“Uste dut inauteriek jatorrian zeukaten zentzua galdu egin dutela” »

Inauteriak, karnabalak eta aratusteak: festa berbera deitzeko hiru izen ezberdin. Ezberdina da ere festa horrek Bizkaian izan duen ibilbidea, nahiz eta azkenaldian indartu egin den. Hala nabarmendu du Akaitze Kamiruagak, Labayru ikastegiko herri ondar…

30 milioi euro ekarriko ditu munduko saskibaloi kopak »

“Irabazi handiak” ekarriko dituzte Bizkaira munduko saskibaloi kopako lehen faseko partidek. Hala iragarri du Bizkaiko Foru Aldundiak. Kopak izango duen eragin ekonomiko eta soziala aztertzeko, txosten bat egin dute. Jasotako datuen arabera, 30 milioi…

Udalaren izenean egindako dei faltsuez ohartarazi dute »

GIZARTEA. Leioako Udaltzaingoak ohartarazi duenez, herriko adinekoak udalaren izenean egiten dizkieten telefono dei faltsuak jasotzen ari dira. Etxerako terapia zerbitzuak eskaintzen dizkiete dei horien bitartez. Udalak herritarrei gogorarazi die ez d…

Ontziolarako lan karga eskatu dute Sestaoko Navaleko beharginek »

Sestaoko Naval ontziolako langileek manifestazioa egin zuten joan den eguazten goizean. Ontziolatik bertatik atera eta Santurtzira arte egin zuten martxa, eta lan karga aldarrikatu zuten beharginek. Horrez gain, erakundeei eta ontziolaren jabeei erreakzionatzeko deia egin zieten; baita ontziolaren etorkizunaren eta euskal ontzigintzaren aldeko apustua egin dezaten ere.

Naval konponbidea. Lan karga, berehala! lelodun pankarta baten atzean egin zuten Santurtziko parke nagusira arteko bidea. Bertan, enpresa batzordearen komunikatua irakurri zuten. Ohar horretan ohartarazi zutenez, martxoan entregatuko dute oraingoz aurreikusita daukaten azken ontzia. Horren ostean, ontziola “oso egoera larrian sartuko da, eta haren etorkizuna kolokan gera liteke”.

Enpresa batzordeak gogora ekarri zuenez, Naval da “azken industria bastioia”. Ontziolan, egun, 1.500 langile daudela azaldu zuten —behin-behineko beharginak eta finkoak zenbatuta—. Horrez gain, ontziolaren egoerak eragin negatiboa izango du “zerbitzuen sektorean eta Ezkerraldean”, haien iritziz. Horren harira, eskualdeko langabezia tasa altua gogoratu zuten.

Era berean, interes komunak dituen euskal ontzigintzaren kolektiboa sortzeko eskatu zuen enpresa batzordeak. Helburua administrazio publikoan eragina izatea eta sektoreko interesen aldeko erabakiak sustatzea litzateke.

Beharginen ustez, ezin daiteke utzi “ahalmen industrial handia duen” Navalen gisako enpresa historiko batek ontzien kontrataziorik gabe jarraitzea, beste ontziola batzuek kontratuak tax lease bitartez edota kontratu zuzenak gauzatuz egiten dituzten bitartean. Tax lease kostu ekonomiko handiko produktuak erosteko baliatzen den sistema bat da. Haren helburua da enpresa erosleek ahalik eta zerga txikienak ordaintzea, eta, hartara, erosleari produktua bera merkatzea. Sektore eta enpresa askok erabili dute sistema hori, baina bereziki mesedegarria izan da ontziolentzat, beren produktuen kostuak gutxitu zitzaketelako lehiakideei aurre egiteko aukera gehiagorekin.

Enpresa batzordeak salatu zuenez, ontziolak kontratu berririk eskuratzen ez duen bitartean, 2010az geroztik bederatzi lan erregulazio txosten izan dituzte. “Beharginek langabezia gastatzen jarraitzen dute, eta Ezkerraldean beharrik gabe daudenen kopuruak goraka segitzen du”.

