Europan lan egiten ikasteko enpresa bat sortzen ari dira Mungiako hamasei ikasle »

Mungia BHI institutuko hamasei ikasle Europako Comenius programan sartuta daude. Helburua da Europako sei herrialdetako ikasle batzuen artean enpresa bat sortzea. Horren atzean, baina, helburu gehiago ere badaudela gogora ekarri du Mungiako institutuan proiektua gidatzen duen Mariano Roman Campos irakasleak. Hain zuzen, ikasle horiek Europan lan egiteko pertsona gisa heztea.

Bide horretan orain arte egindako lanarekin “oso pozik” agertu da Campos. Izan ere, joan den asteko eguaztenetik domekara bitartean Portugalen izan zen ikasleekaz batera. Parte hartzen duten gainerako herrialdeetako ikasleak eta irakasleak ere han izan ziren, eta irakasleari “azpimarratzekoa” iruditu zaio Mungiakoek erakutsitako jarrera. “Ingelesez DBHko maila baino ez badute ere, ondo moldatu ziren, eta herrian bertan giro atsegina sortu zuten”, azaldu du. Bidaia horren ostean, Romanek uste du ikasleek ikusi dutela “helduak direla eta gai direla munduan euren kabuz ibiltzeko”. Horren haritik, “bizitza proba gainditu dute”, ondorioztatu du.

Edari bat eta gozo bat

Mahatsondoetatik eta olibondoetatik eratorritako produktuak ekoitziko ditu Europako sei herrialdetan sortzen ari diren enpresa horrek, “naturaren aberastasunean oinarrituta”. Produktuaren ekoizpena Zipreri dagokio. Batetik, zivania deritzon edari alkoholdun bat egingo dute. “Uxualaren antzekoa da”, azaldu du. Beste produktua, gozo bat da: “Mahatsez eginda dagoen erregaliz baten antzekoa da, eta barruan intxaurrak ditu”.

Mungiako institutuko ikasleen lana produktuaren garapena eta marketina egitea da; eta horretan ari dira 17 eta 40 urte arteko ikasleak —administrazioa, mekanizazioa eta elektrizitatea ikasten ari dira—.

Produktuen aurkezpena datorren apirilean egingo dute. Ekitaldi horretarako, Hungaria aukeratu dute, eta han bat egingo dute bateko eta besteko ikasleek.

Enpresa benetan gauzatuko duten ala ez zalantzan dago oraindik. Mungiako institutukoek sortu egin gura dute; baita Ziprekoek eta Portugalekoek ere. “Aurrera eraman gura dugu enpresa. Ikasleak independente egin nahi ditugu; baina Hungariakoek, Italiakoek eta Poloniakoek maila teorikoan utzi gura dute proiektua. Beraz, guztion artean adostu behar dugu”, azaldu du Mungiako irakasleak.

Dena den, Mariano Romanek gogorarazi du antolaketa lanetan baino ez dabiltzala oraingoz. “Galdetegi bat egin genuen institutuetan, ikasleek Europari buruz zenbateko ezagutza zuten ikusteko”. Proiektua bukatu ondoren, ezagutza hori areagotu den aztertu gura dute. Enpresa bat sortzeko eman behar diren pausoak ezagutzen ote dituzten ere galdetu diete ikasleei. Aztertu nahi dute ikasleek gai horrekiko duten ezagutzak ere gora egin duen proiektua amaitu ostean.

Datorren urteko ekainean bukatuko dute proiektua, Polonian. Lehenago, hainbat pauso dituzte oraindik emateko. Martxoan, esate baterako, Mungian izango dira herrialde guztietako ordezkariak.

Plan Orokorrak Bilbondo handitzea debekatuko du »

BASAURI. Basauriko Udalak Hirigintza Plan Orokorra erreformatuko du, Bilbondo saltoki gunea gehiago handitu ez dadin. Hala, aldaketa horri esker, Bilbondok ezingo ditu egun erabiltzen dituen metro koadroak baino gehiago erabili. Gaur egun indarrean da…

“Espainiakoa ez dut orbain gisa ikusten; mundukoa, ordea, bai” »

Denboraldi bikaina egiten ari zen arren, Egoitz Murgoitiok (Abadiño, 1983) ez du lortu bere lana biribildu eta Belgikan munduko hamabost onenen artean geratzea. Bizikletako katea apurtuta, hegan egin zion ametsak Abadiñoko gazteari. Hala ere, indarrez beteta dago etorkizunerako.

