Natalia Salazar Orbe
ONINTZA ENBEITA: “Urte asko daramatzagun bertsolariok presioa daukagu”
Prestaketa lanak betiko antzean egiten ari da: “Astero elkartzen gara; gure entrenamendua egiten dugu. Eta nik nire etxeko lanak egiten ditut. Bakoitzak badu bere metodoa. Ezer berezirik ez. Betikoa”.
Txapela nork eskura dezakeen pentsatzen jarrita, nabarmendu du “Maialen Lujanbioren nagusitasuna plazan”. Haren ustez, “txapela berriro irabazteko aukera asko ditu”.
Finala Iruñera eramatea “oso ondo” iruditu zaio. “Sinisten badugu Euskal Herria zazpi lurraldek osatzen dugula eta Iruñea dela hiriburu historikoa, logikoa da”. Gainera, debeku askorengatik euskaraz bizitzeko arazo gehiago dituen eremua izanik, besteek “konfort eremutik atera” behar dutela esan du. “Oso albiste inportantea da finala Iruñean izatea”.
(goiko argazkian, Onintza Enbeita)
AITOR BIZKARRA: “Ibarzabal da nahikoa hautagai argia finalera pasatzeko”
Txapela janzteko izenen artean Maialen Lujanbiorena bolo-bolo badabil ere, Bizkarrak ez du ikusten horren argi: “Nire ustez, ez dabil 2017an sortu zuen zirrara eta harridura maila berean. Baliteke orduan bezain ondo ibiltzea, baina ja ez dauka orduan eragin zuen ezusteko faktore hura”.
Haren esanetan, “bistakoa izan zen 2017an aldaketa kualitatibo bat” egon zela Lujanbiorengan, “eta irabazi egin zuen”. Aurten ez zaio iruditzen hura “hainbesteko eraginik sortzen” ari denik plazan ere. Gainera, uste du kontuan izan behar dela Lujanbiok finalean bertan hasiko duela bere lehia: “Eta hori handicap bat da bertsolari batentzako”.
OIHANA BARTRA: “Emakume gehiago dituen final bat entzun nahiko nuke”
Txapelketarako prestaketa lanei dagokienez, trebatzeko Bizkaiko txapelketetan batu ohi direnak batu direla azaldu du. “Kantuan aritzen gara, batez ere. Txapelketako ariketak elkarri ipini eta kantatzen ditugu. Gero etxean ere koadernoan lan pixka bat egiten ari naiz. Ez naiz ari ikaragarri prestatzen, baina ari gara, bai”. Prestaketa lan horien alde ona azpimarratu du: “Zure kantukideekin denbora gehiago pasatu eta konpartitzeko aukera ematen du. Horrek ere badauka bere alde ona”.
Txapela nork jantziko duen ez daki. Horren ordez, ilusio bat duela adierazi du: aurten txapela emakume batek janztea gustatuko litzaioke. “Eta emakume gehiago izango dituen final bat entzutea. Orain arte Maialenek [Lujanbio] bakarrik lortu du finalera iristea. Aurreko txapelketan, finalaurrekoetara arte emakume asko ikusten ziren, baina finalak erakutsi zuen oraindik hemen muga batzuk daudela. Aurten kristalezko sabai hori apurtzeko aukerak daude”.
GORKA PAGONABARRAGA: “Denei komeni zaie puntuz altu joango den saio bat izatea”
Pagonabarragari konturatzerako etorri zaio gainera txapelketa. Abuztuan kostatu egin zaio beste bertsolari batzuekin elkartu eta bertso lanketa egitea. Hala ere, egin du lanketa apur bat: “Ohiko moduan batzen gara bertso eskolan, eta gero norbere etxeko lana ere badago: ideiak, errimak eta lantzen”.
Txapeldun nor ikusten duen galdetuta, “zalantzarik barik, denen ahotan dabilen hautagai nagusia Maialen Lujanbio” dela esan du. “Maialenek bere onena ematen badu, hura ikusten dut txapeldun”.