Aisialdian euskara bultzatuko dute, ikusi eta ikasiz »

Datorren astelehenean, Ikusi eta Ikasi programa hasiko dute Bilbon berriz ere; 3 eta 12 urte arteko ume eta gaztetxoek aisialdian euskaraz hitz egitea helburu duen programa, alegia. Martxoaren 17ra arte hainbat ekitaldi antolatu dituzte Begoña eta Deustuko udaltegietan, Indautxuko Karmen aretoan, Bilborock aretoan eta Errekaldeberri, Tiboli, Zamakola eta Zurbaran ikastetxe publikoetan.

Aisialdia, kultura eta hezkuntza uztartzeko helburuagaz Bilboko Udaleko Euskara, Gazteria eta Kirol Sailak antolatu dituen 30 ekitaldiak astelehenean hasiko dituzte, Jolasen Txokoagaz. Umeentzako “erakusketa dinamiko” gisa aurkeztu dute ekitaldi hori, eta jostailuak, jokoak, ipuinak, filmak, musika eta bideo jokoak erabiliko dituzte han.

Begoñako udaltegian egingo dute ekitaldi hori astelehenean, 17:30etik 19:30era. Datorren barikuan eta zapatuan, berriz, Deustuko udaltegian egingo dute.

Euskaraz ez dakiten gurasoentzat, besteak beste, laguntza eta orientazio tailer bat ere emango du udalak aurten, seme-alabei etxeko lanetan lagundu ahal izateko. Gainera, sukaldeko errezeten tailer praktiko bat ere prestatu dute, familia eremuan euskararen transmisioa bultzatzeko.

Margolanek bizitzak salbatzeko balio dezaketelakoan, salmenta »

Arteak eta elkartasunak bat egin dute Bilbon abiatu duten egitasmo batean; Raquel Rochas bilbotarraren olio pinturak eta grabatuak hiriko Barrainkuako udaltegian daude jarrita. Erakusketa horrek berezitasun bat dauka; hain zuzen, margolan horiek salga…

Gotorlekua, zabalik »

Madariaga dorretxean dagoen Euskadiko Biodibertsitate Zentroak hainbat ekitaldi antolatu ditu Gabonetako azken astebururako. Gaur itxita egongo da Errege eguna delako, baina bihar eta etzi, egunero bezala, zabalik egongo dira erakusketa iraunkorra eta…

Erdi Arotik gaur egunera »

Kultur txangoa

Barakaldo

Ezagutu Barakaldo edo Barakaldo herriaren historia alor guztietatik ezagutzeko egitasmoaren barruan, datorren domekarako Barakaldo Erdi Arotik gaur egunera arte historia ibilbidea antolatu du herriko Historia eta Ingurumenaren Interpretaziorako Zentroak (CIHMA).

Domekan, Barakaldo Erdi Arotik gaur egunera arte zelan aldatu den ezagutarazi nahi dute. Horretarako, herrian eta historian esanguratsuak izan diren eraikinetan oinarrituko dira antolatzaileak. 11:00etan hasi eta 13:30era arte iraungo du ibilbideak.

Txu-txu trenean zein oinez egiteko aukera emango dute, gainera. San Bizente auzoan hasi, eta herrigunea zeharkatu ondoren, erreka hegalean bukatuko da.

Herriaren jatorria

Barakaldoren jatorria aztertuko dute parte hartzen dutenek. Horrez gain, Erdi Aroan bertako bizilagunen arteko harremanak zelakoak ziren kontatuko diete antolatzaileek.

Elizatearen garrantziaz ere ariko dira, bidaiari eta merkatariak bertatik pasatzen zirelako. Ondoren, modernizazioa zelan gauzatu zen azalduko diete parte hartzen duten herritarrei. Hain zuzen, burdinaren meatzaritza eta geroago labe garaiak zelan sortu ziren eta zer ekarri zuten azalduko dute. Era horretako historia duen herrian zerbitzuen sektorea nagusi izatera zelan iritsi den azaltzen ere saiatuko di-ra.

