Ingurumen baimena eman diote Vista Alegreri »

MENDEXA. Bizkaiko Foru Aldundiak ingurumen baimena eman du Mendexako Vista Alegre eremurako arau subsidiarioak aldatzeko. Hori horrela, Karraspio hondartzan 24 etxebizitza eta 125 autorentzako aparkalekua egiteko aukera bermatu du aldundiak. Lea-Artib…

Bilduk mugikortasun irizpideak berrikusteko eskatu dio aldundiari »

Arratia, Busturialdea, Uribe Butroe, Lea-Artibai eta Durangaldean Bilduk dituen hautetsiek azken urteen mugikortasunean erabili dituen irizpideak aldatzeko eskatu diote Bizkaiko Foru Aldundiari. “Egoera sozioekonomikoa latza da, eta gure eskualdeetan mugikortasunean zein errepideetako segurtasunean hutsune handiak daude. Orain urte batzuk erabaki ziren hainbat inbertsioren gainean planteamendu berriak egitea nahi genuke”, ohartarazi diote.

Duela urtebete onartu zen Bizkaiko Errepideen Plan Sektoriala. Koalizioak gogorarazi du orduan baino egoera ekonomiko “okerragoa” daukagula. Hala, aurreikusitako guztia betetzeko gaitasunaren inguruan “zalantza” agertzeaz gain, “ezinbestekotzat jo izan dituzten bestelako azpiegiturek” —Bilbo hegoaldeko saihesbidea eta Artxandako tunelak— “porrot” egin dutela salatu dute.

Errepide ardatzei dagokienez, hautetsioi iruditzen zaie aukeraketa “irizpide politikoak” aintzat hartuta egin dela. Diotenez, udan eraikitzen hasiko diren errepideek ez dituzte inguru horietako arazoak konponduko. Gerediaga-Elorrio errepideak “ingurumen eragin izugarria” izango du, Bilduren iritziz, eta, ez dute argi “N-636 errepidearen zirkulazio bolumena jaitsiko denik”. Autzaganeko errepidearen kasuan, tunela egitea gaitzetsi dute, eta errepidea trenbidearen paretik egiteko eskatu. Bermeoko saihesbideak, azkenik, ez du herriak duen zirkulazio arazoa konponduko, Bilduren ustetan.

Gainera, kanpoan utzi diren inguruek segurtasun eta zirkulazio arazoekin jarraituko dutela nabarmendu dute. “Herriguneak zeharkatzen dituzten errepide arriskutsuak edo zirkulazio astun asko hartzen dituzten berrikusi eta konpondu behar dira”. Hautetsiok euren eskualdeek duten garraio publiko hobearen beharraz ohartarazi dute; batez ere, tren zerbitzu hobearen premia azpimarratu dute.

Koalizioaren iritziz, foru aldundiak “herrien lekuan jartzen” jakin behar du. “Guztion artean garatu eta adostu behar dugu Bizkaiko mugikortasun politika”.

Foru Aldundiak “irizpide teknikoen arabera” hautatu ditu egingo diren errepideak »

Itziar Garamendi Bizkaiko Diputazioko Herri Lan eta Garraio diputatuak aurreikusitako errepide ardatzetako batzuk zergatik atzeratu dituzten azaldu du Bizkaiko Batzar Nagusietan, Herri Lan eta Garraio Batzordean egindako agerraldian. “Krisi ekonomikoak etenik ez duelako eta aurrerantzean zer gertatuko den ez dakigulako, hartu behar izan dugu halako erabakia”, jakinarazi die batzarkideei. Hiru proiekturekin uda honetan bertan hastea eta beste hirurak gerorako hustea, ez dela auzazko erabakia izan ohartarazi du ahaldunak: “Irizpide teknikoak erabili ditugu lehentasunak ezartzeko orduan”.

