Kaleko kulturaren ordua »

Kaleko kultura adierazpen artistikoen jaialdia da BreakOnStage. 11. ekitaldia izango da aurtengoa, eta berrikuntza nabarmen batekin dator. Bihar agertoki berria izango dute artistek: Bilbo Arena pabiloia. 20:30ean hasiko da ikuskizuna.

Orain arte Casilla pabiloian egiten zen, baina urteekin, nazioartean lortutako oihartzunari esker, geroz eta jende gehiagok parte hartu izan du. Hala, azkenerako txiki geratu da Indautxuko eraikina, eta kokaleku berriari esker parte hartzaile zein ikusle kopuru handiago bati erantzuteko moduan izango dira.

Gainera, antolatzaileek azaldu dutenez, Bilbo Arenak Casillak baino aukera eszeniko malguagoak eta dinamikoagoak eskaintzen ditu. Hala, orain arte eskaintzerik izan ez duten kaleko bestelako kultura adierazpenak izango dira bihar. Besteak beste, Dirt Jump delakoaz gozatuko dute ikusleek. Horretarako, zazpi metroko garaiera duen malda bat jarriko dute agertokian. Euskal herritar batek erabiliko du: Martxel Arribilaga nafarrak, hain zuzen. Ikuskizunen arteko tarteetan, bizikletariak zorabioa eragiteko moduko jauziak egingo ditu.

Jaialdiak hiru orduko iraupena izango du. Tartean mundu osotik etorritako hainbat artistaren ikuskizunak izango dira. Adibidez, Scott Maruquese AEBetako Atlanta hiritik dator. Popping deitzen diren roboten antzeko mugimenduak egiten iaioa da. Aurrenekoz izango da Europan, Dubset Show izeneko ikuskizunarekin. Bere lana Interneteko bideo bidez zabaltzen du, eta berri bat sareratu orduko 30 milioi bisita lortzen ditu.

Vagabond Crew, berriz, munduko breakdance txapelduna da une honetan, eta bihar Bilbon egingo du erakustaldia. Rapsusklei Zaragozako abeslariak egundoko hip hop kontzertua emango du. Abeslariak mundu osoko agertokietan batetik bestera igaro ditu azken urteak. Iragarri du Bilbora azken berrikuntzekin etorriko dela.

Parte hartzeko aukera

Artista ezagunekin batera, zaleek ere euren tartea izango dute. Horretarako antolatu dute aretoko breackdance lehiaketa. Paristik, Bruselatik, Madrildik eta Zaragozatik etorriko dira lehiakideak, besteak beste.

BREAKONSTAGE

Zer. Kaleko kultura adierazpen artistikoen jaialdia.

Non. Bilbo Arena pabiloian.

Noiz. Bihar, 20:30ean hasita.

Sarrera. Aldez aurretik, 10€; txarteldegian, 12€.

Plaza, letren gunea »

Liburu azoka

Barakaldo

Liburu eta diskoek hartuak dituzte Barakaldoko Herriko Plazako txoko guztiak. Egunotan, Barakaldoko 22. Liburu Azoka egiten ari dira.

Astelehenera arte daukate handik pasatu ez direnek bisita egiteko aukera. 24 saltokitan eta liburutegi batean hamazortzi argitaletxe eta sei liburu dendaren lanak daude ikusgai eta salgai.

11:00etatik 14:00etara eta 16:30etik 20:00etara egongo da zabalik azoka gaur eta datorren astelehenean. Bihar eta etzi, berriz, ordu erdi lehenago zabalduko dute.

Idazleekin eurekin hartu-emanak izateko aukera ere izango da. Bihar, esaterako, 19:00etan, Toti Martinez de Lezea idazlea izango da azokan, Nur bere lanarekin. Alberto Bargos eta Piedad Ortiz de Urbina ere han izango dira. Domekan, 13:00etik aurrera, Pedro Ugarte, David Gotsidrizde, Mikel Alvira eta Javier Consejo bertaratuko dira. Astelehena izango da idazleek euren lanak sinatzeko azken eguna. Egun horretan, Andres Galan eta Victor Manuel Gete izango dira Barakaldoko azokan.