Eguazteneko martxak Sestaoko Udalaren babesa ere izan zuen. Hain zuzen, alderdi guztiek onartu zuten ontziolari babesa emateko adierazpena. Navalen bideragarritasuna bermatzeko beharrezko neurri guztiak hartzeko eskaera ere egin zuten adierazpen horretan.

Arabako Biltzarrek Gasteiz eta Durango arteko autobus lotura hobetzea onartu dute »

Arabako Biltzar Nagusiek Durango eta Gasteiz arteko autobus zerbitzua hobetzeko eskaria onartu dute. Durangoko Udalaren eskariz eraman zuten mozioa Gasteizera. Hala ere, EAJk aurkeztutakoaren ordez, PP ez beste alderdi guztiek adostu zuten beste bat o…

Gora dator itsasoa »

Euskal Herriko kostetan aspaldi ikusi gabeko irudiak utzi ditu itsasoaren indarrak aurtengo neguan. Askotan klima aldaketari egotzi zaizkio horrelako gertakariak. Hala ote? “Itsasgora biziak gero eta sarriago gertatuko dira aurrerantzean”. Hala adiera…

Hondakindegietara zabor gutxiago bidali du Bizkaiko TMB plantak »

Iazko otsailean jarri zen martxan Bilboko TMB tratamendu mekaniko-biologikorako planta. Horrek 2013an zabortegietara hondakin gutxiago bidaltzea ekarri duela adierazi du Iosu Madariaga Bizkaiko Ingurumen diputatuak. Datuen arabera, Bizkaian sortutako hondakinen %16 soilik bidali da zabortegietara; aurreko urtean baino %41,5 gutxiago. Gainera, gaikako bilketaren indizea ia %50era iritsi zela adierazi du.

Edukiontzi berdeetan batzen denaren zati bat kudeatzen du TMB plantak. Bizkaian, 300.000 tonatik gora errefusa sortzen da urtero, baina 180.000rentzako ahalmena baino ez du azpiegiturak. Zabor nahasia banatu eta tratatu egiten dute han, eta gero, bideratu. Horregatik txertatu du diputazioak TMB planta gaikako bilketaren barruan.

Datuen arabera, Bizkaiko etxe eta merkatariek 605.000 tona zabor sortu zituzten iaz. Horietatik %34 Zabalgarbira bidali zituzten zuzenean; TMB plantatik eta bigarren mailako fluxuetatik heldutako 21.000 kontuan hartuta, 227.463 tona zabor erraustu ziren iaz. Baina birziklatutako hondakin kopurua handiagoa dela adierazi du diputatuak: 278.362 tona, hondakinen ia %46 —datu horren barruan sartu dute erraustean balioztatutakoaren zati bat—. Bestalde, 3.544 tona baino ez zituzten konpostara bideratu: zabor guztiaren %0,58.

Izenak egiten du izana BECen »

Bilbotarra nahi duen lekuan jaiotzen dela esan ohi dute, harro jarreran, Bizkaiko hiriburuan. Hala ere, badago esaera horri kontra egin eta berea defendatzeko prest dagoenik ere. Horren adibide dira Barakaldoko biztanleak, senide nagusiak egindako “kolonizazioa” arbuiatu eta Bilbo eta beren jaioterria ezberdindu nahi dutenak. BEC erakustazoka da beren aldarrikapenaren muina.

Izan ere, datozen hilabeteetan Munduko Saskibaloi Txapelketa jokatuko da BECen. Barakaldon kokatuta egon arren, haren izenak —Bilbao Exhibition Centre— ez du dudarako tarterik uzten, batik bat atzerritik etortzen denari. Azkenaldian polemika piztu da pabiloitzarraren izenak Barakaldo ez duelako aipatzen, eta horrek Barakaldo bezalako hiri bati kalte egin diezaiokeela diote batzuek. Polemika azkenaldian suspertu da, baina iraganetik datorren arazoa dela diote ustezko kaltetuek. Aurrerantzean, hori izango da Alfonso Garcia Barakaldoko alkatearen aldarrikapen nagusia: “Bilboren izena atzean utzi eta Barakaldo egoitza gisa aitortu ahal izatea”.

