Olio erabilia uzteko 13 edukiontzi Lea-Artibain »

MARKINA-XEMEIN. Lea-Artibai Amankomunazgoak hamahiru edukiontzi laranja ipiniko ditu, eskualdeko sukaldeetan erabilitako olioa biltzeko. Bakoitza non dagoen azaltzen duen mapa bat eskegi dute www.reciclatuaceite.com webgunean. Era berean, mankomunitat…

Jose Ramon Muroren Bilbo errealista, Berreginen Museoan »

Bilboko paisaiak erakusten dituzten hamazazpi margolan eraman ditu Jose Ramon Muro Pegeregek Bilboko Berreginen Museora. Pintura guztietan errealismoa da nagusi.

Argiak eta itzalak izenburua duen erakusketan, hiriko hainbat toki jasotzen dituzten margolanak batu ditu: besteak beste, Kale Nagusia, Casilda Iturrizar parkea, Zorrotzaurreibarra, Zazpikaleak eta Santimami.

Hiriko paisaiara egokitutako hiperrealismoaren mugan dabilela, artistak gustuko izaten du aldez aurretik aukeratutako gaia ondo prestatzea. Teknika landua erabiliz, konposizio zaindua eta osotasunaren perspektiba aberasten duten hiriko altzarien ñabardurak gehitu ohi dizkie bere lanei.

Perspektiba nabarmentzen duten ihes lerro ondo definituak eta kontraste handiak dira, hain zuzen, Muro Peregen artelanen ezaugarri orokorrak. Artistak, gehienetan, pintura akrilikoa erabiltzen du, euskarri zurrunean eta teknika mistoak aplikatuta.

Artelan bakoitza hasieratik, aukeratutako gaitik abiatuta, kontu handiz planifikatutako egitasmoa da. Murok, kasualitatez aukeratu ez diren argien eta itzalen konposizioan, argazki errealista irudikatzen du modu berezian markatuta dagoen momentu batean.

Ibilbide luzea

Jose Ramon Muro Pereg Bilbon jaio zen, 1954. urtean, eta hainbat erakusketa egin ditu. Horretaz gainera, marrazketari eta pinturari eskainitako ibilbide luzea dauka.

Berreginen Museoko bigarren solairuan jarri dute ikusgai Argiak eta itzalak erakusketa, eta apirilaren 21era arte egongo da zabalik. Martitzenetatik zapatuetara, 10:00etatik 13:30era eta 16:00etatik 19:00etara egongo da irekita museoa; domeketan, berriz, 10:00etatik 14:00etara bisita daiteke. Astelehenetan itxita egoten da.

235.244 »

Otsailean Loiutik igarotako bidaiariak. 235.244 bidaiarik erabili zuten Loiuko aireportua otsailean. Iaz garai berean baino %5,4 gutxiago izan dira. 2.706 hegaldi irten edo iritsi ziren; iaz baino %11,6 gutxiago.

Portu eta hondartzek izango dute lehentasuna »

Neguan Kantauri itsasoan izandako ekaitzek Bizkaiko kostaldean 14 milioi eurotik gorako kalteak sortu dituzte. Eusko Jaurlaritzak, Bizkaiko Foru Aldundiak eta udalek zenbatu dituzte eurek ordaindu beharreko txikizioak, eta kopuru hori atera zaie guztia batuta. Martxoaren 3ko olatuek eragindakoak neurtu gabe dituzte oraindik. Zenbateko hori beste %10 hazteko bestekoak izan direla uste dute. Eta Espainiako Gobernuak ere ez du bukatu bere kontaketa. Dena den, dagoeneko 500.000 eurotik gorako inbertsioa egin du Nekazaritza, Arrantza eta Ingurumen Ministerioak, martxan dauden konponketa lanak ordaintzeko —Sopelako hondartzan, Gorlizkoan eta Bakioko pasealekuan eta itsasadarrean—.

14 milioi horietatik, erdiak inguru Bermeon zenbatu dituzte. Otsailaren 2ko eta martxoaren 3ko ekaitzetan bertako portuak jaso ditu kolperik latzenak. Pantalanak, portu zaharreko azpiegiturak, dikea, kai muturra, Frantxuako arrantzaleen lonjak… Sartzea lortu duen lekuetan, dena apurtu zuen itsasoak. Lekeition ere milioi bat eurotik gorako gastuak izango dituzte. Estoldetako kutxa txikiak, itsas hesia eta beste hainbat azpiegitura apurtu zituen urak portuan.

Ana Oregi Eusko Jaurlaritzako Ingurumen eta Lurralde Politika sailburuaren esanetan, lehentasuna portuek eta hondartzek izango dute. “Herri hauen ekonomiarako ezinbesteko azpiegiturak dira, arrantzarako, merkataritzako eta turismorako”, nabarmendu du. Horregatik, “ahalik eta arinen” konponduta egotea da erakunde publikoen asmoa.

