OihuK okupatu dute andreek: emakumeentzako gune feminista »

Kukutza gaztetxea itxi izanaren ondorenak oraindik iristen ari zirela, beste eraikin oso bat okupatu zuten Bilboko Errekalde auzoan bertan: OihuK. Hainbat fabrika biltzen zituen eta utzia zegoen ehunka metro eta bost solairuko eraikin batera sartu, et…

Antzerki eta dantzaren unibertsitatea »

Euskal dantza eta antzerkiak badu bere goi mailako eskola. Urteak eman ditu sektoreak Euskal Herrian gisa horretako zentro bat sortzeko eskaera egiten, eta Eszenikaren Aldeko Plataformaren klasiko bat izan da eskaria. Jadanik ez du gehiago horretan ar…

Aberastasun iturria agorrarazita »

Eezkerraldeak ezin du gehiago. Euskal Herrian egoera ekonomiko larriena duen eskualdea da. Biztanleen %21 lanik gabe daude. 25.000 pertsona inguru dira horiek. Horietatik, %61ek ez dute inolako diru laguntzarik jasotzen. Hala, langabeziak, prekarita…

Zalantzati daude bizkaitarrak »

Urrun daude Espainiako Kongresuaren eta senatuaren egoitzak. Bilbotik 400 kilometro ingurura. Baina han hartzen diren erabakiek Bizkaian eragina dutela eta, Madrilen ahalik eta eserleku gehien lortzeko lehian aritu dira alderdi politikoak azken hilabetean. Hautagaiek zalantzati dauden herritarrak konbentzitu ala mobilizatzeko azken eguna dute gaurkoa; Espainiako 350 diputatuetatik zortzi eta 261 senatarietatik lau aukeratuko dira Bizkaian igandean.

Alderdi guztiak bat datoz: ahalik eta ordezkaritza zabalena nahi dute Madrilen. Hori bai, nork bere helburuei eusteko. EAJ eta EH Bildu Euskal Herriaren interesak defendatzera doaz Espainiako Gorteetara. Ez dute Espainiako agintea helburu gisa, eta, nork bere aldetik, ahalik eta indar gehien eraman nahi dute. PP, PSE-EE, Podemos-Ahal Dugu eta Ciudadanosen helburua ordezkaritza lortzetik harago doa, ordea. Moncloan gobernatzea da lau alderdi horien xede nagusia, eta hori lortzera begira kokatu dute lehia azken asteetan.

2011ko Espainiako Gorteetarako hauteskundeetan hiru diputatu lortu zituzten jeltzaleek, bina koalizio abertzaleak eta sozialistek, eta ordezkari bakarra popularrek. Mapa politiko horri Podemos-Ahal Dugu gehitu behar zaio oraingoan. Lehen aldia du alderdiak Gorteetarako bozetako hautagai gisa, eta badirudi Bizkaiko ordezkari banaketan ere eragina izango duela hautagaitza berrienak. Maiatzeko foru hauteskundeetan, indartsu sartu zen Gernikako Juntetxera: sei eserleku lortu zituen Batzar Nagusietan. Eta ikusteko dago indar horri eutsiko dion igandean ere.

Zalantzati dago Bizkaia

Podemos Ahal Dugu-ren agerpen hori da, hain zuzen, azken asteetako zenbakien dantzan gehien azpimarratu den aldagaia. Aztiker taldeak Gara egunkariarentzat egindako ikerketaren arabera, Bizkaiko bigarren indarra izateko lehian alde estua dute Podemos Ahal Dugu-k eta EH Bilduk. Hamarren gutxigatik, aurre hartzen dio Eduardo Maurak Onintza Enbeitari. Aurreikuspen hori beteko balitz, Bizkaitik eserleku bi lortuko lituzke Podemos Ahal Dugu-k Madrilen, eta aulki bat galduko luke EH Bilduk.