Itxaropen eta konfiantza handiarekin joan zinen Munduko Txapelketara, baina hasterako okertu zen egoera. Nola bizi izan zenuen erorketa hura?

Aurreko egun bietan zirkuituan ibilita nengoen, eta gustura nengoen lasterketarako; konfiantza neukan. Hala ere, gero, hasi eta berehala katea hautsi eta erori egin nintzen. Hasi orduko bukatu nuen, beraz. Amorrua sentitu nuen, baina horrelakoak ere gertatzen dira.

Halakoetan, min fisikoa erraz ahazten da, baina min psikologikoa gainditzea zailagoa izango da. Zelan zaude?

Ondo. Erorikoa beste era batean gertatu izan balitz, hau da, nire erruz gertatu izan balitz, baliteke gertatutakoari buelta gehiago ematea. Baina katea apurtu zen; beraz, nik ezin izan nuen ezer egin horren kontra. Gertatutakoa ahazten hasita nago.

Erori eta gero, proba batzuk egin behar izan zizkizuten. Ondo al zaude?

Bai, ondo nago. Urratuak ditut oraindik, eta fisura txiki bat ere badaukat behatz potoloan. Munduko Txapelketaren ostean, asmoa geneukan asteburu batean lehiaketa batean parte hartzeko, baina, fisura txiki bat daukadanez eta astebete geldi egoteko agindu zidatenez, denboraldia bukatu artean ez dut gehiago korrituko.

Denboraldi bikaina egin duzu, baina bi orbain izan ditu: Espainiako Txapelketa eta Munduko Txapelketa. Horrela ikusten duzu zuk?

Bai. Batez ere, Munduko Txapelketa izan da orbaina. Azken batean, Espainiako Txapelketako lasterketan ondo aritu nintzen, baina Isaac Suarez ibili zen ni baino indartsuago. Beraz, horren kontra ezin da ezer egin. Ahal izan nuen guztia egin nuen lasterketan, baina beste batek irabazi zidan. Espainiako Txapelketa ez dut orbain gisa ikusten; Munduko Txapelketa, ordea, bai.

Orbain horrek eragina izan dezake babesleak bilatzeko orduan?

Konfirmatuta dauzkagu datorren denboraldirako babesleak. Hala ere, egia da denentzako onena dela Munduko Txapelketa batean lasterketa on bat egin eta lehenengo hamar-hamabosten artean ibiltzea. Garrantzitsua da, pixka bat ezagutarazteko.

Lehenengo hamar-hamabost korrikalarien artean geratzeko asmoarekin joan zinen Belgikara?

Bai, hori zen helburua. Batez ere, lehenengo hamabosten artean sartzea, eta, egun ona izanez gero, ahalik eta postu hoberena eskuratzen saiatzea. Gainera, lasterketa zelan joan zen ikusita, nik uste lortuko nuela lehenengo hamabosten artean sartzea.

Ziklo-kroslarientzat, balantzeak egiteko garaia izaten da otsaila. Zein da Egoitz Murgoitioren balantzea? Zertan asmatu duzu, eta zertan hutsegin?

Aurten oso ondo ibili naizela uste dut. Nahiago nuke berriro lortuko bagenitu urtea hasi orduko izan ditugun emaitzak. Denboraldia ondo joan zen. Iazko udan prestaketa on bat egitea lortu genuen, eta nik uste hori dela bereziki nabaritu duguna.

Iaz ere, denboraldi osoa kanpoan egin genuen, eta uste dut esperientzia hori nabaritu egin dela. Hutsak ere izango genituen, baina, prestaketa aldetik, ahalegina egin dugu dena ahalik eta hoberen egiteko.