Prezio merkeagoak

Liburu edo disko berriak erosteko orduan, beherapenak dauzkate bezeroek azoka horretan. Hain zuzen, dendetan baino %10 merkeago aurkituko dituzte. Euskal Pizkundearen garaiko argazki eta liburuen erakusketa bisitatzeko aukera ere izango dute bertaratzen direnek.

Gaztetxoenen aisialdirako jarduerak antolatuko dituzte, bestalde, bihar. 12:00etan, Atarrabi taldeak antolatutako tailerrak izango dira. 16:00etan, sortze-idazkeraren 5. rallya egingo dute. Ibilalditxo bat egin behar dute parte hartzaileek, eta noizean behin bidean geldituta, norberak sentitzen eta ikusten duena paperean idaztean datza jarduera hori. Barakaldoko Udalak gogora ekarri du azken urteetan oso harrera ona izan duela.

18:30ean, Zirkale konpainiak Vaya par! (A ze parea!) kaleko antzezlana interpretatuko du. Domekarako, puzgarriak eta haurrentzako tailerrak antolatu ditu Ainara kultur elkarteak. 18:30ean, Jolas, el científico inventor (Jolas, zientzialari asmatzailea) kaleko antzerkia izango da.

Gurutze, Ama Birjina eta santuak elizetatik kalera aterako dituzte »

Gaur zortzi hasita, orotara, 13 prozesio ibiliko dira Bilboko erdiguneko kaleetan, domekara bitarte. Gaur, kasurako, lau aterako dira kalera. 05:30ean abiatuko da San Nikolas elizatik Isiltasunaren Prozesioa. Irudirik gabe eta isilpean, Zazpikaleetako elizak bisitatzen dituzte. 07:30ean, Unamuno plazatik Begoñako basilikara arteko gurutze bidea egingo dute. 12:00etan, Elkartzearen Prozesioa ibiliko da Indautxun. 19:30ean iritsiko da garrantzitsuena: Hileta Santua. Joan santuen elizatik Moyua plazara eramango dituzte nekaldi osoa irudikatzen duten pasoak.

Bihar, 18:30ean, Itxaropenaren Prozesioa aterako da Zabalguneko San Josef elizatik. Domekan, azkenik, 13:00ean abiatuko da Argiaren Prozesioa katedraletik.

Bermeon bi prozesio izango dituzte gaur: 11:00etan, Elkartzea eta 17:30ean, Hileta Santua. Ondarroan Piedadeko Aita Eternu bere ermitara itzuliko dute gaur goizean, eta, ostean, gurutze bidea egingo dute. Lekeition, 08:00etan gurutze bidea egingo dute, eta 18:00etan, elizkizuna bukatutakoan, Mingorriaren Prozesioa. Igandean, 08:00etan Magdalena eramango dute ermitara.

Urkiolan 11:00etan egingo dute gurutze bidea. Urduñan, berriz, 05:00etan, 11:00etan eta 18:00etan Gurutzearen Prozesioa, gurutze bidea eta Hileta Santua izeneko prozesioak aterako dira.

Kultura eta fedea, batuta »

Elizkizunak latinez egiten zirenez, herritarren artean sinesmen katolikoa zabaltzeko sortu ziren, besteak beste, Aste Santuko prozesio eta nekaldiaren antzezpenak. Gaur egunera arte iraun dute toki askotan, herriko kultura adierazpenen parte bihurtuz. Egunotan Bizkaiko hainbat herritan ikus daitezke halako erlijio erakustaldiak, eta ez dira gutxi izaten eurak ikustera gerturatzen diren bizkaitar eta bisitariak. Hona hemen nagusiak:

1. Balmaseda

Nekaldirik ezagunena Balmasedakoa da. XVI. mendeko penitentzia prozesioetan dauka jatorria, historialarien arabera. Garai hartan herria izurriteak jota zegoen, eta gaitza desagertuz gero penitentzia egiteko hitza eman zioten herritarrek San Roke zaindariari. Nekaldiari aipamen egiten dion dokumenturik zaharrena, ordea, XVIII. mendekoa da. Hasiera hartan, prozesioetan ikus daitezkeen zurezko irudiak eta gurutzeak ateratzen zituzten kalera. Askoz kontu modernoagoa da antzerkiarena: XX. mendekoa.

