Amaia Igartua Aristondo
Norak bere bizitzan lehen aldiz egingo duen bidaia kontatuko du filmak”. Bakarrik abiatuko da Lara Izagirreren (Zornotza, 1985) pelikula berriko andre protagonista. Abiatuko da, halaber, zinemagile eta gidoilaria, abuztuan hastekoa baita Nora film luzearen grabaketekin. Berak, aldiz, ondo lagunduta egingo du bidaia hori. Ane Pikaza aktorea arituko da pelikulari izena ematen dion protagonistaren paperean, eta, gainontzekoak jakinarazteke dauden arren, izen “ezagunak” agindu dituzte.
Lander Unzueta Lekerikabeaskoa
Milurteko erdia. Bost mende igaro dira Lur osoa zeharkatu zuen lehen bira abiatu zenetik. Ordutik hona 500 urte igaro dira, eta bira hori urrun geratzen da. Hala ere, askorentzat pentsaezina da orain bost mende eskasera arte munduko biztanleriak ez izatea Lurra borobila den ziurtasunik, laua den ustea zabalduta egotea.
Natalia Salazar Orbe
Mundaka Festivalek bosgarren urteurrena beteko du, izena eta agertokia aldatuta: Bay Of Biscay da orain, eta, Mundakan barik, Bermeon ari dira egiten. Santa Katalina penintsularen magia Aritzatxu hondartza gainera eraman dute. Orain ere itsasoari begira dago, antzinako nabigazio kartetan azaltzen zen Bizkaiko golkoa izena gogoraraziz. Hala azaldu du Amets Rodriguezek, antolatzaileetako batek: “Bizkaiko golkoa lotuta dago Frantziako kostaldearekin, Eskoziakoarekin eta Galiziako aldearekin. Bay of Biscay izenarekin agertzen zen nabigazio kartetan, eta gustatu egin zitzaigun”. Ingelesezko izena justifikatuta dagoela deritzo, gainera: “Jaialdiaren gure proiekzioa mundura begirakoa da. Hala bada, gure kultura munduan zabaltzea eta mundura erakustea da asmoa. Zentzu osoa dauka ingelesez egiteak, ez baita guretzako jaialdi bat, baizik eta gurea den jaialdia, mundura begira, eta zabaldua”.
Amaia Igartua Aristondo
Plentzia film laburren gotorleku bilakatuko da zortzigarrenez. Asteburu honetan, VIII. Nazioarteko Metraje Laburreko Filmen Lehiaketa hartuko du udalerriak. Hamazortzi film labur aukeratu dira bi egun horietan proiektatzeko, baita jaialdiak eskaintzen dituen hiru sariengatik lehiatzeko ere: epaimahaiaren saria, euskal saria —alegia, euskal film laburrik hoberena saritzen duena— eta publikoaren saria. 2.000, 1.000 eta 800 euro, hurrenez hurren. Plentziako Santa Maria elizaren aldamenean emango dira filmak, larunbatean eta igandean sakabanaturik, 22:00etan hasita.
Aitziber Laskibar Lizarribar
Bizkaia eta burdina; elkarri lotuta dauden elementuak dira. Batak besteari zuzenean eragin dio: batak bestearen nolakotasuna baldintzatu du. Aberatsa da garai bateko burdinolek Bizkaiko lurretan utzitako ondarea; askotarikoa, baina nahiko ezezaguna. Datu batek erakuts dezake burdinak lurraldean izandako indarra: berrehun burdinola inguru izan ziren Bizkaian.
Udako liburutegien egitasmoak abiatu dituzte Bizkaiko hainbat herritan, beste urtebetez. Ohiko eraikinetatik kanpora atera dituzte liburuak eta irakurketa sustatzeko baliabideak, eta herriko kale, plaza eta igerilekuetara eraman. Irakurketa aisialdiarekin lotzeko modu bat dira egitasmook. - Irakurri gehiago...
Peru Azpillaga Diez
Artea Lekeitioko kale eta plazen jabe bilakatuko da asteburu honetan Kaleka jaialdiaren 30. edizioarekin batera. Jada martxan dago jaialdia, eta igandera bitartean egingo da; herrian zehar sakabanatutako gune desberdinetan, mota eta estilo askotako ikuskizunak pertsona ororen eskura jarriko ditu kaleko arteen jaialdiak.
Natalia Salazar Orbe
Enpresaren ohorearen kontra egin eta bere irudia erabiltzeagatik salaketa jartzeko mehatxua egin zion BBK Live antolatzen duen Last Tour enpresak Eragin gazte prekarioen plataformari. BBK Liveko langileen baldintzak salatu eta argitara ematean, enpresaren irudia erabiltzeagatik eman zion abisua. Jakinarazpena jaso ostean, Eraginek ordura arteko argitalpenetatik ezabatu egin zuen Last Tourren logotipoa, baina ez du etsi langileen eskubideen urraketak salatzeko egitekoan. Eta oihartzun handia lortu du.
Javi West
Bilbo Arteko Art House Zinema hamaika filmeko ziklo bat eskaintzen arituko da urriaren 3ra arte. Begirada heterodoxoa, kontakizun apartak da zikloaren izena, eta ohikotasunetik kanpo dauden filmek osatzen dute. Zaharrak zein berriak, luzeak zein laburrak, zientzia fikziozkoak zein dokumentalak. Antolatzaileek oso aukeraketa aberatsa egin dute jatorriari dagokionez; izan ere, gehienak europarrak izan arren, txinatarrak eta estatubatuarrak ere badaude. Denak emango dira jatorrizko hizkuntzan eta gaztelaniazko azpidatziekin.
Natalia Salazar Orbe
Zertan pentsatzen dute artistek? Antzeko kezkak ote dituzte bateko eta besteko sortzaileek? Zer balio ematen zaie euren lanei? Nola ezagutarazi artista eta bere obra? Zer sinergia sor daitezke munduaren beste aldeko sortzaileekin?
