Museoak handituko dituzte

Museoak handituko dituzte

Amaia Igartua Aristondo

Itxialdiaren hilabeteak atzean utzita, 2021a proiektuak ekin edo amesteko urtea izan da Bilboko hainbat museorentzat. Arte Ederren Museoak eta Euskal Museoak handitzeko planak aurkeztu dituzte aurten, eta aspaldiko asmoari hauspoa eman dio ostera ere Guggenheimek: Urdaibain bi egoitza egiteko proiektua proposatu dute Europa Next Generation diru funtsetarako.

2019ko udan jakinarazi zuten Norman Foster arkitektoaren irizpideari jarraituta handituko zela Arte Ederren Museoa: Luis Maria Uriarterekin batera ondutako Agravitas proiektua gailendu zen lehiaketan. 2021eko ekainean, behin betiko plana aurkeztu zuten, eta hainbat berritasun erantsi. Hasierako proposamenean, erabat itxia izango zen eraikin zaharraren gainean jarriko zuten aretoa, baina, azkenean, aire zabaleko erakustoki bat izango du: 1.500 metro koadroko areto itxi bat eta 700 metro koadroko terraza bat gehituko dizkiote museoari, eta terraza hori eskulturak erakusteko baliatuko dute. “Terrazak kanpoko itxura hobetuko dio: lirainagoa izango da, eta proportzio hobeak izango ditu”, azaldu zuen Fosterrek planaren aurkezpenean, ekainean, Bilbon.

Eremu berrian, bulegoak ipiniko dituzte, baita hezkuntza eta zabalkunde jardueretarako gelak ere; horiek erakusketa aretora lotuta egongo dira idi-begi gisako leiho baten bidez. Hori horrela, erakusketen, heziketaren eta hedapenaren aldeak uztartuta egongo dira.

Denek ez dute begi onez ikusten egitasmoa, halere: arkitekto talde batek Arte Ederren Museoaren Defentsa Zibikoa plataforma sortu du, proiektua eten dadin eskatzeko, “burugabekeria” baiteritzote. Besteak beste, deialdiaren oinarriak “urratzen” dituela diote, Agravitas-ek jasotzen baitu 10.000 metro kubiko eraikitzea lehiaketak ezarritako mugetatik kanpo, salatu dutenez. Edonola ere, azaroan hasi ziren eraikin zaharra atontzen, eta datorren udaberrian ekingo diete obrei, ondo bidean.

Euskal Museoaren osoko birmoldaketa, berriz, abian da jada. Urriaren 11n zarratu zituzten ateak, eta 2023an irekitzea dute xede. Antonio Vailloren eta Juan Luis Irigarairen arkitektura estudioak eta Jesus Moreno y Asociados museografia estudioak ondu dute proposamena, eta uztailean aurkeztu zuten behin betiko eredua: Eko nekta du izena, eta 6.400 metro koadro gehituko dizkio museoari; %38 handituko da, hain zuzen. Obrek hamabost milioi euroren kostua izango dute.

Bilboko museoaren sarrera Gurutze kalean jarriko dute, ikusgaitasuna lortzeko —Unamuno plazan izan du orain arte—, eta hiru gune handiak bateratuko dituzte. Kanpotik begiratuta ere uniformetasuna emango diote museoa osatzen duen eraikin multzoari. Besteak beste, hiru zatitan bananduko dute Miserikordia gunea, haritzaren morfologian oinarrituta, eta klaustroaren itxura ere aldatuko dute: jatorrizko arkuak solairu guztietan egingo dituzte, eta leiho erabat gardenak jarriko dituzte horien artean, bildumako piezak hainbat tokitatik ikusi ahal izateko.

Guggenheim Urdaibain?

2008tik, Guggenheimek Bizkaian hedatzeko nahia du: orduko hartan, egoitza berria Sukarrietan zabaltzea proposatu zuten; hamar urteren ostean, 2020ra arteko plan estrategikoan sartu zuen museoak, eta, 2020ko abenduan, Europako funtsak jasotzeko Jaurlaritzaren proiektuen zerrendan ageri zen Guggenheim Gernika, Bilboko Guggenheim museoaren zabalkuntza berdea. Berriro hizpide da Guggenheim Urdaibai.

Han, bi egoitza egin nahi dituzte: bata Gernika-Lumon, Dalia lantegi zaharraren orubean, eta, bestea, Muruetako ontziolan. Bi guneak “bide berde” batek lotuko lituzke, museoaren patronatuaren arabera, eta han artelanak ipiniko lituzkete. Zabalkuntzaren aurrekontua 120 milioi eurokoa da, eta horietatik 81 Europako Batasuneko funtsekin ordaintzeko asmoa dute; gainontzekoa, tokiko erakundeetatik eta inbertsore pribatuetatik lortuko lukete.