Garamendiren esanetan, hainbat kontu hartu dituzte kontuan. Lehenik, errepide horrek zerbitzu emango dion herritar kopuruari erreparatu diote. Bigarrenik, eskualdeak duen jarduera ekonomikoa zenbatekoa izan da irizpidea. Inguru horretako errepideen pertsona zein zama zirkulazioa ere aintzakotzat hartu dute. Hala, horiei denei erreparatuta, diputazioak ondorioztatu du “premia gehienekoak” direla Gerediaga (Abadiño) eta Elorrio arteko errepidea, Zornotza eta Muxika Autzaganeko tunelaren bidez lotuko dituena eta Bermeoko saihesbidea.

Oposizioa ez dago ados. PSE-EEk, kasurako, irizpide politikoa erabili dutela egotzi dio Garamendiri. Hala, Ermuko saihesbidearen lanak atzeratzeko “arrazoi bakarra herriko alkatea alderdi sozialistakoa” izatea dela leporatu dio Paulino Colmenero bozeramaile sozialistak. Diputatuak barik, talde jeltzaleko bozeramaile Nerea Ahedok erantzun dio salaketa horri: “Halako irizpidea jarraitu izan balitz, beste errepide ardatz batzuk ere ez lirateke egingo. Nork du, ba, agintea Gernika-Lumon edo Bermeon?”. Ahedoren esanetan, Colmenero “Ermuko saihesbideaz baino ez da kezkatzen, herriko alkatetza dutelako”. Haren irudiko, Bizkaiko gainontzeko errepideei sozialistek “ez diete kasurik egiten”.

PPren bozeramaile Jesus Isasik gogor kritikatu du, beste behin, erabakia. Haren esanetan, errepide ardatzek ekonomia sustatuko dute. “Eraikiko ez badira, ez dugu ekonomia berriz piztuko, eta lehengo krisi egoera berberean jarraituko dugu”, agertu du kexua. Gainera, aurreikusita zegoena ez betetzea, “seriotasun falta larria” dela iruditzen zaio Isasiri: “Herrialdeko Errepide Plan Orokorra alderdi politiko guztien [aurreko legegintzaldiaren bukaeran] adostasunarekin onartu zen, denak batera egiteko konpromisoa hartu zuelako aldundiak”. Gainera, aurtengo aurrekontuen eztabaidan plana bere horretan gordeko zela esan zietela leporatu dio Garamendiri; “hain zuzen ere, errepideen erdia ez dela egingo jakinarazi baino hiru aste lehenago baino ez”. Diputatuak ukatu egin du akordioa hautsi dela: “Erritmoak aldatu ditugu, besterik ez”.

Isasik, gainera, inprobisatzen ibiltzea leporatu dio. Horren adibide jarri du Getxo eta Leioa arteko korridorea: “Ez zegoen planean jasota, ez du aurrekonturik ezarrita, eta bi urte eta erdiz maketa hutsa izango da”.

Bilduko bozeramaile Joseba Gezuragak diputatuari ohartarazi dio finantzaketa arazoak plan osoa berriz egituratzeko aprobetxatu behar izan dela. “Batzar Nagusietara ekarri behar zenuten auzia, denon artean plan berri bat osatzeko, eta ez foru aldundiaren nahien arabera moldatu”.

Zierbena farmazia barik gera daiteke martxotik aurrera »

Zierbenako herritarrak farmazia zerbitzurik gabe gera daitezke datorren martxotik aurrera. Izan ere, gaur egun Bilboko Elizbarrutiarena den lokal batean dago herriko farmazia. Gotzaitegiak, baina, alokairu kontratua bukatutzat eman duela jakinarazi di…

Erabilera adosteko unea »

Azkenean ez da luxuzko hotelik ez antzekorik eraikiko. Getxoko Horacio Etxebarrietaren galeriak —Punta Begoñako galeriak modura ezagunagoak— herritarren erabilerarako zaharberrituko ditu udalak. Imanol Landa alkateak iragarri duenez, “lehen mailako baliabide turistikoa” izango dira aurrerantzean. Modu horretan bukatuko da hainbeste urteko auzia.

