Neanderthalak, Iberiatik Siberiara erakusketa bisita daiteke Bizkaiko Arkeologia Museoan. Han izango da urriaren 14ra bitartean. Gizaki haien bilakaera historikoa eta bizimodua azaltzea du helburu erakusketak.

Burgosko Giza Eboluzioaren Museotik iritsi den arren, Euskal Herriko aztarnategietako objektuak ere jaso ditu. Besteak beste, Bizkaiko Arlanpe (Lemoa) edo Axlor (Dima) aztarnategietan berreskuratutako hondarrak daude ikusgai.

Sei ataletan banatu dute Arkeologia Museoan Neanderthalei buruzko erakusketa: Neanderthalen testuinguru filogenetikoa eta kokapen ebolutiboa, gizaki haien egunerokoa: elikadura eta sua, kultura materiala; Portaera sinbolikoa, Cro-Magnongo gizakiekin izan zuten harremana, eta, azkenik, desagertzeko prozesua.

Erakusketa osatzeko hitzaldi bat eta bisita gidatu bat antolatu ditu museoak. Irailaren 27an Aurora Martin Giza Eboluzioaren Museoko koordinatzaileak Atapuerca eta hango museoari buruzko hitzaldia egingo du. Irailaren 30ean, bestalde, Giza Eboluzioaren Museoa eta Atapuercako aztarnategia ezagutzeko bisita gidatua egingo du Rodrigo Alonso museoko dinamizatzaileak.