Edonola ere, gaur egungo balmasedarrentzat urteko ekitaldirik garrantzitsuenetako bat izaten da. Orotara, 700 herritarrek parte hartzen dute nekaldian. Horietatik 350 aktore lanetan aritzen dira, aktore profesional izan barik. Hala, hilabeteak egiten dituzte entsegu eta bestelako prestaketetan buru-belarri.

Bart iluntzean ikusi ahal izan zuten aurreneko zatia, eta gaur goizean antzeztuko dute bigarrena. Aurreneko emanaldian, besteak beste, Jesusek apostoluekin egindako azken afaria, baratzeko otoitzaldia, Jesusen atxiloketa eta Kaifas abade nagusiaren aurrean egindako epaiketa antzezten dituzte. Gaur goizean, berriz, Pilatok Jesusi egindako epaiketa, gurutze bidea eta gurutzeko heriotza antzeztuko dituzte.

09:30ean hasiko da emanaldia Klaratar lekaimeen komentua izeneko eraikinaren ondoko zelaian. Gurutzerako bidean herriko alde zaharra zeharkatuko dute aktoreek. Milaka bisitari jasoko ditu egunotan, bada, Enkarterriko herririk handienak. Gaur goizeko saiorako sarrera eskuratzeko astia dago oraindik. Klaret antzokian erosi ahal izango dira, 08:00etatik 09:15era bitartean.

Antzezpenaz, gain, Balmasedako nekaldiak prozesioak ere baditu. Atzo arratsaldean atera zituzten aurrenekoz pasoak alde zaharreko kaleetara. Gaur, berriz, bi prozesio izango dira. 19:00etan Ehorzte Santuaren prozesioa egingo dute. Nolabait, goizeko antzezpenean hilko den Jesus lurpera bidean lagunduko dute. Pasoekin batera, prozesio horretan goizeko antzezpenean ere parte hartu duten hezur-haragizko hainbat pertsonaia ibiliko dira kaleetan: Maria Magdalena, Andre Maria, Veronika eta apostoluak, besteak beste. 21:30ean, berriz, Isiltasunaren Prozesioa egingo dute. Hilerriko Kristo eta Andre Maria Doloretakoa aterako dituzte kaleetara, soldadu erromatarrek babestuta.

2. Durango

Hemeretzigarren urtez antzezten ari dira Durangon Pasiñue esaten dioten Jesusen nekaldia. Juan de Iciar kultur elkarteak antolatzen du. Hiru egunetan egoten da antzezlana ikusteko aukera: eguazten, eguen eta barikuan. Hala, gaurkoa da azken emanaldia. Balmasedan ez bezala, Durangon, egunero antzezten dute nekaldi osoa. Hau da, azken afariarekin hasi eta gurutzeko heriotzara arteko pasarte guztiak taularatzen dituzte egunero. Gainera, Durangon agertoki bakarra erabiltzen dute: Santa Ana plaza.

Azken urteetan turismo eskaintza berezia egiten ari dira, Durangoko Udalarekin batera, herriko hoteletan lo egin eta Aste Santuko egunak bertan igarotzeko, nekaldiaren antzezpena ikusteko aitzakian. Hala ere, eskaintza hori hartzen ez dutenek ereprozesioa ikustera joateko sarrera eskura dezakete.

3. Zaratamo

Arkotxako (Zaratamo) Gaztek Abi gazteen astialdirako elkarteak antolatuta, duela 47 urte hasi ziren auzo horretako biztanleak Jesusen nekaldia antzezten Aste Santuan. Urtero-urtero ehun bat lagunek parte hartzen dute, eta, antolatzaileen esanetan, indarra galdu ordez, azkenaldian gero eta laguntza eta babes zabalagoa jasotzen ari dira.