Parte hartu gura duenak ize- na eman behar du aurretiaz herritarrentzako arreta zerbitzuan, 94-478 92 00 telefono zenbakira deituta —bertakoek 010 zenbakira dei dezakete—. 2012an egingo diren era horretako ibilaldiak kobratzen hasiko direla jakinarazi dute, gainera, antolatzaileek.

Era horretako hurrengo txangoa datorren martxoan egingo dute. Urtean, baina, Barakaldoren historia ezagutzeko beste modu bateko ibilbideak ere antolatu dituzte; hain zuzen, Lorategi Botanikoa ezagutu, Ezagutu Barakaldo industriala, Agate Deuna eta Larrazabalgo eskolak eta, azkenik, Errekatxo eta Urdantegieta. Irailera bitartean izango da ibilbideotan parte hartzeko aukera.

Gabonei aurrea hartzeko kontzertuak gaur eta bihar »

Gabonetako ume eta gazteen XVIII. kontzertuak emango dituzte gaur eta bihar Bizkaiko hainbat herritako gaztetxoek, Bilboko Gizakundearen elizan. Abesbatza gisa eratutako talde horien emanaldiak izango dira. 20:15etik aurrera izango dira kontzertuak.

Gaur, Bilboko eta Mungiako abesbatzen kontzertuak entzuteko aukera izango da. Bihar, berriz, Gernika-Lumoko, Gorlizko eta Mungiako taldeak ariko dira. Antolatzaileek jakinarazi dute sarrera doan dela. Escoleia taldea Natividad Solagurenek zuzendurik ariko da; Mmuk, Iker Herrerok zuzenduko du; Gazte Jesus Aranbarri, Maite Olmok; Seber Altube, Gurutze Lejarzak zuzenduko du; Lirain Txiki, Loli Igartuak; eta Tantak, azkenik, Asun Lopezek.

Gabonetako abestiak —bai euskaraz, bai gaztelaniaz eta bai ingelesez—, herri kantak, eta elizako abestiak kantatuko dituzte toki bateko eta besteko gaztetxoek.

TALDEAK

Gaur, 20:15ean. Escoleia (Bilbo), Mmuk abesbatza (Mungia) eta Bilboko Gazte Jesus Aranbarri musika taldea.

Bihar, 20:15ean. Seber Altube korala (Gernika-Lumo), Lirain Txiki (Gorliz) eta Tantak korala (Mungia).

Begirada bat beste kulturei »

Beste Ikuspuntuak kulturarteko IV. astean murgilduta dago Portugalete egunotan. 14 eta 30 urte arteko gazteentzat da, eta munduko beste kulturetara hurbiltzeko jarduerak antolatu ditu Gazte Gelak.Hainbat tailer prestatu dituzte, gazteak kultura batzue…

Bertoko arbolak zainduz »

Urteko azken boluntario jardunaldiak antolatu ditu Lurgaia fundazioak biharko; Muxikan bertako arbolaz osatutako basoak leheneratzen laguntzeko deia egin du, hain zuzen.

Unda deritzon inguruan, babestutako lursail batean egingo dute biharko lana. Helburua baso autoktonoa leheneratzea da. Horretarako, bi jarduera nagusi egingo dituzte boluntarioek: batetik, Robinia pseudoacacia deritzon espezie inbaditzailea atera egingo dute eskuzko metodoen bidez; bestetik, espezie hori kenduta, bertoko arbolak landatu eta babesgarriak jarriko dituztela azaldu du Lurgaia fundazioak.

09:30ean Zugastietako tren geltokian elkartuko dira Lurgaiakoak eta parte hartuko duten boluntarioak. Han, autoak hartu eta Undara joko dute. Egun osorako antolatu dute jardunaldia, baina jakinarazi dute nahi duten boluntarioek aukera ere izango dutela goizeko lanen ostean etxera joateko.

Fundazioa arduratuko da behar den material guztia eramateaz —eskularruak, palak…—; baita otorduaz ere. Hala ere, boluntarioei gogorarazi diete oinetako egokiak eramatea komeni dela; hain zuzen, mendiko edo uretarako botak.