Azken denboraldietan, pauso sendoak ematen ari zara. Beste koska bat gora egiteko aukerarik badago hurrengo denboraldirako?

Bai. Iaz egin genuen denboraldi bat kanpoan lehenengo aldiz. Pentsatzen dut aurten nabaritu dugula bigarren denboraldia zela, eta uste dut pixkanaka nabarituko dugula datorren urtera begira. Esperientzia handiagoa ere badaukagu, eta, gauzak egiteko orduan ere, badakigu zer hobe dezakegun. Datorren urtean, ea lortzen dugun nazioartean saltotxo bat ematea.

Azarora arte, ziklo-krosak eman ditu eman beharreko gehienak. Nola eusten dio ziklo-kroslari batek sasoiari?

Hilabete inguruko atsedena hartzen dut normalean, eta gero pixkanaka hasten naiz entrenamenduak egiten: igeriketa apur bat egiten dut, eta, gero, errepideko bizikletarekin entrenamenduak egiten hasten naiz.

Udan, errepideko lasterketa amateurretan parte hartzen dut. Horrez gain, aurten pentsatuta geneukan mendiko bizikleta lasterketa batzuetan ere serioago aritzea —iaz aritu ginen, baina era lasaiagoan—.

Badirudi hurrengo denboraldian Igorreko zirkuitua Munduko Kopatik kanpo geratuko dela, Erromakoaren mesedetan. Kolpe handia izango da hori zuentzat eta Igorreko herriarentzat, ezta?

Bai, hala da. Kopatik kanpo gelditu dela berresten badute azkenean, kolpe handia izango da Igorrerentzat eta guretzat. Izan ere, garrantzitsua izaten da etxean Munduko Kopako lasterketa bat izatea.

Gainera, nik uste dut oso gogorra izango dela Euskal Herriko ziklo-krosarentzat. Urte askoan egon da Munduko Kopako egutegian, eta, azkenean, era horretako lasterketa bat izateak erreferente gisa balio du. Munduko Kopatik kanpo geratzen bada, kolpe handia izango da.

Hurrengo denboraldian ere, Munduko Kopari begira ariko zara bete-betean?

Bai. Munduko Kopa osorik egingo dugu datorren urtean ere, eta, behar bada, saiatuko gara Europan aurten baino lasterketa gehiagotan lehiatzen.

Zein kirolari daukazu eredutzat zuk?

Erreferente gisa, lagun ere izan badudalako, David Seco.

Zenbait teknika irakatsi zizkizun.

Bai; kadeteetan hasi nintzenean, Seco zen nagusi lasterketetan, eta beti izan dut harreman ona harekin. Entrenamenduetan eta kontu askotan lagundu zidan.

Bera ere bizkaitarra da. Zer nolako harrobia dago Bizkaian?

Jendea indartsu dator. 23 urtez azpikoetan, Jonathan Lastra dago, Gomez anaia biak ere bai —Iñigo eta Jon— … Baina, orain, zaila izaten da gazteeentzat ziklo-krosean aukerarik aurkitzea: babesleei eta federazioari dagokienez ere, ez da garai ona jendea kanpora ateratzeko. Jendea egon badago, eta ea pixkanaka ateratzen dugun.

Oraindik urte asko dauzkazu aurretik, baina, ziklo-kroserako sasoia igaro ondoren, non ikusten duzu zeure burua?

Oraindik ez dut era horretako planteamendurik egin. Nire ustez, gauzak ondo joanez gero, oraindik badauzkat urte batzuk ziklo-krosean ondo ibiltzeko, eta orain hor jarri gura ditut indarrak. Bukaera ikusten dudanean hasiko naiz aukerak aztertzen.

