I. Maruri Bilbao
Lekeitiarrentzat urteko egunik garrantzitsuena izaten da irailaren 5a, Sanantolin jaietako Antzara Eguna ospatzen dutelako. Milaka lagun elkartzen dira portuaren bueltan. COVID-19aren pandemia dela eta, bigarren urtez, Lekeitioko Udalak herria zarratzea erabaki du.
Hala, bihar, zapatuz, herrira joan gura duten ibilgailuen sarbidea mugatuko dute, 20:00etatik aurrera: kontrola ezarriko dute sarreran, eta NANean bizilekua Lekeition dutenak eta udalerrira sartzeko beharra egiaztatzen dutenak baino ezingo dira sartu. Domekan, berriz, ezingo da ibilgailurik sartu herrian. 16:00 arte larrialdi zerbitzuak baino ezingo dira sartu. Itxiera hori itsasoz ere egongo da indarrean domekan. Garraio publiko zerbitzua ere 15:30 arte bertan behera geratuko da herrian.
Koldo Goitia alkateak “erantzukizunez eta arduraz” jokatzeko eskatu die lekeitiarrei. “Bizi dugun egoera honetan ez dugu ezer ospatzeko”, esan du.