Bi hilabete barru berriro elkartuko dira. Ordurako lan guztiak hasita egongo dira, eta hainbat bukatuta. Hartara, kostu guztiak zehatzago zenbatuta edukiko dituzte. Sailburuaren esanetan, udarako guztia konponduta egotea “ezinbestekoa” da.

Ohiz kanpoko kalteak direla nabarmendu dute guztiek. “Unai Rementeria, Bizkaiko Lehendakaritza ahalduna: “Ditudan 40 urteetan ez dut halakorik ezagutu. Eta aurten zazpi denborale izan ditugu, bata bestearen atzetik. Ikusteko eta argazkiak ateratzeko oso politak izan dira, baina eragin dituzten ondorioak beldurgarriak ere bai. Otsailaren 2koa, bereziki, izugarria izan zen”.

Itsasertzean sortutako kalteak Espainiako Gobernuak ordainduko ditu, harena baita itsasbazterra mantendu eta kudeatzeko eskumena. Honela azaldu du Rementeriak: “Gure esku daude hondartzak; udalek egin behar dute hiri altzarien mantentzea, eta Jaurlaritzak portuena”. Bilboko portua da salbuespena, Espainiako Sustapen Ministerioarena baita. Herri administrazioei gogoratu die foru aldundiak baduela larrialdietarako funts bat: “Eurek ordaindu beharreko gastuei aurre egiteko, hiri altzariak eta bestelako kalteak konpontzeko, berbarako, ezustekoetarako funts horretara jo dezakete udalek”.

Europari laguntza eskatzea ere ez dute baztertu. Eusko Jaurlaritzak adierazi duenez, Kantabriako Gobernuaren egitekoa izango litzateke eskaera egitea, hura baita une honetan Ardatz Atlantikoaren Batzordeko burua. Hala ere, laguntza horiek iritsi bitartean zain egon beharrean, beharrean hastea erabaki dute.

Ospitalerako errepidea konpontzen hasi dira »

GORLIZ. Gorlizko ospitalera, Astondo hondartzara eta Bizkaiko Foru Aldundiaren abeletxera joateko dagoen errepide bakarra konpontzen hasi dira Bizkaiko Herri Lan eta Garraio Saila. Ez dauka espaloirik, eta ertzean ez dago oinezkoentzako leku nahikorik…

Martxo betea foru museoetan »

Martxoak jarduera ugari ekarriko du Bizkaiko museoetara. Hala iragarri du Bizkaiko Foru Aldundiak, museoetako hil horretarako programazioa aurkeztu duenean.

1. Arkeologi Museoa

Arkeologi Museoak bisita gidatuak antolatu ditu Sakonako erromatar garai berantiarreko altxorra (Errigoiti) programaren barruan. Txanpon bereziak erakutsiko dituzte. Txanponok arkeologia indusketetan hartutakoak zein museoak gordailuetan dituenak dira. Sakonako altxorra izeneko erakusketa 1.700 urte baino gehiago dituzten ehundik gora txanponek osatzen dute. Hain zuzen, Kristo ondorengo III. mendeko azken herenetik IV. mendeko lehenengo hamarkadetara bitartekoak dira.

Bisitak zapatuetan eta domeketan egin daitezke. Zapatuetan bi aukera daude: 13:15ean eta 18:15ean; domeketan, berriz, 13:15ean hasiko dira. Maiatzaren 5era arte dago bisitok egiteko aukera. Horretarako, baina, beharrezkoa da lekua hartzea 94-404 09 90 telefono zenbakira deituta edo helbide elektroniko honetara idatzita: arkeologimuseoa@bizkaia.net.

Mallonako eskaileretan dagoen museoan jarduera gehiago ere izango dira: hain zuzen, Arkeotxotxongiloak familia arteko tailerrak prestatu dituzte. Parte hartzen dutenek txotxongiloak sortzeko aukera izango dute; baita Neolito garaian girotutako ipuin bat antzezteko ere. Helburua sasoi hartako eguneroko bizimodua ezagutaraztea da.

Datorren domekan egongo da tailer horretan parte hartzeko aukera. Hurrengoak hilaren 16an, 20an eta 30ean izango dira. Egun horietan guztietan, 11:30etik 13:00era artean egingo dituzte. Horietan parte hartzeko ere, beharrezkoa da aurretik izena ematea. Bisita gidatuetarako aurreikusitako bide berberak erabil daitezke: telefonoa eta helbide elektronikoa.

2. Euskal Herria museoa

Gernika-Lumoko Euskal Herria museoak Udaberriko larunbatak. Museora familiarekin izeneko tailerrak emango ditu martxotik ekainera bitartean. Koloretako artelanak, piratak eta altxorrak eta Euskal dantzak izeneko tailerrak izango dira, besteak beste. Horrez gain, Emakumea eta euskal pilota aldi baterako erakusketa bisitatzeko aukera ere badago, apirilaren 20ra arte.

