Lokarria eztula lotzeko »

San Blas

Abadiño

Abadiñok harrera egingo dio gaur urteko jai nagusiari. San Blas eguna ospatuko dute bertan, Euskal Herri osoan ezagun bihurtu den azokarekin. Eztarriko gaitzak uxatzeko bedeinkatutako lokarri eta erroskillaz haratagoko jaialdi bihurtu da, dagoeneko, gaurko ospakizuna. Edozelan ere, horiek ere tartea izango dute.

Ganadua, baserrirako tresnak, burdineria, ortuariak, fruituak, gazta, txakolina, ogia, eztia, artisautza eta landareak aurkituko ditu gaur Abadiñoko azokara biltzen denak. XX. abelburu erakusketa ere izango da.

09:00etan, Txanbolin taldeak alaitutako kalejirak girotuko du herria. Umeek euren txokoa izango dute Txanporta kultur etxeko arkupean, eurentzako tailerrak antolatu dituzte-eta bertan.

12:00etan, bertsolarien txanda iritsiko da. Xabier Amuriza, Garikoitz Sarriugarte eta Eñaut Uruburu ariko dira bertsotan Gogaikarri bertso eskolako ikasleekaz batera, Ferialeku plazan.

Probalekuan herri kirolak izango dituzte 12:30ean, eta, gero, nekazaritza produktuen sari banaketa egingo dute. Eguneko ospakizunei bukaera emateko, Lotxo taldearen erromeria izango da Ferialeku plazan.

Dena dela, idi probek ere lekua izango dute San Blas egunean, eta baita datozen egunetan ere. Gaur, 17:00etan eta 22:00etan egingo dituzte. Bihar ere, ordu beretan izango dira, eta domekan, berriz, 18:00etan. Hurrengo astean ere egongo dira.

San Blas txiki

Etxeko txikienak izango dira bihar Abadiñoko protagonistak, San Blas txiki egunean. 11:00etan eskola arteko krosa jokatuko dute Traña-Matiena auzoan. Bidezabal atletismo taldeak antolatutako txapelketa da hori. Kirolarekin jarraitzeko, 14:30ean, V. Eskola Igeriketa liga izango da udal igerilekuetan.

18:00etan, Tor magoaren magia erakustaldia izango da kultur etxean. Gero, txokolate jana prestatuko du Txirikilla aisialdi taldeak.

Egunari bukaera emateko txosnetan rock jaialdia antolatu dute. Hiru talderen musika zuzenean entzuteko aukera izango da 23:00etatik aurrera: Kruders, Arkada Social eta Itziarren semeak.

Eskuzabaltasuna, kameraren objektibotik ikusita »

Arratiako Elizak bertako hainbat misiolarik Ekuadorren egin duten lana erakustera emateko erakusketa bat antolatu du. Herriz herri dabil, eta urtarrila bukatu arte Igorreko Lasarte aretoan egongo da ikusgai. 23 paneletan, Arratiak Los Riosegaz (Ekuado…

Bakarra besteko askotarikoa »

Inauteriak iristeko hilabete baino gutxiago falta dela, Bilboko Euskal Museoak giroa berotzeko aukera eskaintzen du. Martxoaren 4ra bitartean, Inauteriak, Europako errege izeneko behin-behineko erakusketa ikusi ahal izango da. Izenak berak dioen modur…

Iraganaren lekuko »

Bisita gidatuaBilboBizkaiko Foru Agiritegi Historikoak bisita gidatuak antolatu ditu aurrenekoz. Asteartero, gidari batek lagunduta, Bilboko Maria Diaz de Haro kalean dagoen eraikinaren barrunbeak ezagutzeko aukera egongo da. Horretarako, aurretiaz hi…

Azken txanpa indartsua sanbizenteak bukatzeko »

Joan den asteburuan hasi ziren Barakaldon San Bizente jaiak ospatzen. Hala ere, igandean da santuaren jaieguna eta ordura arte asteburu indartsua dute aurretik. Gaur bertan, kasurako, Mozorro Eguna ospatuko dute, Horterak vs Fashion Victims lelopean. …

Mareek ezkutatzen duten hori »

Erakusketa berria inauguratu du Bilboko Itsasadarreko Itsas Museoak Mugan: lurraren, itsasoaren eta airearen artean. Azti-Tecnalia ikerketa zentroak prestatu eta antolatu du, eta martxoa bukatu arte egongo da. Aurretik beste leku batzuetatik igaro ost…

Kolpez kolpekako lehia »

Boxeo lehiaketa

Sestao

Boxeo erakustaldia izango da bihar Sestaon. Hain zuzen, 2012ko boxeo olinpikoaren Bizkaiko lehiaketarako kanporaketa txapelketa egingo dute Benedicta kiroldegian. 18:00etan abiatuko dute norgehiagoka, eta irabazten dutenak hurrengo asteko finalerdietara pasatuko dira. Han nagusitzen direnek finala jokatuko dute otsailaren 11n.