Euskara Bizia batzordea sortu du Foru Aldundiak »

BILBO. Bizkaiko Foru Aldundiko Kultura Sailak Euskara Bizia izeneko batzordea sortu du, herrialdean euskararen egoera eta beharrizanak aztertu eta proiektuak proposatzeko. Kultura diputatua izango da burua, eta euskara arloko hainbat eragilek osatuko …

Xede ekonomikoa egotzi diote Zallako gaztetxearen auziari »

Zallako Gazte Asanbladako hiru kiderentzat 360.000 euroko isuna eskatu du gaztetxea dagoen eraikinaren jabeak. Diru kopuru hori bai baina eraikina husterik ez duela eskatu arrazoituta, gazte batzarreko kideek uste dute salaketaren helburua ekonomikoa dela. “Diru nahia” dagoela diote.

Joan den barikuan —gaur zortzi— epaitu behar zituzten hiru lagun horiek. Atzeratu egin zen, baina, epaiketa, “akats tekniko batzuk egon direlako”, gazte batzarrak jakinarazi duenez. Orain ez dakite prozesuak noiz arte iraungo duen.

Zallako kanpoko aldean dagoen etxe bat da salaketaren gakoa. “Urteetan bertan behera utzita egon da eraikina, eta 2007ko abenduaren 14an okupatu zuen gazte batzarrak”, jakinarazi dute. Inputatuek, baina, okupazio mugimenduarekin zerikusirik ez dutela azaldu dute.

“Prozesuak ganorarik ez zuela esan izan dugu guk hasieratik”, azaldu du gazte batzarrak. “Hiru gazte horien aurka egin dute, pagaburutzat hartu dituzte eta, jabeak etxea husteko ez duela eskatu kontuan hartuta, gure irudipena da etekin ekonomikoa lortu guran baino ez dabilela. Jabeak ez dauka etxe hori erabiltzeko asmorik. Beraz, gure ustez, prozesua dirua irabazteko abiatu du”.

Fiskaltzak sei hilabetean eguneko 200 euro ordaintzeko eskatzen dio inputatuetako bakoitzari isun gisa. Jabeek, baina, epe horretan bertan eguneko 200 euro gehiago eskatzen dizkiote bakoitzari, “eraikinaren balioa kontuan hartuta”. Erantzuki-zun zibilerako 120.000 euro ere eskatzen dituzte hirurentzat, eta soldatetatik kentzeko bakoitzari beste 36.000 euro. “Zigorra gehiegizkoa” dela deritzo gazte batzarrak. “Erokeria bat da horrenbeste diru eskatzea”, esan dute.

Kukutzaren aurrekaria

Kukutza Errekalden eraitsi zuten gaztetxearen aurkako salaketa artxibatu izana Zallako aferan onerako izan daitekeela deritzo gazte batzarrak. “Kukutzako aurrekaria onuragarriak izan daiteke”. Hala ere, beldurra ere ezin dezakete ezkutatu. Izan ere, okupazio mugimendua ikaratzeko bidea ere zabal dezakeela uste dute: “Gurea mugimendua izutzeko prozesu bat izan daiteke. Hiru lagunentzako bizi osorako hipoteka izateaz aparte, salatzaileei, hau ondo ateratzen bazaie, aurrekari bat izan daiteke era honetako beste ekintza batzuen aurkako prozesuetan”.

Joan den asteko ostegunean —atzo zortzi— jakinarazi zuen Bilboko 9. Instruzkio Epaitegiak lantegi zahar bat okupatu eta Kukutza berria bertan sortzen saiatu ziren lagunen aurkako salaketa artxibatzeko erabakia. Zaindu gabeko lokal bat okupatzea ez dela usurpatze delitua ebatzi du epaileak. Azaroan okupatu zuten lokal hura, baina berehala kanporatu zituzten.

“Okupazio mugimendua inoiz baino biziago” dagoela deritzote mugimendu horretako kideek, epaitegiaren erabakia baloratzeko bidalitako prentsa oharrean jakinarazi dutenez. Horrez gain, uste dute epaitegietako azken erabakiek okupazioa delitua ez delako ideia indartzeko balio dutela, eta hainbat gaztetxeren aurkako salaketak artxibatu egin dituztela gogorarazi, Larraskitu eta Santutxukoak kasu.