Jarduerotan parte hartzea doan bada ere, aurretiaz izena eman behar dela jakinarazi du foru aldundiak: 94-625 54 51 telefono zenbakira deituta edo euskalherriamuseoa@bizkaia.net helbide elektronikora idatzita.

3. Rekalde aretoa

Rekalde aretoan, martxoaren 20an hasi eta 23ra bitartean, Arte Argitalpenen II. Jaialdia egingo dute. Arte argitalpenen inguruko topaketak eta hitzaldiak egingo dituzte bertan.

4. Santimamiñe

Santimamiñeko kobazuloaren inguruak eta barrualdea bisita birtual bidez ezagutzeko aukera ere egongo da martxoan. Basondoko Santimami baselizaren ondoko kioskoan hasiko dute ibilbidea (Kortezubi). Kobazulora bidean, artadi kantauriarra eta bertako landareak eta animaliak aurkituko ditu bisitariak parez pare.

Gero, haitzulorako sarrerako korridorera iritsita, duela urte batzuk aztarnategiari buruz berriz abiatutako ikerketa lanen eta haiei esker lortutako ondorioen berri jaso ahal izango dute. Santimami baselizara itzulita, kobazuloaren hiru dimentsioko erreplika birtual bati esker, haitzuloaren barnealdea ezagutu ahal izango dute; haren eraketa eta morfologia ulertu eta koba horren ospetsu bihurrarazi zuten historiaurreko pinturak ikusi ahal izango dituzte.

Bisitok ordu eta erdiko iraupena dute. Betiere gidari baten laguntzarekin egiten dira, eta 10:00etan, 11:00etan, 12:00etan eta 13:00ean egin daitezke.

5. Pobaleko burdinola

Muskizko Pobaleko burdinolak lehenengo aldiz gogoratuko du Uraren Nazioarteko Eguna, martxoaren 22an, zapatuz. Horretarako, Tresna hidraulikoak industriaren zerbitzuan izeneko jarduera prestatu dute, Busturiko Madariaga Dorretxearekin batera.

Bisita gidatu “berezi” bat antolatu dute. Energia hidraulikoa hainbat lanetarako erabiltzeak sortu zuen iraultza teknologikoa izango da jardueron ardatza. Beraz, Pobalen ikus daitezkeen bi industria tradizional nabarmenduko dituzte, batez ere: burdingintza eta errotak. Bi ordu iraungo du ibilbideak, eta ohiko bisitetan ikusten ez diren leku eta instalazio batzuk erakutsiko dituzte. 10:30ean hasiko dute bisita. Hiru euro ordaindu behar dituzte helduek, eta 12 urtetik beherakoentzat doakoa izango da. Lekua hartzeko, 629 27 15 16 telefonora deitu edo info@elpobal.com helbidera idatzi behar da.

6. Ondare aretoa

Argazki lehiaketa antolatu dute Bilboko Ondare aretoan. Lehen eta Bigarren Hezkuntzako ikasleek parte hartu ahal izango dute. Hilaren 25a baino lehen aurkeztu behar dira lanak; gaia natura izango da.

Downtown LA »

Martxoko astegun batean, goizeko bederatzien bueltan, Los Angelesko Downtownen tenperatura atsegina izaten da. Euskal kostaldeko edozein herritan uda partean senti daitekeen haize gozoa sentitu ahal da. Airea, halere, inoiz baino garbiago sumatzen da aste honetan. Izango da, seguruenik, lau egun jarraian bota duelako euria. Alarma gorrian zeuden, kasik, angelenoak, Noeren arkari hautsa kentzen ia.

Ipar, hego, eki zein mendebaldetik autorik datorren begiratu ostean (puntu kardinalak maite dituzte amerikarrek), Hill eta Zazpigarren kaleak batzen dituen bidegurutzeko zebrabidea zeharkatu ohi dut goizero, lanerako bidean. Urtean ehun bat lagun harrapatzen dituzte autoek hiriko erdigunean, eta adi ibili behar.

Kale luzea da 7th Street, hiriko gehienak bezala, baina badu horrek termometrotik asko. Aingeruen Hirian zer gertatzen den jakiteko leku aproposa da Zazpigarrena. Mexikarren denda asko daude bertan, eta, atarietan, mexikarrak berriketan. Mexikarrez. Horregatik, hiriko jentilizioaren inguruko eztabaida sortzen saiatu ziren bere garaian: erro ingelesa duen angeleno-ren ordez ez ote zen zuzenago angeleño erabiltzea. Saiatu ziren.

