Plentziako alkateak EAJko zinegotziak sailik gabe utzi ditu »

Plentziako Udalak gobernu krisia izan du asteon, udal hauteskundeetatik bi urte ere igaro ez direnean. Orain arte zituen lau zinegotzigoen ardura kendu dio EAJri Isabel Zarauza alkateak —Plentziako Talde Independentea—. Zinegotzi jeltzaleek joan den asteko eguenean egindako osoko bilkuran udal aurrekontu proiektuari ezezkoa eman ostean hartu du erabakia. Aurrerantzean lau sail horiei dagozkien eskumenak ere Plentziako Talde Independenteko lau zinegotzien esku egongo dira. Eta, ondorioz, udal gobernua gutxiengoan egongo da agintaldia bukatu arte.

Hauteskundeen ostean jeltzaleek eta independenteek Isabel Zarauza alkate izendatzeko akordioa adostu zuten. Sei botoren aldearekin irabazi zituzten hauteskundeak independenteek. Bi taldeek launa zinegotzi eskuratu zituzten. Independenteek udala osatzen duten zortzi sailetatik lauren ardura eman zieten zinegotzi jeltzaleei: Obrak, Zerbitzuak eta Kirol Saila, Gazteria Saila, Merkataritza eta Jaietako Saila, eta Itsasadarra, Portua, Hondartza eta Turismo Saila. Isabel Zarauzak ez dituztela “halako bidaia lagunak” gura esan dio Plentziako EAJri. Baina Javier Artaza bozeramaile jeltzaleak duela ia bi urteko akordio hura ekarri dio gogora: “Adostu genuen gu ez ginela udal gobernuko kide izango, eta jarduteko erabateko askatasuna izango genuela. Are gehiago, ez zuten gura izan gu udal taldeko kide izaterik. Beraz, orain horren arabera jokatu dugu”. Hau da, Artazaren arabera, jeltzaleek euren lau sailen ardura zuten, eta, gainontzeko lauri zegokienez, oposizioko kide izatera pasatuko ziren. “Badirudi independenteek ulertu zutela gu beti euren alde agertuko ginela”, gaineratu du.

Udal gobernuak 4,3 milioiko aurrekontu proiektua aurkeztu zuen. Plentziako Talde Independentearen lau ordezkarien babesa baino ez zuen eskuratu. Lau jeltzaleek eta Bilduk dituen hiru zinegotziek aurka bozkatu zuten. Ordezkari jeltzaleen esanetan, ez zuten lortu “gogobetetzen dituen” akordioa adostea independenteekin. Diotenez, ez zetozen bat independenteek dirua udala osatzen duten sailetan banatzeko orduan erabilitako irizpideekin. Zarauzak euren jarrera kritikatuz erantzun die: “Hilabetez bildu dira bi taldeak aurrekontuak osatzeko, eta osoko bilkurarako hiru egun bakarrik falta zirela agertu ziren zuzenketekin. Eta euretako batzuk onartu egin genizkien. Hala ere, guztiak ezin genituen ontzat eman”. Adibidez, erretiratuen elkarteari diru laguntzak jaisteko eskatu zietela azaldu du. Bilduk, berriz, udal gobernuak haiek egindako “proposamen bat bera ere ez” zuela aintzakotzat hartu salatu du.

Ugaon, alkate berria

Izaskun Landaida (EAJ) Ugaoko alkateak kargua utzi du, Eusko Jaurlaritza berriak Emakundeko zuzendari izendatu ostean. Bigarren agintaldia zuen honako hau. Eudeleko Berdintasun arduraduna eta Indarkeriaren Bizkaiko Behatokiko kide ere bada.

Haren alderdikide Ekaitz Mentxakak beteko du hutsik geratu den lekua Ugaoko Udalean. Orain arte Kultura eta Jaien arloko zinegotzia izan da, eta alkateorde zereginak ere beregain zituen. Aurrerantzean, bada, bera izango da Ugaoko alkate.