Edonola ere, zalantzati daude bizkaitarrak, ikerketa taldearen arabera. Azaroaren bigarren hamabostaldian elkarrizketatu zituzten 600 herritarren artean, %48,6k soilik zekiten norentzat izango den botopapera. Beste era batean azalduta: Aztikerrek egindako elkarrizketen arabera, lurraldeko herritarren %51k ez dute argi zein alderdiri emango dioten botoa. Botopaperen arteko zalantzak bi multzotan banatzen dira. Bat: botoa EAJ ala Podemos Ahal Dugu-ri eman zalantzan daudenak; eta bi: EAJ ala EH Bilduren artean daudenak. Dudan dago biztanleriaren erdia. Eta ehuneko horren bozak asko alda dezake ordezkaritzaren balantza.

Paradoxikoa bada ere, Espainiako Gorteetako hauteskundeetan abstentzio kopuruak ez du gora egiten Bizkaian. Kontrara. 2012ko Eusko Jaurlaritzarako eta aurtengo maiatzeko foru eta udal bozetan baino abstentzio gutxiago izan zen 2011ko Espainiako Gorteetako hauteskundeetan, baita 2008ko bozetan ere. Espainiako Gobernua osatzeko azken hauteskunde bietan, antzeko kopurua mantendu du abstentzioak: %30 inguru.

Espainian ematen den bi alderdi nagusien arteko lehian dago gakoa. PPk eta PSOEk gobernuaren presidentetza hartzeko lehiak polarizatu egiten du herritarren boza. Eta eztabaida bien artean kokatzeak botoa beraien alde aktibatzea lortzen du. Hauteskundeen emaitzetan hala ageri da: Foru eta udal bozetan ala Eusko Legebiltzarra osatzeko hauteskundeetan baino emaitza hobeak lortzen dituzte bi alderdiek Espainiako Gorteetarakoetan. 2011ko bozetan 113.021 boto lortu zituen PPk, eta 136.426 PSE-EEk. Maiatzeko foru hauteskundeetan, ordea, 46.354 boto jaso zituzten popularrek, eta 70.361 sozialistek. Edonola ere, ikusteko izango da oraingoan nola banatuko diren alderdi espainiarrek jasotzen dituzten botoak, Podemosek eta Ciudadanosek kongresuan eragingo duten lautarako jokaleku berrian.

Boto abertzaleei dagokienez, ezker abertzalearen kasuan, ez du hauteskunde guztietan parte hartu, eta, Gorteetan ere, parte hartze mugatua izan du. Alderdi jeltzalea, aldiz, Espainiako Gobernuko erakundeetan izan da azken 37 urteetan, eta Madrilen eragin izan du hainbat gobernuren proiektuen bideragarritasuna bermatzeko. Edozein kasutan kosta egiten da, oro har, abertzaleak mugiaraztea eta han izan behar dela konbentzitzea.

EAJ
Autogobernuaren defentsa

Autogobernua, euskal herritarren ongizatea eta garapena. Hiru lan lerro horiek eramango ditu EAJk Madrilera. Aitor Esteban da Espainiako Kongresurako Bizkaiko zerrendaburu jeltzalea, eta Madrilen gobernatzea baino, Espainiako Gorteetara “Euskadiren interesen ahotsa eraman eta defentsa egitea” du helburu. Ildo horretan aukeratu dute hauteskunde kanpainarako leloa: Lehenik Euskadi. Jose Maria Cazalis du Estebanek alboan; hura da senaturako hautagai nagusia.

Jeltzaleen biltegi segurua da Bizkaia, eta indartuta atera zen alderdia maiatzeko bozetan. Kopuruari eustea zail izango duen arren, nahiko ziurra da igandean Bizkaian gehien bozkatua izango dela. Edonola ere, alderdia higa dezakete Podemos Ahal Dugu eta EH Bilduren hautagaitzek.

EH BILDU
Burujabetza helburu

Madrilera ez doaz ezer eskatzera, “Euskal Herriarentzat askatasuna eta demokrazia” aldarrikatzera baizik. Burujabetzaren aldeko mezua da koalizio abertzaleak Espainiako Gorteetara daramana, eta politikagintzako moldeak apurtzen jarraitu nahi du Onintza Enbeita EH Bilduko Kongresurako Bizkaiko zerrendaburuak. Erabakitzeko eskubidearen alde lan egin nahi dute Madrilen.