Bart antzeztu zuten azken afaria, auzoko elizan. Gaur, berriz, 11:00etan dute hitzordua, gurutze bidea osorik ikusi nahi dutenek. Elizako plazatik abiatuko dira, eta handik Santa Barbara auzorako bidea hartuko dute. Hamalau egotaldiak egin ostean, gurutziltzatuko duten muinoan bukatuko da antzezpena.

Ikuskizun guztiak batean »

Kaleszena

Bilbo

Musika, antzerkia eta zirkua. Era guztietako ikuskizunek bat egingo dute egunotan Bilboko kaleetan, VI. Kaleszena jaialdiaren barruan. Atzo hasi zen jaialdia, eta etzi arte arte erakustaldiak izango dira Plaza Barrian, Zazpikaleetan, Ertzilla eta Garcia Rivero kaleetan, Arriaga plazan eta Plaza Biribilean. Aurten, hamabost antzezlan eta zuzeneko musika saio antolatu ditu Bilboko Udaleko Kultura eta Hezkuntza Sailak.

Plaza Barria izango da euskal dantzen eta musikaren topagunea aurten ere. Gaur, 21:30etik aurrera, Oreka TX taldeak, Kukai Dantza konpainiarekin eta Amaren Alabak taldearekin batera, Hostoak ikuskizuna eskainiko du. Txalapartaren erritmoan oinarritutako dantza, musika eta kantu emanaldia taularatuko dute.

Hortzmuga konpainiaren eskutik, bestalde, Zazpikaleetan bisita gidatuak antolatu dituzte. Ez dira ohiko bisita gidatuak izango, ordea, antzerki eran egindako bisitak baizik. Anfitrioiak izeneko proiektuaren bitartez, orainalditik iraganerako bidaia proposatuko die Hortzmugak bisitariei, eta hiribilduaren eta bertako bizilagunen historiaren berri emango diete ikusleei.

Oinez eta itsasontziz egingo dute ibilbidea, eta bilbotarren alderdi bereizgarrienak azaleratuko dituzte aktoreek. Bisita horiek gaurtik domekara bitartean egunero egingo dituzte, 11:30ean. Hamar euro balio dute, eta tokiak mugatuak direla iragarri dute antolatzaileek. San Anton elizatik aterako dira.

EGITARAUA

Gaur. Plaza Barrian: Kale antzerkia, 18:00etatik 20:30era, Circovito (Andaluzia, Espainia), Cie. Bris de Banane (Frantzia), Mr Jones (Holanda) eta Ganso & Cia (Euskal Herria) taldeen eskutik. 21:30ean, Oreka TX, Kukai dantza konpainia eta Amaren Alabak.

Bihar. Ertzilla eta Garcia Rivero kaleetan: 13:00etan, kaleko musika: A Magnifique Bande dos Homes sen Medo (Galiza). Plaza Biribilean eta Plaza Barrian, 18:30ean egingo du talde horrek emanaldia.

Etzi. Bisita gidatua, Hortzmugaren eskutik —gaur eta bihar ere egongo dira—.

Nafar eta gaztelarrak, Bizkaian »

Hirugarren urtez, Bilboko Iralabarri auzoak historian atzera jauzi egingo du. Asteburu honetan berrituko dute 2010ean auzoko jai batzordeak lehenenegoz martxan jarritako Erdi Aroko azoka. Aurten, duela 500 urteko Nafarroako erresuma ekarriko dute Uriz…

Ardo zuri biziaren festa »

Txakolin Eguna

Larrabetzu

Txakolin Eguna ospatuko dute domekan Larrabetzun. Ardo honi eskainitako 11. eguna izango dute etzikoa.

Ekitaldi garrantzitsua izango da Txorierri eskualdeko txakolin ekoizleentzat. Izan ere, Larrabetzuko Udaleko Nekazaritza batzordeak gogora ekarri duenez, egun horri “garrantzi handia” ematen diote: “Erreferentea da eurentzat”. Azoka ekoizleekaz eurekaz elkarlanean antolatzen dute. Txakolinaz gain, hainbat produktu ikusteko eta erosteko aukera ere izango dute bertaratzen direnek: gazta, eztia, ortuariak, sendabelarrak eta fruitu txikiak. Baita horietatik eratorritako produktuak ere: landareak, xaboiak eta xanpu naturalak… Txerrikiei dagokienez, txorizoa ere izango da domekako azokan, eta, horrekin batera, baita taloa ere.