Musikarekiko grina eta zaletasuna aldizkari batera ekarri ditu gazte batek »

Pablo Rodriguez (1990) gazte lemoaztarrak txikitatik izan du gogoko musika. Horregatik, ez da harritzekoa gitarra edo liburu batekin herriko kaleetan barrena ikustea. Zaletasun horren inguruan asko irakurri eta hausnartu ondoren, fanzine bat egiteko i…

“Zortzi-hamar etxe eraikitzeko ahalegina egingo dugu” »

Herriaren kultur birika dakusa Juan Felix Naberan Gautegiz Arteagako alkateak udaletxeko balkoitik, begi kolpe soil batekin herriko plaza, frontoia eta kultur etxea baititu aurrean. Herriaren erdigunean egonda, Gautegiz Arteagak daukan “arazorik handi…

Ermua aldundiarentzat ez dela lehentasunezkoa salatu du hango udalak »

Ermuan ez dute onartzen Bizkaiko Foru Aldundiak herria igarotzeko saihesbidea atzeratzeko emandako aitzakia. Hain zuzen, Ermuko udalbatzak onartutako idazkiaren arabera, “saihesbidea egiteko arazoa ez da ekonomikoa, Ermua aldundiarentzat ez dela lehentasunezkoa baizik”.

“Krisiarena ez dugu aitzakiatzat onartzen”, salatu du Jose Luis Clemente alkateordeak, “krisiak proiektu guztietan izan beharko luke eragina, ez merkeenean — gurea—. Proiektu guztien kostuak 250 milioi eurotik gorakoak dira, eta gurea 150 milioi eurokoa da”, esan du. “Eta gurea da ez dutena egingo. Kasualitatea. Gurea da, gainera, esleipen fasean dagoena, osorik idatzita dagoena eta hasieratik bukaeraraino egin daitekeena. Gainerako proiektuak idazteko fasean daude. Beraz, krisiak eragindako erabakia dela dioen aitzakia hankamotz geratzen dela deritzogu”.

Joan den urtarrilean iragarri zuen Jose Luis Bilbao ahaldun nagusiak Ermukoaz gain, atzeratu egingo zituztela Ondarroa eta Markina, batetik, eta, Boroa eta Igorre, bestetik, lotuko dituzten errepideak.

30.000 ibilgailu egunean

N-634 errepideak gurutzatzen du Ermua. Egunean 30.000 ibilgailu igarotzen dira handik, Clementek gogorarazi duenez. “Horietatik zenbateko handi bat —6.000 eta 7.000 artean — ibilgailu astunak dira, eta ez dakigu barruan zer daramaten”. Horrek guztiak herrian sortzen duen arriskua, zarata eta kutsadura handiak direla azaldu du.

Errealitate hori ikusita, “irtenbide alternatiborik ez duen Bizkaiko herri bakarra gara, ahaldun nagusiak Bizkaiko herritzat baldin badauka Ermua”, esan du alkateordeak. Izan ere, Eibartik Ermua gurutzatzeko —kilometro eta erdiko ibilbidea —, sarri 25 minutu behar izaten direla salatu du Clementek: “Izugarria da”.

07:30etik 08:30era, eguerdialdeko orduak eta 17:30etik 20:00etara bitartean izan ohi dira, bereziki, ordurik txarrenak herria gurutzatzeko. 08:00etatik 20:00etara bitartean, baina, kamioiak etengabe igarotzen ari direla gogorarazi du alkateordeak. “Kontuan hartu behar da autobideko gure irteeratik edozein industrialdetara joateko herrigunetik igaro behar dela. Ez dago beste aukerarik”.

Herritarrak egoera horrekin nekatuta daudela azaldu du Clementek, “zain egoteaz nazkatuta”. Saihesbidea “beharrizana da guretzat, ez kapritxo bat”. Izan ere, lanak joan den urrian hastekoak zirela ekarri du gogora.