Ahoan legarrik gabe, garbi hitz egiten jarraitu nahi du azken lau urteetan Amaiurreko diputatua izan denak. Sona handia izan dute Enbeitaren hitzartzeek, horien artean, abortuaren legearen harira egindakoak. Irantzu Varela da Bizkaitik senatuko zerrendaburua. Feminismoa ardatz hartuta lan egingo dute hautagai biek, eta ildo horretan kokatu dute hauteskunde kanpaina bera ere. Aipatzekoa da EH Bildu dela Kongresurako zerrendaburu gisa emakume bat proposatzen duen alderdi bakarra.

EAJ eta Podemos Ahal Dugu-rekin du lehia nagusia Bizkaian koalizio abertzaleak. 2011ko Espainiako hauteskundeetan indartsu sartu zen, bi diputatu lortu baitzituen Amaiur koalizioak.

PSE-EE
Alternatiba “bakarra”

Mariano Rajoy eta Pedro Sanchezen arteko lehian kokatu dute eztabaida nagusia sozialistek. Gehiengoaren etorkizuna goiburupean, Espainian aldaketa berma dezakeen alderdi bakarra dela lau haizeetara zabaldu du hauteskunde kanpainan, eta mezu berean egin du indar Patxi Lopez PSE-EEk Kongresurako Bizkaian duen zerrendaburuak ere. Isabel Zelaa da sozialistek Senaturako proposatzen duten hautagaia. Espainian ez bezala, Bizkaian ez dute erronka erraza izango sozialistek.

Maiatzeko foru eta udal hauteskundeetan nabarmen egin zuten behera sozialistek. Podemos Ahal Dugu-ren agerpenak higatu egin du PSE-EE. Eta ikusteko dago beheranzko joera horri buelta emateko gai den ala ez.

PP
Boto kopurua igotzea xede

Bizkaitik Leopoldo Barreda da Kongresurako popularren zerrendaburua, eta Raquel Gonzalez Senaturakoa. Rajoyren politikan “eragiteko” duten gaitasuna azpimarratu dute bertoko popularrek hauteskunde kanpainan. Baina ez dute erraza izango igandean. Azken urteetan behera besterik ez du egin PPk Bizkaian. Maiatzeko foru eta udal bozetan jaso zuten azken kolpea: boto kopurua erdira jaitsi zuten popularrek. Eta Arantza Quirogaren dimisioak are gehiago higa dezake alderdia.

Ez dirudi PPren lehiakide zuzen direnek —Ciudadanosek eta UPDk— Bizkaian emaitza esanguratsurik lortuko dutenik.

PODEMOS AHAL DUGU
Krisia gainditu berri

Eduardo Maura da Kongresurako Bizkaiko zerrendaburua, eta Miren Gorrotxategik du senatari izateko hautagaien artean lehen postua. Ezker botoa bereganatzeko borrokan dago alderdi berriena.

Foru hauteskundeetan sei eserleku lortu zituen Gernikako Juntetxean Podemos Ahal Dugu-k. Baina Espainiako Kongresurako hauteskundeetako zerrenden osaerak desadostasunak eragin zituen alderdian. Ondorioz, dimisioa aurkeztu zuten azaroan Roberto Uriarte EAEko Ahal Dugu-ren idazkari nagusiak eta zuzendaritzako beste hemeretzi kidek. Ikusteko dago alderdi berriaren gorabeherek igandeko hauteskundeen emaitzetan eraginik izango duten ala ez. Edonola ere, orain arte kaleratu diren inkestek emaitza onak eman dizkiote alderdiari.

Historiaren lekuko zuhurra »

Isla Kale kiroldegitik itsasorantz doan pasadizotik atera bezain laster, haize freskoak berehala astintzen dio aurpegiko azala bisitariari, Mundakan. Hozkirri horrek berak itsasora bitartean zabaltzen den eremu berde bezain ikusgarria biltzen du. Itsas muino baten gainean dago Santa Katalina ermita, izen bereko penintsulan. Alde batera begiratuta, Izaro irla ageri da; bestean, Ogoño lurmuturra. Norbere buruarekin bakea aurkitzeko eremu paregabea da.