Hala ere, ez da kasu bakarra. Bilboren izena daukaten hainbat egitura daude sakabanaturik inguruko eskualdeetan barrena. Horren adibide dira Bilboko Portua (Santurtzi), Bilboko Aireportua (Loiu) eta Bilboko hilerria (Derio). Hala ere, beste herrialde batzuetan ez da gauza bera gertatzen. Espainian, Madrilgo aireportuaren kasuan, adibidez, Madrid-Barajas da izen ofiziala. Eta gauza bera gertatzen da Herrialde Katalanetan Bartzelonakoarekin; horretan ere Barcelona-El Prat da izena.

“Kontrabando kargak topatzen dituztenean Santurtziko portuan izan dela diote, eta lanpostuak sortzen dituztenean, berriz, Bilbokoan”, kexatu da Santurtziko Udala. Polemika indartzeko asmorik gabe agertu da Ricardo Ituarte Santurtziko agintaria. Hala ere, egitura horri behar besteko kasua egiteko eskatu du hark zuzentzen duen gobernu taldeak. “Beti ari gara alde negatiboari begira. Alde positiboa ikusten hasi beharko genuke”.

Dena den, azkenaldian indartzen hasi da Ezkerraldeko herriaren eta Bilboko Portuko zuzendaritzaren arteko harremana. Horren erakusle da erakunde biek duela gutxi lortu duten akordioa. Horri esker, Santurtziko ehun langabek Bilboko Portuak eskaintzen duen lan prestakuntza egin ahal izango dute, etorkizunean langilerik behar bada horiek jadanik prest izateko. “Badirudi mugarri esanguratsu batean gaudela”, dio Ituartek.

Barakaldon, ordea, ez dago mugarririk. Hala dio Alfonso Garcia alkateak, bederen. Izan ere, beren eskaera “maldan behera” doala iruditzen zaio. “Nahiz eta aldarrikapena ez den berria, orain jarri da agerian. Argi dago BECen izena ez dela bidezkoa. Horren inguruan beti izan gara eskuzabalak, eta hainbat aukera eman dizkiogu; Bizkaia Exhibition Centre izena proposatu dugu, adibidez”. Duela gutxi, Jose Luis Bilbao ahaldun nagusiarekin batzartu da Garcia, eta barakaldar askoren haserrea helarazi zion.

Herenegun, mozioa aurkeztu zuten Barakaldoko Udalean, erakustazokari Bilboren izena kendu eta Barakaldo jartzeko. Gainera, gutun bana bidali diete Nazioarteko Saskibaloi Federazioari (FIBA), Espainiako Saskibaloi Federazioari eta Barakaldon jokatuko duten estatuetako enbaxadei.

Garciak bere aldarria eginerraza dela erakusten duen adibidea jarri du: “Bartzelonako olinpiar jokoen sasoian, saskibaloi partidak Badalonako olinpiar estadioan jokatzen ziren. Hori zen haren izen ofiziala”. Bruce Springsteenek edota Iron Maidenek BECen jotzen duten aldiro, berriz, hedabideetan Bilbon izaten dela diotela kritikatu du. “Nork jartzen du dirua Udaltzaingoa han egon eta ingurua garbitzeko?”.

Gatazka konponduko bada, izen aldaketarekin konponduko dela uste du Garciak: “Temati jarraituko dut, hau guda luzea baita”. Bitartean, Bilbao Exhibition Center izenak beteko ditu hedabideetako orriak.

Plentziako gaztetxeak proposatu dion proiektua onartu du udalak »

Plentziako Ermitatze gaztetxearen etorkizuna forma hartzear dago jada. Izan ere, udalak onartu egin du gaztetxeko batzordeak aurkeztu duen proiektua. Hartara, gazteek azpiegitura erabiltzen jarraitu ahal izango dute.Horren arabera, eraikina lau eremut…

Etzi, basogintzari eskainitako azoka egingo dute Arrietan »

Hileko lehen domekako azoka egingo dute igande goizean Arrietan. Zuhaitz eta fruitu arbolen hainbat haztegi elkartuko dira, ohiko ekoizleekin batera. Landareez gain, ortuari, esneki, txakolin, marmelada eta enparauak egongo dira salgai. Egur mozketare…