Foru aldundiak ezetz esan dio Gaztetrans proiektuari »

Bizkaiko Ikasle Kontseiluak eta Bizkaiko Foru Aldundiko Garraio eta Herri Lan Sailak bilera egin dute Gaztetrans proiektuari buruz eztabaidatzeko. Ikasle Kontseiluak gazteentzako Creditrans txartela lortzea zuen helburu; hau da, metroan, autobusean, t…

Elkartasun gala, Bizkaiko Elikagaien Bankuarentzat »

Gizentasunaren aurkako kanpainaren amaieran, abenduaren 17an, sustatzaileek gala bat antolatuko dute Bilboko Euskalduna jauregian, Bizkaiko Elikagai Bankuarentzat dirua biltzeko xedearekin. Egun, oinarrizko elikadura ordaindu ezin duten 28.000 pertson…

Izen ofiziala Sopela izateko bidea, martxan »

SOPELA. Gaur egun, Sopelana da herriaren izen ofiziala. Euskaltzaindiaren Onomastika Batzordeak, baina, Sopela finkatu zuen euskarazko izen arautu gisa, herrian eta eskualdean euskaraz gehien erabiltzen dena delako. Jatorrizko Sopelana-k n hizkia gald…

Ezinbestekoa da ariketa fisikoa kontrolatzea »

Umeen dietari buruz hitz egitean, ezin dira kilokaloriak aldez aurretik neurtu. Haurrak hazte bidean daude, eta, adinaren arabera, kopuruak aldatu egiten dira. Gainera, ariketa fisikoa egiteak beharrizanak aldatzen ditu elikaduran. Garrantzitsuena da …

Kaleko dantzen lehia »

Dantza lehiaketa

Elorrio

Hiriko dantza eskaintzaren erakusleku eta lehiaketa gune bihurtuko da bihar Elorrio. Hain zuzen, Arriola izango da ikuskizun horren agertoki. Bertan, Akadantz kaleko dantzen bosgarren lehiaketa egingo dute. 18:00etatik aurrera jarriko dute martxan.

Bilboko Breakonstage jaialdian —Europan oso garrantzitsua da— parte hartzeko ateak zabaltzeko aukera izango dute biharko lehiaketara aurkezten direnek. Izan ere, Elorrion irabazle ateratzen direnek jaialdi horretan parte hartu ahal izango dute.

Era askotako diziplinatan lan handia egin duten gazteak igoko dira Arriolako agertokira: funky, house, urban dance, hip hop, breakdance, locking, popping… Gazteek eta zaleen mailako dantzariek oholtza gainean egiten dituzten erakustaldiak ikusteko aukera izango dute bertaratzen diren guztiek.

Lehiaketa eta erakustaldi izango den ikuskizun hori hiriko dantzarekiko zaletasuna duten gazte askorentzako topalekua izan ohi dela jakinarazi dute antolatzaileek, kontuan hartuta dantza horren diziplinak entsegu ordu asko eskatzen dituela, akademietan zein lagun artean. Arriola antzokiko kideek jakinarazi dutenez, jaialdiaren helburu nagusia “taldeak lan egiten segitzera bultzatzea eta animatzea da; horrexegatik, Arriola antzokiak euren lanak antzokiaren moduko inguru eszeniko batean erakusteko aukera ematen die”.

Lehiaketan hainbat alor izango ditu kontuan epaimahaiak. Hain zuzen ere, “originaltasuna, sormena eta koreografiak egiteko trebezia” aztertuko dituzte, batetik. Bestetik, musika sinkronia izango dute kontuan. Horrez gain, lehiakideek zer-nolako talde lana eratzen duten sarituko dute —bi eta sei gazte arteko taldeak lehia daitezke—. Azkenik, ezarritako iraupena betetzea ere kontuan izango dute —gutxi gorabehera, hiru minutuko erakustaldiak egin behar ditu talde bakoitzak—.

Gazteen sormena du oinarri Akadantz lehiaketak, eta Elorrioko Udalaren eta Bizkaiko Foru Aldundiaren laguntzarekin antolatzen du Arriola antzokiak.