Irudimena ere erraz hasiko zaio dantzan bisitariari. Historiako pasarte ugariren lekuko izan da paraje hura. Bistakoa da, duen kokapen estrategikoari erreparatuta soilik. Itsasoak astintzen dituen haitzetatik eta eremuetatik barrura, Busturialdeko itsasadarrerako bidea zabaltzen da; ur gazia eta geza elkartzen diren ingurua, hain zuzen.

Bikingoak itsasadarrean

Hura da lurrean barrena egiteko pasabidea. Garai zaharretara egin behar da atzera dakkar-ak itsasadarrean barrena sartzen imajinatzeko. Brankan dragoi baten buruaren irudia zeramaten bikingoen itsasontziek, eta uste dute Mundakan sartu eta bertan eta inguruetan kokatu zirela. Oso itsasontzi arinak eta azkarrak zerabiltzaten. Erreketan barrena sartzeko gai ziren, sakonera txikia zutelako. Bikingoek eta eskandinaviarrek ontzi horiek erabiltzen zituzten herrietan barrena oso azkar sartzeko.

Historia eta kondaira nahastu egiten dira pasadizo horiek gogora ekartzerakoan. Bikingoak itsasadarrean barrena irudikatzea ez da zail gertatuko neguko hotza iristen denean; hatsa bera ere izozten den egun horietako batean Santa Katalinara joan eta itsasoari begira paratuz gero, bederen.

Uste dute IX. mendean iritsi zirela Busturialdeko lurretara historian zehar basati gisa irudikatu diren Eskandinaviako jatorrizko herritarrak. Anton Erkoreka adituak hala uste du. Eta ikerketa arkeologikoak egin beharko liratekeela adierazi du.

Eleberrietan ere, presente

Errealitate izan daitezkeen historiako pasarteak eleberrien iturburu ere izan dira. Besteak beste, Oskar Benegas sendagile bilbotarrak Brujas del viento (Haizearen sorginak) eta Basabe liburuak argitaratu ditu azken urteetan.Urdaibai aldeko kondaira batean oinarrituta daude. Haren arabera, Europa iparraldeko edo Eskoziako —ez dago oso argi— neskato bat itsasontzi bikingo batean iritsi zen Mundakara, eta hondartza batean utzi zuten, bakarrik. Eskoziako printzesa bat zen. Kondairaren arabera, Jaun Zuria Bizkaiko I.engo jaunaren ama izan liteke. Emakume hura lider bihurtu zen Erdi Aroan. Elezahar horrek azal lezake zergatik bihurtu zen Mundaka Bizkaiko lehenengo elizate.

Handik aurrera ere, hainbat gatazka eta borrokaldiren lekuko izan dira Santa Katalina ermita eta haren inguruko landa eta harkaitzak. Erdi Aroaren bukaera aldetik eta XIX. mendea ondo sartu arte, Bizkaiko Jaurerriaren eginbeharretako bat foruen markoa babestea eta lurraldearen defentsa militarra bermatzea izan ziren. Santa Katalinak ere bete zuen bere lana arlo horretan. Gotorleku txiki gisa aritu zen hainbat urtez. Oraindik gaur egun bistakoak dira zaintzara bideratutako kokalekuen zuloak; itsasoari so zeuden begientzako babesguneak. Itsasoa zen-eta garai hartan arrisku bakarra; handik gerturatzen ziren Bizkaiko lurraldetik kanpoko mehatxuak.

Kostaldearen defentsa bermatze aldera, aldundia eta Mundaka bezalako hainbat herritako bizilagunak elkarlanean aritzen ziren, balizko eraso horiei aurre egin ahal izateko. Dena den, herriek autonomia izaten zuten antolaketarako.

Naturaren astinduen mende

Kresalaren eragina zein ekaitzak eta itsasoaren astinduak pairatu dituzte Santa Katalina penintsulak eta bertako ermitak. XVI. mende aldera eraiki zuten jatorrizko ermita. Gaur egungo eraikina baino txikiagoa zen lehenengo hura. Gotorleku txikiaren ondoan zegoen. 1879an eraitsi zuten, eta, herriaren dirua baliatuta, sei urte geroago eraiki zuten berri bat. Hainbat eraldaketa eta zaharberritze lan egin dizkiote. Hala, sarrerarako bidean alde batetik eta bestetik eskailerak dituen ermitaren irudia erabat aldatu da urteen poderioz.