Manifestaziorako deia

Urte luzez egindako eskaerari irtenbidea ematea gura dute ermuarrek. Hori dela eta, manifestaziora deitzea erabaki zuen joan den asteazkenean udalbatzak. Datorren asteko zapaturako, hilaren 18rako, egin dute deialdia. 12:00etan aterako dira herriko plazatik Ermuko saihesbidea eta kitto lemapean. PSE, PP, Bildu eta Ezker Anitzaren aldeko botoekin hartu zuten erabakia. EAJ abstenitu egin zen. Aurrerantzean, erakundeekin berba egiteko eta mobilizazio gehiago egiteko prest daudela azaldu du Clementek. Lanak berehala edo ahalik eta azkarren hastea lortu gura dute.

Industrialdea bai, baina… »

Eskualderako industria eremu erraldoi bat egitea. Hori da, besteak beste, Muxikako Plan Orokorrak jasotzen duena. Alkatetza eskuratu orduko, Bilduk bertan behera utzi zuen. “Aurreko udalaren asmoak bete balira, hauxe onartuko zen Muxikarentzat: 57 hektareako lur industriala, eskolaren ingurua industrializatuta, errepide sareak aurre egin ezinezko zirkulazio bolumena…”, salatu du herriko alkate Aitor Goladarazek. Ordutik arazoari irtenbiderik “onena” emateko auzia aztertzen ibili direla dio. Hala, haren berbetan, industrialdea egin egingo da, “baina beste era batera”. EAJren aldetik “presioak” jaso dituztela dio, eta horrela erantzun gura diela koalizioak.

Hamasei urte baino gehiago iraungo luketen lanak onetsi zituzten EAJko ordezkariek. Bilduk, ordea, atzera egin du. Autzaganeko errepide berria ere aipatu du alkateak,trenbidearen leku aldaketa eta herria eskualdeko sarrera eta irteera dela oroitarazi du. “Posible al da herritarrak baldintza horietan bizitzea?”. Argi utzi gura izan du udal gobernua ez dagoela industrialdearen aurka, aurreko Plan Orokorrak finkatzen zuen industrialde jakin haren kontra baino.

Industrialdea eraikitzen denean “betiko” izango da. Horregatik, ondo egin behar dela ohartarazi du alkateak. “Kutsadura akustikoa, zirkulazio arazoak eta abarrak handitu egingo direnez, hobeto kalkulatu behar dira distantziak”. Aurreko proiektuaren eremua eskola eta etxebizitzak dauden lekura arte iristen zen. Hori horrela dela, zorrotz aritu nahi dute: “Udalak herritarren ongizateari eta herriaren hazkundeak sortuko dituen beharrizanei begiratuko die, herritarrek egindako eskaerei eta proposamenei kasu eginda”.

Egitasmoak dagoeneko hamar urte bete ditu mahai gainean. “EAJk udala, foru aldundia eta Eusko Jaurlaritza bere esku izan dituen arren, ez du gaitasunik izan behar den moduan eta denon interesak defendatuta aurrera eramateko”. EAJk alkatetza zuen garaiko Gernika-Lumoko Udalari egin dizkio Bilduk kritika larrienak. “Apustu garbia egin zuten etxe agentzien negozioen alde, eta, bitartean, industria guztia edo gehiena galdu dugu. EAJren politikak lotarako herri bihurtu du Gernika ia-ia”, ohartarazi du Jose Mari Gorroño Gernika-Lumoko alkateak.

ZDU Zain Dezagun Urdaibai elkarteko kide Erroxeli Ojinagak ere bat egiten du kritika horrekin. Haren esanetan, egun eskualdean dauden industrialdeak merkataritzara edo etxebizitzen eraikuntzara bideratu gura ditu EAJk. Horren adibide modura, Tole-Ebaki XXI enpresaren kasua jarri du. Gernika-Lumoko ibarreko industrialdetik Muxikara eraman dute, eta haren lekuan enpresa berriak jarri ordez Eroski handi bat ireki dela gogorarazi du, “herriko merkataritzari kalte eginez”. Busturian ere antzeko zerbait gertatu zela dauka akorduan. Industriarako erabilpena izan behar zuten lur sailei kalifikazioa aldatu eta etxebizitzak eraiki zirela dio Ojinagak, “Muxikan poligonoa egingo zen aitzakian”. Azken batean, haren ustetan, “Muxikako industrialde erraldoi honen helburua industriarako erabilera kalifikazioa duten beste guneak hustea da”.