Galeriak egoera txarrean daude, oso kaltetuta. Zaharberritze lanak hainbeste luzatu izanak kostuak handitu ditu, eta Barcelo kateari ez zaio errentagarri hotela eraikitzea. Hala, kateak utzitako 1,2 milioiak erabiliko dira, besteak beste, konpontze lanak egiteko. Izan ere, 8,6 milioiko bermea ordainduta zeukan. Gehiena berreskuratu egin du, baina aipaturiko kopuru hori galdu egin du. Bizkaiko Foru Aldundiak beste bi milioi jarriko ditu lanok egiteko. Oposizioak alkatea egin du gatazka horren erantzule.

Adibidez, PPko zinegotzi Marisa Arruek salatu du “garesti” atera zaiela egitasmoa getxoztarrei. “Galeriak lehengoratzeko aprobetxatu ahal izan ditugun bost urte galdu ditugu. Horren ondorioz, erortzeko zorian geratu dira”, ohartarazi du. Penatu egin da, hala ere, herrian egitekoak ziren proiektu pribatu handiena bertan behera geratu delako.

Dena dela, poztasuna agertu du Bilduk, publiko izaten jarraituko dutelako. Horri lotutako aldarrikapen indartsua egon dela gogoratu du Maitane Nekaran zinegotziak, eta koalizioko hautetsiek hala izan dadin erabakiak gertutik jarraituko dituztela iragarri du. PSE-EEko zinegotzi Luis Almansaren esanetan, Landa alkateak hasieratik jakinarazi behar zien hotelaren jabeei galeriak egoera txarrean zeudela: “Horrek eragin du, batez ere, proiektuaren porrota”.

Erantzukizunak erantzukizun, aurten lan txiki batzuk egingo dituztela iragarri du Getxoko Udalak. Argi utzi dute ez dagoela erortzeko arriskurik, baina, zatiren bat edo beste egituratik aska daitekeenez, horrelakorik gertatzea eragotzi nahi dute aurtengo konponketa horiekin. Gerora, zaharberritze sakonagoa egin beharko litzateke, baina ez dago ezer zehatzik finkatuta. “Paper kontu asko egin behar dira zaharberritze zientifikoa egin ahal izateko”, ohartarazi du Joseba Arregi Hirigintza zinegotziak.

Ia ehun urteko historia

Horacio Etxebarrieta getxoztar dirudunak XX. mende hasieran jasotako etxaldeari eusteko eraiki ziren 1918an. Ricardo Bastida arkitektoak zuzendu zituen lanak. Mendixka ez zela hondartzara eroriko ziurtatzea: hori zen horma berezi honen egitekoa. Inguruari ez zitzaion edertasunik kendu nahi izan, eta Etxebarrietak elementu dotorea eraikitzeko eskatu zuen.

Etxebarrietaren ondorengoek etxegintza enpresa bati saldu zioten etxaldea 1973an, etxeak eraikitzeko. Orduan desagertu zen Etxebarriatarren etxea. Galeriek, ordea, gaur egunera arte irautea lortu dute. Bizkaiko Foru Aldundiak, gainera, ondare historiko eta artistiko izendatu zituen.

“Erabilera publikoaren eztabaida piztu behar dugu orain” »

Urtean daramatza Gorrondatxe kultur elkarteak Horacio Etxebarrietaren galerietan hotela eraikitzeko proiektua bertan behera uzteko borrokan. Christian Reinicke kidearen esanetan, “oso pozik” hartu dute berria.Azkenean ez da hotelik eraikiko. Hori nahi…

Udal etxebizitzak alokairuan emateko irizpideak aldatzeko asmoa du Bilbok »

Bilboko Udal Etxebizitzak erakundeak etxe sozialak emateko araudia aldatuko du datozen hilabeteetan. Egun, hiriburuan gutxienez bi urte erroldatuta egondakoei ematen die bizitokia, alokairuan; Rikardo Barkala Hirigintza, Etxebizitza eta Ingurumen zine…