PSE-EE: “Bizkaitarren interesak ez dira egon negoziazio mahaian” »

Sozialistek galdera batekin erantzun diote EAJk eta PPk adostutako akordioari: “Non galdu dira bizkaitarren interesak? Ez dira negoziazio mahaian egon”. PSE-EEren bozeramaile Iñaki Egañari “lotsagarria” eta “ikuskizun tamalgarria” iruditu zaio negoziazio prozesua.

EAJk eta PPk ukatu duten arren, “negoziazioa barik kromo trukea” izan dela iruditzen zaio. Bizkaiko aurrekontuak “Gasteizko Udalaren aurrekontuek baldintzatu” dituztela dio. “Eskuinaren aurrekontuak” direla ohartarazi du. Jose Luis Bilbaori onarpena hainbeste atzeratu izana ere leporatu dio, “negoziatzeko gaitasunik izan ez” duelako.

Ibaiondo barrutiko gurasoek euskarazko plaza publiko gehiago eskatu dituzte »

Ibaiondo barrutiko guraso taldeen plataformak ikasleentzako D ereduko plaza publikoak gehitzeko eskatu die Bilboko Udalari eta Eusko Jaurlaritzari. Izan ere, eskualdeko biztanleriak %15 egin du gora azken hamabost urteetan, eta eskaintzak bere horretan jarraitzen du.

Jokin Alberdi Atxuriko guraso elkarteko kideak azaldu duenez, plaza publikoen eskasiaren arazoa aspaldiko kezka dute. Plataformako ordezkariek uste dute auzoko eskola publikoaren egoera “ezin dela gehiago luzatu”, eta barrutiari dagokion eskola mapa berri bat diseinatu beharra dagoela deritzote. D eredua eskainiko duen plaza publikoen gehitzea eskatzen dute. Era berean, lan integratzailea beharrezkoa dela uste dute; “baztertze handia” duten eskolak ez dituzte “onartzen”.

Beste alde batetik, Bigarren Hezkuntza ikasi ahal izateko plazak handitzea nahiko lukete. “Lehen Hezkuntzako plazek gora egin dute; baina, maila horiek gaindituta, beste leku batzuetara joan behar dute, auzotik kanpora”, azaldu dute gurasoen elkarteko ordezkariek. Aukera bat jarri dute mahai gainean, Campuzanoko Lanbide Heziketa zentroa DBH eta Batxilergoa ikasteko toki bihurtzea, hain zuzen ere. “Lehenengo Hezkuntzako plazek gora egiten badute, baina, bigarrenekoak bere horretan jarraitzen badute, urte batzuen buruan gurasoek ez dute jakingo umeak nora bidali DBH ikas dezaten”, aditzera eman du Alberdik.

Guraso elkarteek eta Bilboko Udalak azaroan egin zuten bilera. Egoerak airean jarraitzen du, eta udalak eta Eusko Jaurlaritzak “elkarri baloia pasatzen diotela” diote dute kaltetuek. Horren harira, plataformak Iepa Naiz kanpaina ipini du abian; herritarrek argazki bat egin dezakete euskal eskola publikoaren alde.

D ereduan matrikulatu ezinik

Otxarkoaga auzoak 11.000 bizilagun inguru eta hiru ikastetxe ditu —Derrigorrezko Bigarren Hezkuntza eskaintzen duen itunpeko zentro bat eta bi eskola publiko—. Baina, umeak D ereduan matrikulatzea ezinezkoa da, ez baitago horren eskaintzarik.

Haurrak euskaraz ikastea nahi duten gurasoek, auzotik kanpo bidali behar dituzte. Goya-Lope eta Vega de Artatse eskola publikoetan A ereduan baino ezin da ikasi. Otxarkoaga DBHn, A eta B ereduak eskaintzen dituzte.