Baina salaketa horretan, harago ere joan da. Hau da, Busturialdea Urdaibai biosfera erreserban dagoela dio, eta asko direla babestutako lur sail eta balio naturalak. Ohartarazi du industria erabilpenerako kalifikatuko diren lur sailen truke ez dela beste lur sailik babestu. “Sakonean Urdaibaiko erreserba legeak ezarritako babesaren aurka doaz. Apurka-apurka, industrialdeak eta eraikitzeko guneak sortuz, babestuta daudenak gutxituz joango dira, eta azkenean Unescora joko dute zer babesturik ez dagoela esan eta erreserba kentzeko eskatzera”.

Ojinaragak dioenez, Busturialdean hutsik dauden industriarako lur sailekin edota pabiloiekin nahikoa da eskualdeak duen eskaerari erantzuteko. “Datu ofizialen arabera, 40 hektarea daude hutsik eskualde osoan. Ez dago Muxikara joateko beharrik, nekazaritzarako lurzoru babestuak industriarako bihurtzera”. Gainera, gogora ekarri du zerrenda bat osatzen hasi zirela. Muxikan eraikiko zen industrialdean fabrika jarri nahi zuten enpresek izena eman behar zuten. Ojinagak dio bakarra agertu zela. “Batentzat Gernika-Lumoko Txaporta gunean edo Muxikako industria lursailetan badago lekua”.

Gainera, ekintzaile askoren arazoa jarri du agerian. “Nik ezagutzen ditut beharrik gabe geratu diren eta, adibidez, euren estanpazio enpresa txikia ireki nahi duen jendea. Baina ez dute pabiloirik aurkitzen”. Administrazioak horiei lagundu beharko liekeela iruditzen zaio Ojinagari. Horretarako proposamena ere egin du: “Bizkaiko Foru Aldundiak Inama desjabetuko duenez, lursail horretan elkartegi bat sor dezake”. Gertuenekoa Igorren dute, Arratian. “Eskualdean bat eraikitzeko egitasmoa egon zen, baina bertan behera utzi zuten”. Bestela dagoeneko eraikita dauden industrialdeetan hutsik dauden pabiloiak eskuratzen lagundu beharko liekeela iruditzen zaio. “Birziklatu, berrerabili eta gutxitu. Ez al da hori garapen iraunkorraren ardatza? Ispasterren sasiz beteta dago eta Boroakoa erdi hutsik”.

Kudeaketa eredua ezbaian

EAJk agintean egondako urteetan egindako lanaren emaitzatzat jo du Bilduk Inamarekin gertatutakoa, adibidez. “Muxikako Udalean hogei urtean agindu du eten barik, eta horretatik hamabitan gehiengo osoa izan du. Enpresak sortutako ingurumen arazoak kudeatzeko gai ez da izan, eta enpresari dagozkion jarduera lizentziak eguneratzeko ahaleginik ez du egin. Zelan uler daiteke 20 urtean Inamari jarduera lizentzia bakar bat berritzeko gai izan ez, eta orain Bilduk sei hilabetean enpresa itxi duela esatea?”, agertu du kexa.

Gernika-Lumon itxitako enpresa mordoaren zerrendari ere erreparatu diote: Dalia, Malta, Idurgo eta Astra aipatuz. 3.000 lanpostutik gora galdu direla salatu du Gorroño alkateak. Eskualdeak suspertze ekonomikoa behar dela dio, eta udalez gaindiko erakundeen parte hartzea eskatu du. “Espero dugu gure bidean gero eta gehiago izatea adostasunak. Azkenean, eskualdearen etorkizuna dago jokoan, eta ez genuke denborarik galdu behar”.

Segurtasuna indartzeko gauzainak »

Antzinako ohiturak bueltatu dira Durangora, eta lehengo gauzainen figura berreskuratu dute herrian. Hain zuzen, iluntzean eta gauean, bereziki, herriko puntu ilunetan segurtasuna indartzeko lanean hasiak dira sei emakume: Durangoko gauzainak.17:00etan…