Kale horrek Downtownen erdigunea zeharkatzen du, bihotzaren bihotza. Eta jendearen janzkeran nabaritzen da zentrotik gertuago ala urrunago zauden. Arloteak, gaixo mentalak, eskaleak eta mozkorrak nonahi daude, baina gorbatak eta takoidun zapata garestiak ugaritu egiten dira eraikin altuetara hurbildu ahala. Eta kontrakoa eman dezakeen arren, hiri hau ez da batere dorre zalea. Horrelako bat eraikitzeko proiektu baten berri dutenean, “Manhatanera eraman egizue hori!”, bota ohi dute askok.

South Grand Avenueko semaforoaren parean malabarismotan ari da emakume gazte bat. Dotore jantzita, jaka zuri eta minigona beltz batekin, sorbaldaren kontra masaila estuturik eskuko telefonoa mantentzen du, berbaldia eten gabe. Bitartean, zorroari eusteko eskumako belauna altxatua duela, ezkerreko eskuarekin zerbaiten bila dabil hor, begiak beste eskuan duen paperezko edalontzian iltzatuak dituela, kafea eror ez dakion.

Gorpuzkera polita du neskak. Agian hori pentsatu zuen aurreko astean, inguruko kale batean, 43 urteko emakume bat bortxatu zuen gizonak ere. Arazo larria du Downtownek gauez.

Gure malabaristaren gainetik, ziztu bizian, hegan igaro da harrapari bat, eta kale perpendikular batean desagertu da. Goseti, ehizakiarekiko begirune minimorik barik. Txoriaren artaziekin liluratuta bezala geratu da neskaren alboan dagoen zoro zapaztoa, “Jesucristo es la Salvación” dioen kartela lepotik eskegita daukala.

20,8 »

Baserritarrek laguntzatan jasotako milioiak. 4.000 baserritarri baino gehiagori 20,8 milioi euroko laguntza eman zien iaz Bizkaiko Foru Aldundiak.

Txiroak, kroniko bihurtzen »

25.000 bilbotar pobrezian daude, Eduardo Maiz Bilboko Udaleko Gizarte Ekintza eta Etxebizitza Arloko zinegotzi ordezkariak jakinarazi duenez. Hau da, hiriburuan, pobrezia tasa %8tik gertu dago. Bilbotarren %2k ez dute ezer; erabateko pobrezian bizi di…

Txakurrekin krosean »

Lehiaketa

Gorliz

Txakurrak eta jabeak batera lehian jarriko dituzte domekan Gorlizko kaleetan, Bizkaiko II. Txakur Krosa jokatuko baita han. Udalak antolatu du proba, Bizkaiko Neguko Kirolen Federazioaren laguntzarekin.

Sei kilometro eta erdiko ibilbidea egin beharko dute lasterketan parte hartzen dutenek. Horietatik, bost kilometro eta 700 metro lur, belar eta harea gainean izango dira; gainerakoak, asfalto gainean.

Hainbat mailatan banatuta egongo da. Federatutako probari dagokionez, emakumeak eta gizonezkoak bereizita lehiatuko dira. Lehiakideak adinaren arabera banatuko dituzte: junior —14 urtetik 16ra bitartekoak—, senior —17tik 39ra artekoak—, master 40 —40tik 49 urtera bitartekoak— eta master 50 —50 urte edo gehiagokoak—. Herri krosean, berriz, emakumeak eta gizonezkoak elkarrekin lehiatuko dira, eta ez dituzte banatuko adinaren arabera.

Sariei dagokienez, hauek jasoko dute garaikurra federatutako proban: senior, master 40 eta master 50 mailetan lehenengo, bigarren eta hirugarren sailkatzen direnek; junior mailari dagokionez, lehenengo sailkatuari baino ez diote emango saria. Berdin gertatuko da herri lasterketan: lehenengo emakumeak eta lehenengo gizonak baino ez dute jasoko garaikurra.

Txakur krosean parte hartzeko, beharrezkoa da izena ematea. Aurreko egunetan izena eman ez dutenak garaiz dabiltza oraindik; izan ere, lasterketa hasi baino ordubete lehenagora arte izango dute horretarako aukera, 10:00etara arte, hain zuzen. 25 euro ordaindu beharko dituzte parte hartzeko, eta dortsalak egunean bertan banatuko dituzte, 09:00etatik 10:30era.

Hasiera, 11:00etan

11:00etan hasiko da, beraz, lehiaketa, Urezarantza kiroldegian. Hala ere, antolatzaileek argi utzi dute parte hartuko duten txakurrek osasun onean egon behar dutela; hain zuzen, albaitari batek kontrola egingo die. Animaliek nahitaezko txertoak hartuta dauzkatela justifikatu beharko dute jabeek. Horrez gain, lehiatzen diren txakurrek gutxienez urtebete izan beharko dute.