Beste Ikuspuntuak kulturarteko IV. astean murgilduta dago Portugalete egunotan. 14 eta 30 urte arteko gazteentzat da, eta munduko beste kulturetara hurbiltzeko jarduerak antolatu ditu Gazte Gelak.
Hainbat tailer prestatu dituzte, gazteak kultura batzuen eta besteen errealitatera gerturatzeko asmoz. Astelehenean hasi zuten aurtengo kulturarteko astea, baina gaur eta bihar ere egongo da oraindik hainbat tailer eta jardueratan parte hartzeko aukerarik.
Lehen geldialdia, Afrikan
Gaur Afrikan egingo dute lehenengo geldiunea. 17:00etan, hango dantzen tailer bat egingo dute. 19:00etan, berriz, jauzi handi bat egin eta Japoniaraino joango dira, lorezaintzaren artea ezagutzera emateko tailer baten bitartez.
Argentinak ere hartuko ditu Gazte Gelaren txokoak. Izan ere, 19:30ean, Argentinako mateari buruzko tailer bat egingo dute. Azkenik, ostiraleko jarduerak ipuin kontalari batekin bukatuko dira. Ez da izango Bizkaiko edozein herritan normalean ikusten diren ipuin kontalari horietako bat: berbere ipuin kontalari baten istorioak entzun ahal izango dituzte, hain zuzen, 21:15ean Gazte Gelara doazenek.
Biharko egitaraua gaurkoa bezain zabala ez izan arren, egongo da zer ikusi eta zer dastatu. Izan ere, 18:00etarako Brasilgo pintxo dastatzea antolatu dute. Merienda hartzeko modu bitxia eskainiko dute, beraz.
Ordu horretantxe, Arabiako perkusioaren nondik norakoak azalduko dituzte gai horri buruzko tailerrean. Bukatzeko, Bollywoodeko ikuskizun bat prestatu dute.
Tailer horiez guztiez gain, bi erakusketa ere zabalik egongo dira Gazte Gelan, aste osoan bezala. Beheko solairuan, Saharako jantziak erakusketa egongo da gaur eta bihar. Barneko aldean, berriz, Munduko argazkiak izenekoa jarri dute. Denetarako sarrera doakoa da.
EGITARAUA
Gaur. 17:00etan, Afrikako dantzen tailerra. 19:00etan, Japoniako lorezaintzaren artea erakustekoa. 19:30ean, Argentinako mateari buruzko tailerra. 21:15ean, berbere ipuin kontalaria.
Bihar. 18:00etan, Brasilgo pintxoak dastatzeko aukera eta Arabiako perkusio tailerra. 20:00etan, Bollywood ikuskizuna.
Erakusketak. Askotariko jarduerez gain, aste osoan zabalik egon diren bi erakusketa ikusteko aukera ere izango da gaur eta bihar: beheko solairuan, Saharako jantziak erakusketa dago. Barnealdean, berriz, Munduko argazkiak ikus daiteke.