BIGE Bizkaiko Ikastetxeetako Guraso Elkarteak 2013-2014ko ikasturterako eragin eremuak azaltzen diren txostena argitaratu du. Haren arabera, Bilboko lau eskola publikok A ereduan irakasten dute soilik: Miribillako eskola, Abandoko Cervantes ikastetxea eta aipaturiko Otxarkoagako bi eskola publiko horiek. “Bilbok 350.000 biztanle baino gehiago ditu, eta A ereduko zentroen erdia 11.000 biztanle dituen auzoan daude, Otxarkoagan”.

“Emozio eta sentipen denak biltzen ditu flamenkoak” »

Urduri bezain gogotsu zegoen Adriana Bilbao Zarraonaindia (Bilbo, 1987) Bilborock aretoan El cuarto escalón aurkeztu aurretik. Izan ere, etxean, familia eta lagunen aurrean egin du bere azken lanaren estreinaldia.

Sevillan bizi da, baina, aurretik, Malagan hasi zuen dantzari profesional gisa bere ibilbidea. Amari zor dio flamenkozale izatea; aitonari Athleticen zale izatea. Telmo Zarraonandia Zarra jokalari mitikoaren biloba da.

Zer esan nahi du zuretzat sorterrian estreinaldia egiteak?

Gauza handia da, ilusio handia egiten dit. Urduri nago, normala den moduan. Erantzukizuna ere handiagoa dela sentitzen dut hemen. Gainera, inguruko batzuek dantzan ikusten nauten lehen aldia ere bada.

Zer da El cuarto escalón?

Kantua, dantza eta jotzea elkartzen dituen ikuskizuna da. Flamenko tradizionala da, hutsa, fusiorik gabea. Bakoitzak bere ukitua, nortasuna ematen dio, eta ez du istorio zehatz bat. Iaz sortu genuen, eta promozio bideo bat ere egin genuen, baina estreinaldi ofiziala Bilbokoa da.

Nondik datorkizu flamenkorako zaletasuna ?

Amarengandik. Hura izan zen umetan sevillanak eta flamenkoa ikastera animatu ninduena. Hasi nintzenean, 9 edo 10 urte nituen, eta ordutik ez naiz gelditu. Ama ere txikitan ibili zen; gero, utzi egin behar izan zuen. Asko gustatzen zaio flamenkoa.

17 urterekin, Bilbo utzi, eta Andaluziara alde egin zenuen. Gogorra izan al zen erabakia hartzea?

Nik argi neukan dantza egin gura nuela eta unibertsitatean ere zerbait ikasi nahi nuela. Ez nekien zer, baina argi neukan unibertsitatera joango nintzela. Familiakoek beti lagundu naute, eta ondo hartu zuten; nire erabakiak ez zituen ezustean harrapatu.

Dantza ikasketak Informazio Zientzien unibertsitate ikasketekin uztartu zenituen.

Bai, halaxe da. Malagako Unibertsitatean egin nuen lau urteko lizentziatura, eta, tarte horretan, Susana Lupiañez Lupi-k erakutsi zizkidan dantzak. Malagan lau urtez egon ostean, Sevillara joan nintzen, eta bertan bizi naiz egun. Sevillan, hainbat eskolatan egon naiz ikasten, Alicia Marquezen gisako profesionalekin, esaterako. Bestalde, iaz Madrilen Arte Eszenikoen masterra egin nuen Juan Carlos Erregea Unibertsitatean.

Flamenkoa ezagutzen ez dutenei zelan azalduko zenieke zer den?

Istorio baten isla da; dantzatzean, kantatzean eta jotzean sentitzen dena. Flamenkoaren hitzek, melodiek betetzen naute, eta horregatik nabil honetan. Sorgindu nauen kultura bat da. Arrazadun artea da, lurrekoa… Asko betetzen nauen zerbait da, euskal kulturak legez. Emozio eta sentipen denak biltzen ditu flamenkoak. Eta dena ez da pena eta mina; jai izaera ere badu. Askok uste dute dena negarra dela, eta ez da horrela. Langile klaseak sortu zuen flamenkoa; nekazariek, meatzariek… Landan, kaleetan eta auzoetan abesten zutenen ondorio da. Askok ez zekiten irakurtzen eta idazten; dena horrela adierazten zuten, kantuz. Hortaz, ahozko transmisioa eta herri nortasuna ditu oinarri flamenkoak.