1980ko hamarkadan eraberritu zuten azkenekoz. Hala ere, iaz beste obra txiki bat egin behar izan zuten. Ekaitz batek kanpandorrea goitik behera bota zuen. Tximista batek bota zuen bi urte lehenago konponduta zegoen ezkilategia. Izan ere, historian zehar babesgunearen adierazgarri izan den eremua, babesik gabe dago eguraldiaren zakartasunaren eta itsasoko kresalaren eraginen aurrean.

Mundakara joaten den orok nahitaezko bisita du historiaz eta pasadizoz betetako eremu horretan. Surfaren herriak badu-eta bestelako xarmarik. Uda garaian izugarri handitzen da bisitarien kopurua. Neguko bakardadeak bestelako interesa ematen dio kostaldeko eremu horri. Itsaso zakarrak eta eguraldi kaskarrak Santa Katalina eder bezain beldurgarri bihur dezakete; baina, betiere, erakargarri.

Argiteriaren atzeko iluntasuna »

Bi aste falta dira gabon gauerako, baina aspaldi nabari da gabon giroa Bizkaiko txoko gehienetan. Hiriburua da guztien artean nabariena. Asteak dira Bilboko kaleak 1.200.000 argirekin argiztatu zituztela. Kontsumo txikikoak dira jarri dituzten argi gu…

Meatzaldeko ondarea lapurtzen ari direla salatu du Burdin Herria taldeak »

Ortuellan dago Peñas Negras; biotopo izendapena duen eremuan, Galdames eta Trianoko mendietarako sarreran. Meatzaldearen bihotzean. Ingurumen Interpretaziorako Zentroa da, meatze ustiapenak inguruan izan duen eragina aztertu eta ingurumenarekiko errespetuan heztea helburu duena. Bisita ugari jasotzen ditu; urtean 30.000-35.000 inguru. Baina Eusko Jaurlaritzak lekuz aldatu nahi du; Abantoko Meatzaritza Museora eraman. Auzokideak ez daude konforme, eta manifestazio-martxa bat antolatu dute iganderako.

Bere historiaren zatiak pixkanaka eramaten ari direla sentitzen dute herritarrek; meatzaldeko historia “galtzen” ari dela. Eta zerbait egin beharra ikusi dute. “Meatzaritza ospitalea bota zuten, eta ez zen ezer gertatu; meatzarien galerietako bagonetak ere eraman dituzte… Gure ondarea ebasten ari dira”, azaldu du Soiartze Avilak.

Ezinegon horrekin batzen hasi, eta Burdin Herria taldea sortu dute herritarrek. Orain, Jaurlaritzak Peñas Negras ixteko asmoa duela jakin dutenean, mobilizatzen hasi dira. “Meatzaritza Museora eraman nahi dute hau ere, dena zentralizatu nahian edo”, azaldu du egoera Burdin Herriko Avilak. Eta ez du ulertzen. “Zentzugabea” iruditzen zaio.

“Museoaren zeregina meatzaritzaren inguruko informazioa ematea da eta Peñas Negras ingurumenaren interpretaziorako zentroa da; bakoitzak bere funtzioa du”, dio. Ingurumena aztertzeko, bertan egon behar dela nabarmendu du, eta egungo zentroa biotopoan bertan dagoela. “Biotopotik bederatzi kilometrora dagoen Meatzaritzaren Museora eramateari ez diogu zentzurik ikusten”.

Eusko Jaurlaritzaren asmoa

Iosu Madariaga Eusko Jaurlaritzako Ingurumen sailburuordeak aitortu duenez, leku bakarrean bildu nahi dituzte meatzaldearekin zerikusia duten baliabide guztiak: Jaurlaritzarena den Peñas Negras Interpretazio Zentroa, Bizkaiko Aldundiaren Meatzaldeko Biotopoaren Zentroa eta Abanto-Zierbenako Udalak kudeatzen duen Euskal Herriko Meatzaritzaren Museoa. “Trapagako, Ortuellako, Muskizko eta Galdamesko udalek ingurumen hezkuntzaren eta kulturaren arloko bestelako azpiegiturak eramango dituzte”, dio Ingurumen Sailak igorritako oharrak. “Instalazio horietara hurbiltzen direnek lurralde horretako kultura eta ingurumen ondarea ezagutu ahalko dute”.

