketa eta ingurumen, gizarte eta ekonomia alderdiak orekatzeko beharra» ere. Batzordeak Bizkaiko zuhaitz azaleraren diagnostiko zehatza egin du, eta basoek lurralderako duten garrantzia eta kudeaketaren ikuspegi «holistiko eta integral» baten beharra nabarmendu du. «Epe luzerako» baso plangintza proposatu dute, lurraldea antolatzeko tresna gisa, «mendien erresilientzia, aniztasuna eta konektibitatea» sustatzeko. Hain zuzen ere, iazko maiatzetik hamabi adituren iritziak entzuteko aukera izan du Basogintza Batzordeak.
Kudeaketa aktiboa
Besteak beste, Bizkaiko baso multifuntzionalaren eredua mantenduko duen «kudeaketa aktibo» baten alde egin dute, egurraren ekoizpena aisialdiko, ingurumen hezkuntzako eta biodibertsitatearen kontserbazioko jarduerekin konbinatuz. Halaber, basogintza kudeatzeko hainbat eredu batera egotea planteatzen da, basogintza erregularra, irregularra eta kontserbazio basoak barne, eremu bakoitzaren berezitasunetara egokituta. Espezieen aniztasuna funtsezkotzat jotzen da basoen erresilientzia handitzeko, ingurumen, gizarte eta ekonomia aldagaien arteko oreka bilatuz.
datuak
17
TXOSTENEAN DAUDEN GOMENDIOAK. Basoen «osasuna, gizartearen ongizatea eta lurraldearen garapen jasangarria» bermatzeko hamazazpi gomendio eman dituzte.
Hamabi adituren laguntza izan dute batzarkideek.
Iazko maiatzetik hona hamabi adituren iritziak entzuteko aukera izan dute Basogintza Batzordean parte hartu duten talde politikoen ordezkariek.
Hurrengo pausoak. Txostena Batzar Nagusien osoko bilkuran aurkeztuko dute. Onartzekotan, zuzenketak aurkezteko aukera emango dute.
Txostenean nabarmendu dute funtsezkoa dela lurzorua babestea, haren egoera ona eta erabilera jasangarria sustatuz. Era berean, baso kudeaketa suteak prebenitzeko eta horien aurka borrokatzeko funtsezko tresnatzat hartzen da; batez ere, klima aldaketaren eta landa ingurunea uztearen testuinguruan.
Bestalde, «beharrezkotzat» jotzen da basogintzaren sektorean belaunaldien arteko erreleboa bermatzea, prestakuntza eta profesionalizazioa sustatuz. Kudeaketa elkartua eta profesionalizatua sustatzea proposatu dute, basogintzako ustiategien eraginkortasuna eta errentagarritasuna hobetzeko, basogintza sektoreak Bizkaiko ekonomian duen zeregin garrantzitsua aitortuz.
Basogintzako inbertsioei laguntzeko planak mantentzea eta indartzea ere planteatzen da txostenean, baita basogintzako osasunean, espezie alternatiboetan, zuraren kalitatean eta halako arloetan ikerketa, garapena eta berrikuntza bultzatzea ere.
Azkenik, esan dute bioekonomia zirkularra lurraldearen garapen sozioekonomiko jasangarrirako aukera bat dela, egurraren eta beste baso produktu batzuen balorizazioa sustatuz gero petroliotik eratorritakoen alternatiba gisa. Basogintza sektorera egokitutako fiskalitatearen alde egin dute, jarduera sustatzeko eta zerbitzu ekosistemikoen horniduran basogileek duten zeregina aitortzeko.
Argi-ilunak
Gainontzeko alderdi politikoek bezala, EH Bildu foru arau berria «ahalik eta adostasunik handienarekin» onartzearen alde agertu zen Basoen Kudeaketari Buruzko Ikerketa Batzordearen azken saioan. Izan ere, gainontzeko taldeen «diskurtsoa aldatu» egin dela uste du. Iratxe Arriola EH Bilduko batzarkidearen arabera, «basoen dibertsitatea eta konplexutasuna argi eta garbi» aipatzen ditu ondorioen txostenak. Horretaz gain, besteak beste, «ikuspegi holistikoaz hitz egiten denean, txertatuta daude kultura eta paisaia. Eta inportantea da jendarte guztiaren ikuspuntua kontuan hartzea foru arau berrian».
«Klimaren erronka uztartuta dagoen foru arau bat nahi dugu, lehen sektore jasangarri bat eta enplegu duina bermatuko dituena. Landa eremua eta gizartea kontuan hartuko dituen arau bat behar dugu»
IRATXE ARRIOLA EH Bilduko batzarkidea
Ondorioen txostenak hainbat «gabezia» dituela azpimarratu du Arriolak. Horren adibidetzat jarri zituen, besteak beste, «basoen egoera kaskarra, horien kudeaketa ez-jasangarria eta basogintza eredu intentsiboak eragindako kalteak». «Klimaren erronka uztartuta dagoen foru arau bat nahi dugu, lehen sektore jasangarri bat eta enplegu duina bermatuko dituena. Landa eremua eta gizartea kontuan hartuko dituen arau bat behar dugu», esan zuen EH Bilduko batzarkideak.
Richar Vaquero Ahal Dugu-ren batzarkideak kritikatu zuen eurek aurkeztutako «proposamenen %25» besterik ez daudela jasota ondorioen dokumentuan. Ahal Dugu-k eta EH Bilduk baino ez dituzte aurkeztu zuzenketak batzordeak egindako ibilbidean.