Gizonezkoak ikusteko aukera izango da bihar. Emakumezkoek, lehiatzeko prest egon badauden arren —hiruk eman dute izena— , ez dute euren mailetan borrokatzeko aurkaririk. Beraz, zuzenean Bizkai, Gipuzkoa eta Arabako boxeolarien norgehiagoka hartzen duen txapelketara pasatuko dira, Carlos San Jose Bizkaiko Boxeo Federazioko presidenteak jakinarazi duenez.

‘Superwelter’-ekoak gehienak

Gizonezkoei dagokienez, bestalde, superwelter deritzon kategoriakoak —66,678 eta 69,853 kilogramo artekoak— izango dira lehiakide gehienak. San Joseren arabera, lehenago “luma-pisukoak eta arinak ziren. Orain, ordea, gazteak gehiago hazten dira, eta pisu gehiago hartzen dute lehen baino elikadura hobea dutelako”, argitu du.

Bestalde, faborito batzuk egon badauden arren, ez du esan gura izan nor ikusten duen garaile, “besteekiko mespretxurik ez egiteko”. Hala ere, uste du berak garaile ikusten duen gizonezkoa Espainiako lehiaketara iritsiko dela. “Eta handik bueltan —apirilean—, profesionalen mailan sartuko da”, iragarri du.

Bizkaian boxeolarien maila goraka doala deritzo Carlos San Josek. “74 urte dauzkat. Nire sasoietan zapatu guztietan egoten ziren boxeo erakustaldiak. Boxeoa ez da elkarri jotzea soilik, arau eta teknika batzuk daude”, zehaztu du.

Halere, garai batean PSOE alderdiak kirol hori debekatu egin gura izan zuela ekarri du gogora, eta ondorioz praktika horrek eta haren jarraitzaileek “behera nabarmen” egin dutela esan du.

Dena den, “apurka indarra berreskuratzen” ari direla dio, baita lehiaketetara ikusle asko joaten direla ere: “Sestaon, 600 eta 800 bitarte izaten dira”. Bihar txapelketa ikusi gura duenak hamar euro ordaindu beharko du sarrera.

‘Hareazko ipuinak’ antzezlana estreinatuko dute bihar »

Hareazko ipuinak Markeliñe antzerki konpainiaren lan berria euskaraz ikusteko aukera izango da bihar Zornotza aretoan. 18:00etan emango dute ikuskizuna. Sarrerak lau euro balio du.

Aita baten gogoetak eta aldarte aldaketak erakutsiko dituzte aktoreek taula gainera. Kezka nagusi bat dauka aita horrek. Hain zuzen, alabak gaixotasun sendaezin bat du, minbizia. Eta gaztetxoak bere haurtzaroa galduko duen beldurrak obsesionatu egiten du gizona. Kezkak, beldurrak, samina… azalduko dira antzezlanean. Baita barreak ere.

Gaztelerazko estreinaldia gaur egingo dute, 21:00etan. Familia osoarentzako antzezlan gisa aurkeztu dute antolatzaileek.

Egitarau zabala

Datozen hiletara begira, egitarau zabala aurkeztu dute Zornotza aretoan, “gustu eta adin guztietako publikoarentzat programatu den eskaintza”. Musikak, dantzak, antzerki lanak, familientzako ikuskizunak, zinemak… Guztiek lekua izango dute eskaintza horren barruan.

Besteak beste, Jabier Muguruzak Bikote bat bere azken lana aurkeztuko du otsailean. Eta martxoan, emakumeek egindako film laburrak emango dituzte.

Aisialdian euskara bultzatuko dute, ikusi eta ikasiz »

Datorren astelehenean, Ikusi eta Ikasi programa hasiko dute Bilbon berriz ere; 3 eta 12 urte arteko ume eta gaztetxoek aisialdian euskaraz hitz egitea helburu duen programa, alegia. Martxoaren 17ra arte hainbat ekitaldi antolatu dituzte Begoña eta Deustuko udaltegietan, Indautxuko Karmen aretoan, Bilborock aretoan eta Errekaldeberri, Tiboli, Zamakola eta Zurbaran ikastetxe publikoetan.

Aisialdia, kultura eta hezkuntza uztartzeko helburuagaz Bilboko Udaleko Euskara, Gazteria eta Kirol Sailak antolatu dituen 30 ekitaldiak astelehenean hasiko dituzte, Jolasen Txokoagaz. Umeentzako “erakusketa dinamiko” gisa aurkeztu dute ekitaldi hori, eta jostailuak, jokoak, ipuinak, filmak, musika eta bideo jokoak erabiliko dituzte han.

Begoñako udaltegian egingo dute ekitaldi hori astelehenean, 17:30etik 19:30era. Datorren barikuan eta zapatuan, berriz, Deustuko udaltegian egingo dute.