“Aurkitu dugun panorama uste baino beltzagoa izan da” »

Iratxe Arriolak (Ea, 1980) Busturialdeko Ur Partzuergoaren egoera ekonomikoa zuzentzea du lehentasun. Dena dela, garrantzia eman dio ur politika “iraunkorrak” eta “herritarren parte hartzea” bideratzeari ere. Joan den urteko urrian hartu zenuen Bustur…

Europan lan egiten ikasteko enpresa bat sortzen ari dira Mungiako hamasei ikasle »

Mungia BHI institutuko hamasei ikasle Europako Comenius programan sartuta daude. Helburua da Europako sei herrialdetako ikasle batzuen artean enpresa bat sortzea. Horren atzean, baina, helburu gehiago ere badaudela gogora ekarri du Mungiako institutuan proiektua gidatzen duen Mariano Roman Campos irakasleak. Hain zuzen, ikasle horiek Europan lan egiteko pertsona gisa heztea.

Bide horretan orain arte egindako lanarekin “oso pozik” agertu da Campos. Izan ere, joan den asteko eguaztenetik domekara bitartean Portugalen izan zen ikasleekaz batera. Parte hartzen duten gainerako herrialdeetako ikasleak eta irakasleak ere han izan ziren, eta irakasleari “azpimarratzekoa” iruditu zaio Mungiakoek erakutsitako jarrera. “Ingelesez DBHko maila baino ez badute ere, ondo moldatu ziren, eta herrian bertan giro atsegina sortu zuten”, azaldu du. Bidaia horren ostean, Romanek uste du ikasleek ikusi dutela “helduak direla eta gai direla munduan euren kabuz ibiltzeko”. Horren haritik, “bizitza proba gainditu dute”, ondorioztatu du.

Edari bat eta gozo bat

Mahatsondoetatik eta olibondoetatik eratorritako produktuak ekoitziko ditu Europako sei herrialdetan sortzen ari diren enpresa horrek, “naturaren aberastasunean oinarrituta”. Produktuaren ekoizpena Zipreri dagokio. Batetik, zivania deritzon edari alkoholdun bat egingo dute. “Uxualaren antzekoa da”, azaldu du. Beste produktua, gozo bat da: “Mahatsez eginda dagoen erregaliz baten antzekoa da, eta barruan intxaurrak ditu”.

Mungiako institutuko ikasleen lana produktuaren garapena eta marketina egitea da; eta horretan ari dira 17 eta 40 urte arteko ikasleak —administrazioa, mekanizazioa eta elektrizitatea ikasten ari dira—.

Produktuen aurkezpena datorren apirilean egingo dute. Ekitaldi horretarako, Hungaria aukeratu dute, eta han bat egingo dute bateko eta besteko ikasleek.

Enpresa benetan gauzatuko duten ala ez zalantzan dago oraindik. Mungiako institutukoek sortu egin gura dute; baita Ziprekoek eta Portugalekoek ere. “Aurrera eraman gura dugu enpresa. Ikasleak independente egin nahi ditugu; baina Hungariakoek, Italiakoek eta Poloniakoek maila teorikoan utzi gura dute proiektua. Beraz, guztion artean adostu behar dugu”, azaldu du Mungiako irakasleak.

Dena den, Mariano Romanek gogorarazi du antolaketa lanetan baino ez dabiltzala oraingoz. “Galdetegi bat egin genuen institutuetan, ikasleek Europari buruz zenbateko ezagutza zuten ikusteko”. Proiektua bukatu ondoren, ezagutza hori areagotu den aztertu gura dute. Enpresa bat sortzeko eman behar diren pausoak ezagutzen ote dituzten ere galdetu diete ikasleei. Aztertu nahi dute ikasleek gai horrekiko duten ezagutzak ere gora egin duen proiektua amaitu ostean.

