Kurkuluxetan kulturgunean sustatuta, giza balioak lantzeko pelikula bat grabatzen ari da. Zenbat Gara elkartearen barruko ume gunea da Kurkuluxetan. Hainbat egitasmo bultzatzen ditu haurren heziketa eta aisialdira begira; azkena, Euskal Herriko eta Kubako 5.000 haur egiten ari diren filma.

Adiskidetasunaren liburuarekin senidetu ziren herrialde bietako ikastetxeak. Ordutik, hartu-eman ugari izan dituzte, baina harago joan nahi izan dute, eta giza balioak lantzeko film bat egiten ari dira. Haiek dira egile eta protagonista. Dena den, adin guztientzako ikus-entzunezko lana da. Ekainean estreinatzeko asmoa dute, herrialde bietan aldi berean egingo duten ekitaldi batean.