Maiteminduen zaindari San Valentinen eguna atzo izan bazen ere, Zeanuriko Eleizondo auzoan etzi ospatuko dute. Urtero bezala, egitaraua oso apala izango da. 11:30ean, meza egongo da Zeanuriko Andra Mari parrokian. Horren ostean, santuaren irudia prozesioan aterako dute, handik 50 metrora dagoen Piedadea izeneko baselizara. Datorren urtera arte, bertan utziko dute irudia.

Erlijio ekitaldia bukatutakoan egiten duten ekintzak bihurtzen du berezi jai hau. Izan ere, ermita aurrean bada arte bat, eta ohitura zaharra dute urtero neurtzea. Enborraren perimetroa eta garaiera aurreko urtetik zenbat hazi den begiratzen dute, eta, horretarako, beren-beregi sortu duten neurketa liburuan jasotzen dute. Gorordo baserrikoek neurtzen dute. Koadernoan, bada, neurtzaileek ez ezik, kofradiako idazkariak eta maiordomoak ere sinatzen dute.

Ez dakite noiztik dagoen arte bat ermita aurrean, baina badakite gaur egungoa 1957an landatu zutela, aurrekoa hil egin zelako. Dena den, neurtzeko ohitura galduta egon da, harik eta 2007an berreskuratu zuten arte. Iaz, 180 zentimetroko perimetroa zeukan, eta 150 zentimetro zen garai. Neurketaren ostean, hamaiketakoa izango dute, txistulari eta bertsolariek lagunduta.