Sevillan bizi zara orain; aurretik, Malagan egin zenituen lau urte. Handik kanpo dantzatu al zara sekula?

Andaluziako herrietan dantzatu naiz, batik bat; Malaga, Sevilla eta Cadiz aldean. Baina, Madrilen masterra egin nuenez, tablao-etan ibili nintzen. Han, jendea ezagutu eta hainbat artistarekin harremanetan jartzeko aukera izan nuen. Euskal Herrian, Iruñean egon nintzen behin tablao batean. Iaz, esaterako, Europako iparraldean egon ginen, Andaluziako ordezkari gisa, turismoa sustatzeko. 2011ko udan, Italiako Santa Fiora nazioarteko musika jaialdira joan nintzen, eta, azaroan, Kazakhstanen dantzatu nintzen, gala pribatu batzuetan.

Hortaz, denetariko publikoa ezagutzen duzu. Ba al dago alderik?

Bai, aldea badago. Kazakhstanen, esaterako, kontu alaiak eskatzen zizkiguten: buleriak, runbak eta tangoak. Hala ere, topikoak eta estereotipoak leku guztietan dituzte. Askok telebista gaineko soineko motaduna duen panpinarekin lotzen dute flamenkoa. Frankismoak kalte handia egin zion flamenkoari. Flamenkoa sevillanak baino askoz gehiago da; haratago doa, sakonagoa, zabalagoa da… Horregatik, beti saiatzen gara estereotipoak apurtzen.

Azken urteotan, ikasten ez ezik erakusten ere bazabiltza. Zelan moldatzen zara irakasle lanetan?

Ondo, atsegin dut eskolak ematea. Flamenkoan hasiberria naizela esan daiteke, baina ahal dudana eta ikasi dudana erakusten dut. Lupik ondo eta asko erakutsi zidan, eta berdin egiten saiatzen naiz. Eskola batzuetan, pausoak bakarrik erakusten dituzte, zergatia azaldu barik; nondik datorren esan gabe. Bestalde, kantua ere oso garrantzitsua dela uste dut. Beraz, informazio teorikoa, teknikoa eta praktikoa ematen diet nire ikasleei.

Etorkizunera begira, zertan eta non ikusten duzu zeure burua?

Auskalo, ni haizeak mugitzen nau. Ez dakit datorren urtean zer egingo dudan. Lanbide hau irregularra da, proiektu batekin pare bat hilabeterako atzerrira joateko aukera sor daiteke edo hainbat hilabetez ezer ez. Argi daukat nagoen lekuan nagoela beti egongo naizela prest ikasteko eta klaseak hartzeko. Bestalde, noizbait neure eskola zabaltzea ere gustatuko litzaidake, eta Bilbon ahalko banu, hobeto.

Bilbotarra eta Zarra futbol jokalari ezagunaren biloba izanda, athleticzale amorratua izatea ez da arraroa. Nola daramazu hori Andaluzian?

Ondo, sekula ez dut arazorik izan; alderantziz, han ere Athletic maite dutela esaten didate. Igandean, poz itzela hartu nuen Atleticori irabazi ziolako. Partida dagoenean, beti janzten dut Athleticeko kamiseta, eta auzokoak barre egiten dit. Batzuek badakite noren biloba naizen, eta hitz ederrak baino ez dizkidate esaten hari buruz. Aitonaz zerbait esaten didaten bakoitzean, irribarre zabala ateratzen zait.

‘JOLLE’-K ZABORRA BAINO EZ DU EKARRI »

Ipar Atlantikoan sortutako ziklogenesi lehergarria euskal kostaldera arte iritsiko zela eta, astelehenean alerta laranja ezarri zuen Eusko Jaurlaritzako Segurtasun Sailak. Itsasora irteteko eta itsas bazterretik ibiltzeko debekua ere ezarri zuten. Hai…