Biharko deialdiagaz bat egiteko asmoa dutenei eskatu diete aurretiaz jakinaraz diezaietela, zer prestatu behar duten jakiteko; batez ere, materialari eta janariari dagokionez.

Horrez gain, elkartzekoak diren lekuraino zelan iritsi ez dutenentzat, bi telefono zenbaki eta helbide elektronikoko bat eman dituzte: 94-405 21 86 (Maider) edo 656-70 34 96 (Jon); eta info@lurgaia.org. Lurgaiak 2011ko borondatezko lanen azken jardunaldian parte hartzera animatu ditu herritarrak.

DEIALDIA

09:30. Zugastietako tren geltokian elkartuko dira.

Egun osoko jarduera. Egun osoko jarduera da, baina nahi duenak goizeko lanetan soilik har dezake parte.

Parte hartzeko. Antolatzaileek azaldu dutenez, parte hartu gura dutenek aurretiaz abisua ematea komeni da: 94-405 21 86 edo 656-70 34 96 telefono zenbakietara deitu, edo mezu elektroniko bat bidali info@lurgaia.org helbidera.

Opari esklusiboa eskura »

Eskulangintza azokaBilboBilbon 28 urteren ondoren erabat errotuta dagoen azoka batek hartuko du berriz ere, gaurtik aurrera, Areatza: eskulangintza azokak. 29. aldiz antolatuko du aurten Sortzenek, Bizkaiko eskulangile sortzaileen elkarteak, milaka es…

Arrantza XX. mendean »

Bisita gidatuak

Santurtzi

Bilboaldeko eta Ezkerraldeko lantegi handiak datozkio burura edonori Bizkaia suspertu zuen industria aipatzean. Itsasoan ere lan handia egindakoak dira, baina, bizkaitarrak. Arrantzaleen beharra ez ahazteko eta zer-nolakoa den ikusteko aukera dago asteburu honetan Santurtzin. Agurtza XX. mendearen erdialdeko atunontzian bisita gidatuak antolatu ditu bertako udalak.

Bihar eta etzi dago bisita horiek egiteko aukera. Doan izango dira. Berez, gazteleraz prestatuta daude. Euskaraz egiteko —edo ingelesez edo frantsesez—, aurretik hitzartutako taldeak osatu behar dira. Izena emateko, Santurtziko turismo bulegora deitu edo posta elektronikoa bidali behar da: 94-48 39 94 telefono zenbakian edo turismo@santurtzi.net helbidean.

Arrantzaleen lan baldintza gogorrak ezagutzeko aukera izango dute Agurtza ikustera doazenek. Zer-nolako arrantza teknikak eta nabigazioa erabiltzen zituzten kontatuko dute bisita horietan.

Agurtza mende hasierara arte itsasoan ibilitakoa da. Aurten zaharberritu egin dute, eta egokitu, bisitariek arrantzaleen bizitza eta arrantza bera itsaso zabalean zelakoa zen ikus dezaten.

Lekeitioko Murelaga ontzioletan egin zuten Agurtza atunontzia. Kostaldetik atera eta Kantauri itsasoan hogei urtean ibili da.

Arrantzaleen bizitzari buruz hitz egitean, emakumeek egin zuten lana ere ez dute alde batera utzi: arraina lehorreratzen laguntzen aritzen zirenak, sardina saltzaileak eta sareginak gogoan izango dituzte Agurtza-n.

Itsasontzi barruko gelak ere erakutsiko dizkiete bisitariei, baita arrantzaleen logelak izandakoak ere. Oso leku txikia zuten arrantzaleek logeletan, eta oso ohe estuetan egiten zuten lo.

Bestalde, itsasontziaren bizkarrean arrainak gordetzen zituzteneko hozkailuak daude. Ahalik eta arrain gehien gordetzeko bata bestearen ondoan ondo sartuta gordetzen zituzten, portura itzuli arte fresko-fresko iraun zezaten.

BISITAK

Bihar. 11:00etan, 12:30ean eta 18:00etan.

Etzi, domeka. 11:00etan eta 12:30ean.