Arteak eta elkartasunak bat egin dute Bilbon abiatu duten egitasmo batean; Raquel Rochas bilbotarraren olio pinturak eta grabatuak hiriko Barrainkuako udaltegian daude jarrita.

Erakusketa horrek berezitasun bat dauka; hain zuzen, margolan horiek salgai egongo dira, eta salmenta horietatik ateratzen den dirua Somaliara bidaliko dute. Mugarik Gabeko Medikuak erakundeak bultzatutako Koadro bat bizitza baten truke elkartasunezko proiektuaren barruan dago egitasmoa.

Erakusketa zabalik dago dagoeneko; hala ere, datorren astelehenean egingo dute elkartasun proiektuaren aurkezpena, 20:00etan. Ekitaldi horretan, artista horren artelan bat zozkatuko dute.

Margolanen bat erosi gura duenak izango du erraztasunik ere: jakinarazi dutenez, berez izan beharko luketen prezioa baino merkeago salduko dituzte. Erakusketa hilaren 20ra arte egongo da zabalik, goizez eta arratsaldez.

ERAKUSKETA

Urtarrilaren 20ra arte. Erakusketa urtarrilaren 20ra arte egongo da zabalik, Barrainkuako udaltegian, goizez eta arratsaldez.

Inaugurazioa, 9an. Elkartasun proiektuaren inaugurazioa hilaren 9an egingo dute, 20:00etan.