Protestak

Baina bertako herritar gehienak ez daude ados. Horren adierazle da Ortuellako eta Traparango udalbatzek Burdin Herriak aurkeztutako mozioak onartu dituztela, gehiengo osoz. Peñas Negras lekuz ez aldatzeko, ez ixteko aldarrikatu dute horrela. Abantoko Udalak datorren udalbatzan aztertuko du gaia.

Sinadurak ere biltzen ari da taldea inguruan. Eta, iganderako, manifestazio-martxa bat antolatu du Salba dezagun Peñas Negras, ez itxi lelopean. Larreinetako funikularraren geltokian abiatuko da protesta 10:00etan; Zugaztietara joango da handik, eta, gero, interpretazio zentrora.

Euskaldun berriei eskaini dizkiete kaleak »

Euskaldun Berria. Kaleko hormetako plaketan ikusten hasi da izena, lehen aldiz. Izen gisara. Bilbon, Bizkaiko foru liburutegiaren aurrean dagoen iturrian, esaterako, Euskaldun Berria Gunea irakur daiteke. Bizkaiko Foru Aldundiak jarritako plaka da, eu…

Gailurretako ikuspegiak lur arrasean »

Mendia, gailurrak, elurra, arriskua, adrenalina, horma bertikalak, poza, hobetzeko nahia lortzea… Sentipen horiek guztiak eta beste asko daude mendia eta abentura kirolak pasio eta zenbait kasutan ogibide ere bihurtu dituzten kirolarien barrenetan. Ez da erraza pantaila handi batean proiektatzen diren filmen bitartez sentimendu horiek ikusleari helaraztea. Baina bada mendiaren bihotza proiekzio aretoetara eramatea lortzen duenik; irudi ikusgarriak eta ezin imajina daitezkeen planoak baliatuta, ikusleak liluratzen dituzte. Mendi Film Festival da lorpen horren erakusleetako bat. Gaur hasiko da mendi eta abentura kirolen inguruko zortzigarren zinemaldia.

Meru filmak egingo du inaugurazioa. Europan lehenengoz emango dute pelikula era horretako jaialdi batean. Jimmy Chin eta Elizabeth Chai Vasarhelyik zuzendutako lan horrek dokumentalik onenaren saria eskuratu zuen publikoaren eskutik AEBetako Sundanceko jaialdian. Donostiako Zinemaldian ere izan zen, Savage Cinema sailean. Eliteko hiru eskalatzaileren istorioa kontatzen du. Himalaiako gailur arriskutsuenari aurre egiteko saialdian, hiru zailtasuni egin beharko diete aurre: euren iragana, barne deabruak eta naturaren elementurik latzenak izango dituzte aurrez aurre.

Denera, 133 lan aurkeztu dira lehiaketara, iaz baino hamar gehiago. Horien artean, 43 aukeratu dituzte. Lau Euskal Herrian ekoitzitakoak dira, eta, horien artean, bi euskaraz emango dituzte, jatorrizko bertsioa errespetatuta. Aurtengo jaialdiaren asmoetako bat zen bertako ekoizpena sustatzea eta euskara nabarmentzea. Horretarako oinarria jarria dute, beraz.

Mendi Short

Jaialdiaren barruan, beste hainbat jarduera izango dira. Iaz abiatu zuten film labur amateurren Mendi Short lehiaketa, eta jarraipena izango du aurten ere. Hori ere nazioartea da, eta Mendi Film jaialdian lantzen diren gai berberak jorratzen dituzte horra aurkeztutako lanetan: alpinismoa, eskalada, abentura kirolak, eskia, ekologia, ingurumena eta etnografia, besteak beste. Gehienez, bost minutu irauten dute denek.

Filmen emanaldi eta lehiaketarekin batera, hainbat jarduera prestatu dituzte, besteak beste, hitzaldiak eta mahai inguruak. Lehen mailako profesionalak izango dituzte protagonista jarduera horiek guztiek. Bihar bertan izango da hitzaldi horietako bat. Hiru Michelin izar dituen Eneko Acha sukaldaria eta hamalau zortzimilako egin dituen Alberto Iñurrategi mendizalea izango ditu protagonistak. Erronka izango dute hizpide; biek ala biek ondo baino hobeto ezagutzen dute gaia hori. 11:30ean abiatuko dute saioa, BBK aretoan.