Ortuari eta ogi ekoizleen artean, Larrabetzukoak bertakoak egongo dira. “Saiatu gara herriko ekoizleak ekartzen. Azokan egongo diren gainerako ekoizle gehienak Bizkaikoak dira”, zehaztu dute.

25 erakusleku

Guztira, 25 saltoki edo erakusleku egongo dira. Horietatik, zazpi izango dira txakolin ekoizleenak.

Larrabetzuko plazan egingo dute azoka. 10:00etatik 15:00etara bitartean egongo dira saltokiak bertan. Musikaz girotutako eguna izango da domekakoa. Eguerdi aldera, gainera, txakolin ekoizleek eurek topa egingo dute, eta, ondoren, herriko bertso eskolakoek kopla batzuk abestuko dituzte.

Orain artean hainbat bisitari erakarri ditu Txakolin Egunak Larrabetzura. Azoka 15:00etarako bukatu arren herrian “giro handia” sortzen dela eta iluntzera arte irauten duela ekarri dute gogora Nekazaritza Batzordekoek. Interesa dutenei domekan Larrabetzura joateko deia egin die udalak.Joan den otsailean aurkeztu zuten ekoizleek aurtengo Bizkaiko txakolina. 2011. urteko uztarekin 1.642.907 litro txakolin ekoitzi dituzte herrialdean —2,2 milioi botila—. 358 hektarea lur hartzen dituzte Bizkaiko txakolina egiteko landatutako mahastiek. Aurtengoa “kalitatezko txakolina” da, “nahikoa konplexua, mahatsaren heltze osatuaren ondorio”, ekoizleen arabera.

Askatasun aldarrikapenaren urteurrena gogoan »

Galdakaoko auzo den herria da Usansolo, baina udalerri burujabe izan nahi du. Banatzeko hainbat ahalegin egin dituzte; azkena iazko martxoaren 30ean hasi zuten, Usansolo Herria plataformaren sorrerarekin. Udal hauteskundeetara aurkeztu ziren, eta Usan…

Arrantzan ikasteko aukera zabaldu du Bilboko Arrantza Eskolak »

Bilboko Arrantza Eskola arrantzan zelan egin irakasten hasi zaie 5 eta 16 urte arteko gazteei. Domeketan ematen dute aukerari hori, 11:30etik 13:30era bitartean. Maiatzaren 25era arteko domeka guztietan —apirilaren 8an izan ezik— egongo da zabalik eskola.

Parte hartu gura dutenek ez dute ezer eraman behar, Bizkaiko Arrantza Federazioak eramango baititu beharrezkoak diren elementu guztiak: kainaberak, txirrikak, kirol materiala, karnata… Hogei begirale inguru izango dira bertan arrantzan irakasteko eta gazteei laguntzeko.

Arrainak harrapatu eta askatu

Flotagailuaren modalitatearekin arrantzatzen dutela jakinarazi dute antolatzaileek. Horrez gain, harrapatutako arrainak berehala uretara itzuliko dituztela azaldu dute.

Bederatzi urte daramatza zabalik eskolak. Azaldu dutenez, urtero, 1.500 gazte inguruk hartzen dute parte jarduera horretan. Parte hartzeko ez da ezer ordaindu behar, doakoa da. Eskola Bilbao Bizkaia Ur Partzuergoak antolatzen du, eta Bizkaiko Arrantza eta Casting Federazioak kudeatu, Bilboko Udalaren eta aldundiaren laguntzarekin.

Igeriketa sinkronizatuko kirolari onenak, Galdakaon »

Igeriketa sinkronizatuaren erakustaldi eta lehiaketa hartuko du gaur hasi eta domekara bitartean Galdakaoko Urreta kiroldegiak. Bertan egingo dute Igeriketa Sinkronizatuaren Espainiako Junior Asisa lehiaketa. 8 eta 15 urte arteko 124 igerilarik hartuk…