Datorren urteko ekainean bukatuko dute proiektua, Polonian. Lehenago, hainbat pauso dituzte oraindik emateko. Martxoan, esate baterako, Mungian izango dira herrialde guztietako ordezkariak.

Nekazaritza arloko zaborra biltzen dute hiru eskualdetan »

Nekazaritza ustiategietako hondakinak jaso beharraren kontzientzia zabaldu behar dela deritzo Urkiola garapen elkarteak. Izan ere, jakinarazi duenez, Durangaldeko, Lea-Artibaiko eta Mungialdeko eskualdeetan —inguru horietako nekazaritzaren ardura daukate landa garapen elkarteek— “nekazarien parte hartzea gora doan arren, parte hartzen ez duten ustiategiak gehiengoa dira oraindik”.

Eskualde horien artean, Lea-Artibaik darama denbora gehien hondakinak jasotzen. Hain zuzen, 2009an ekin zioten zabor horiek jasotzeari. Horren ondorioz, han jasotzen dute plastiko kopururik handiena.

Lea-Artibai Landa Garapen elkarteak egiten du eskualde horretan nekazaritza ustiategien eta hondakinak kudeatzeko ardura dutenen arteko bitartekari lana. Landareen eta animalien osasunerako erabiltzen diren produktuen ontzi hutsak, berotegietako plastikoak, silo bolak eta siloa jasotzen dituzte. Agortutako artzain pilak biltzeko kontainer berezi bat ere jarri dute. Iaz, guztira, landareen eta animalien osasuna zaintzeko erabiltzen diren produktuen 700 ontzi huts baino gehiago jaso zituzten. Berotegietako plastikoari, siloei eta silo bolei dagokienez, berriz, 70 tona inguru bildu zituzten.

Hondakinen bilketa horretan era eta tamaina guztietako nekazaritza ustiapenek parte hartzen dute, Urkiola Landa Garapen elkarteak jakinarazi duenez. Ontzi hutsen bilketa Markinako Miba kooperatiban egiten dute, hiru hilerik behin. Berotegietako silo bola eta siloei dagokienez, urtean birritan jasotzen dituzte, aurretik ezarritako lekuetan.

Durangaldean, bestalde, 2010ean ekin zioten hondakin mota horiek birziklatzeko bilketa lanei. Eskualde horretan ere, Lea-Artibain jasotzen dituzten produktu berak biltzen dituzte. Han ere, artzain pilak uzteko kontainer berezi bat jarri dute.

2011n, 700 ontzi huts baino gehiago jaso zituzten. Berotegietako plastikoari, siloei eta silo bolei dagokienez, berriz, 25 tona inguru bildu zituzten. Han, txakolin ustiategiek parte hartzen dute, batez ere, hondakinen bilketan.

Ontzi hutsak Abadiñoko Diba kooperatiban jasotzen dituzte, hiru hilean behin. Plastikoak, berriz, urtean birritan jasotzen dituzte, aurretik ezarritako tokietan.

Mungialdea, hasi berritan

Mungialdea da nekazaritzako hondakinak jasotzeko proiektuan sartu den azken eskualdea. Iaz ekin zioten lan horri, Jataondo landa garapen elkartearen eskutik.

Beste bi eskualdeetan biltzen dituzten produktu berak jasotzen dituzte han ere. Berotegietako plastikoari, siloei eta silo bolei dagokienez, 25 tona inguru jaso zituztela jakinarazi du landa garapen elkarteak. Plastiko mota horren bilketari hasiera-hasieratik “gogor” ekin diotela deritzo elkarteak.

Ontzi hutsak Mungia eta Lezamako nekazaritza kooperatibetan jasotzen dituzte, hiru hilean behin; plastikoak, urtean birritan, aurretik ezarritako lekuetan.

Urkiola Landa Garapen elkartearen esanetan, aipatzekoa da proiektuan parte hartzeari ekiten dioten nekazariek eutsi egiten diotela lan horri.