Arratsaldean, eskalatzaile baten bizimoduari buruzko azalpenak entzuteko aukera izango da. Slideshow – Eskalatzaile baten bizitza izeneko hitzaldia emango du Adam Ondrak. Munduko eskalada txapeldunak bere hastapenak izango ditu hizpide. Lehiaketan aritutako azken zortzi urteei buruzko gorabeherak ere kontatuko ditu. Patxi Usobiaga izan zuen entrenatzaile urte horietan.

Bestalde, proiektuak protagonista izango dituzte Mendi Talks saioek. Trebakuntza eta dibulgazio hitzaldi horietan parte hartzeko aukera dute ikus-entzuleek, galderak zein zalantzak planteatuz eta iritziak emanez. Domekan, National Geographiceko espedizio batzordeko zuzendari Rebecca Martinek erakunde horrek eskaintzen dituen bekaldien berri emango du. Esperientzia hori bizi izan du, adibidez, Eñaut Izagirrek, eta Patagonia ezezaguna bere proiektua zertan datzan azalduko du.

Saria

Mendizaletasunaren giza balioen defentsa eta transmisioa saritzen dituen WOP fundazioaren saria ere banatuko dute jaialdian, hilaren 19an. Hainbat jarrera saritzea du helburu garaikurrak; besteak beste, honako hauek: hobetzeko gaitasuna, esfortzua eta talde lana; fideltasuna eta baikortasuna aldaketak lortzeko motor gisa; eta mendi, eskalada eta muturreko kirolekin lotutako ekintzak familiarekin uztartzen jakitea. Josep Manuel Angladari aitortuko dizkiote aurten ezaugarri horiek. XX. mendeko alpinismoaren historiako erreferente nagusietako bat da.

Saria emateko ekitaldiaren ostean, Walk On Project fundazioak ekoitzitako 2T on Chamlang filmaren mundu mailako estreinaldia egingo da. Urriaren 19an Nepalgo mendia igo zuen WOPeak espedizioa du ardatz. Alberto Iñurrategi, Juan Vallejo eta Mikel Zabalza alpinistek eta Juanjo Otazu kamerariak osatu zuten espedizio hura.

Filmak ez ezik, liburuak eta literatura ere sarri baliatu dituzte mendizaleek ingurumenarekiko maitasuna irakurleari transmititzeko. Liburuon egileek eta irakurleek bat egiteko aukera izan dezaten, topaketa bat antolatu dute abenduaren 19rako. 11:00etan izango da, BBK aretoko atondoan. Ostean, Imanol Marrodan artista eta argazkilariak Anboto bere azken lanean oinarritutako Anboto, mundu higikor baten irudia hitzaldia emango du.

Hitzaldi eta mahai inguruez gain, hiru ikastaro ere eskainiko ditu jaialdiak. Lehenengoa bihar eta etzi egingo dute: eskaladako patologiei eta entrenamendu metodoei buruzko ikastaroa. Hilaren 19an eta 20an bi emango dituzte: mendi lasterketetako entrenamendu eta teknikari buruzko clinic-a eta Mendiklik mendi-argazkilaritza tailerra. Bestalde, Mikel Alonsoren Karakorum erakusketa urtarrilera arte izango da Rekalde aretoan.

Jaialdiaren azken egunean, hilaren 20an, Piugaz eskalada zentroa doan zabalduko dute, eskalada denei gerturatzeko. Eta, 12:00etan, lehiaketan saritutako pelikulekin Non-Stop saioak izango dira ikusgai. 17:15ean egingo dute sari banaketa.

Historia eta usadioen arteko herri zaharra »

Kolitza mendian ez da Bizkaiko Batzar Nagusietara deitzeko seinalerik egiten jada. Eta aspaldi utzi zion Balmasedako zubi zaharrak muga zerga kobratzeari. Bizkaiko herri guztiak bezala, garaian garaikora egokitu da Balmaseda ere. Baina historiaren tes…