Euskaraz ez dakiten gurasoentzat, besteak beste, laguntza eta orientazio tailer bat ere emango du udalak aurten, seme-alabei etxeko lanetan lagundu ahal izateko. Gainera, sukaldeko errezeten tailer praktiko bat ere prestatu dute, familia eremuan euskararen transmisioa bultzatzeko.

Abereak nagusi sanantontxuetan »

San Antontxu eguna ospatuko dute datorren eguaztenean Mungian; egun hori heldu bitartean girotzen hasteko, egitarau zabal bat prestatu dute herrian, asteburu osorako. Gaur bertan hasiko dituzte ekitaldiak. Gauean, 21:00etan, Su Ta Gar taldearen kontzertua izango da Olalde aretoan. Aurretik, 19:30ean, Binakako Munduko Pala Txapelketa ikusteko aukera izango da udal frontoian. Sarrerak bost euro balio du.

Bihar, herri kirolekaz hasiko dituzte ekitaldiak; 12:00etan egingo dituzte, Olalden. Gero, idi proba erakustaldi bat antolatu dute, 4.300 kiloko harriagaz. Iluntzean Xabier Lete izango dute gogoan, eta kontzertu bat egingo dute haren omenez; 20:00etan izango da, Olalden. Sarrerak zortzi euro balio du, eta aukera dago aurretik erosteko.

Indaba lehiaketa

Domekan, jakiek protagonismo handiagoa hartuko dute. Indaba usainak Andra Mari plaza hartuko du goiz osoan, Mungiako II. Indaba Lehiaketa dela eta. Txispeleta eskaut taldeak antolatutako txapelketako sari banaketa 18:00etan egingo dute, udalak jaietarako atondu duen karpan.

Bazkaldu aurretik, kirolerako tartea ere izango da. Bizikleta gustuko dutenek aukera ezin hobea daukate ibilaldi bat egiteko, Mendi Bizikletaren XX. Martxa antolatu baitu Valentin Uriona txirrindulari elkarteak, 10:00etan.

Antzinako autoak gustatzen zaizkienentzat, berriz, auto klasikoen erakusketa bat eta azoka bat antolatu dituzte, Legarda eskolen inguruan. 10:00etan hasiko da Goggomobil eta Auto Klasikoen elkarteak antolatutako erakusketa hori.

Euskal kulturak ere tarte bat izango du San Antontxu bezperetan. 13:00etan, bertso saio bat izango da Andra Mari plazan, Taket Mungiako bertsozale elkartearen eskutik; Jon Maia, Onintza Enbeita, Sustrai Colina eta Jexux Mari Irazu ariko dira Iñaki Beitia Arbildu-k jarritako gaiei hitzak eta bertso doinuak jartzen. Gero, 15:00etan, bertso bazkaria izango da Ehiza eta Arrantza Elkartearen txokoan. 16:30ean, giroa alaitzen jarraitzeko, kantagunea jarriko dute udalaren karpan eta Andra Mari plazan.

Astelehenean atseden hartu, eta martitzenean San Anton eguna ospatuko dute mungiarrek. Dantzak izango dira eguneko protagonistak; Mungiako Dantza Eskolaren eskutik, erakustaldi bat egingo dute, 19:00etan.

Egun handia eguaztena izango da: orduantxe ospatuko dute San Antontxu eguna. Ohi bezala, egun osoan feria nagusia izango da, eta bertaratzen diren jaizaleek era guztietako saltokiak ikusteko aukera izango dute, feria lekutik hasi eta Foruen enparantzaraino.

Abereak, plazara

Feria lekuan, ganaduaren erakusketa eta salmenta egingo dute. Gainera, 11:00etan, abere arrazen ezaugarriei buruzko azalpenak emango dituzte hainbat adituk. Dena den, ganadua ez da protagonista bakarra izango; izan ere, animaliez gain, aukera izango da hainbat makina, erreminta, fruitu arbola eta landare apaingarri ere ikusi eta erosteko.

Foruen enparantzan, Matxin plazan eta Trobika, Alkartasuna eta Itxaropena kaleetan bertoko produktuen erakusketa izango da. Produktu horiek salgai egongo dira.

Andra Mari plazan, Euskadiko Odoloste eta Txorizoen XVI. Lehiaketa egingo dute. 11:00etan egingo dute sari banaketa, udalaren karpan.

Eskulangileen lanek ere lekua izango dute San Antontxu egunean. Bentades aterpean, herriko eskulangileen lanak egongo dira ikusgai. Iturribide kalean, berriz, eskulangintza lan ugari erakutsi eta salduko dituzte.

Arratsaldean, Ilargiaren bi aldeak umeentzako antzerki, musika eta zirku ikuskizuna izango da, Olalde aretoan. Lau urtetik gorako umeentzat da. Sarrerak lau euro balio du.

Euskal erromeriagaz emango diete amaiera ekitaldiei, 19:00etan, udalaren karpan. Horrez gain, kale animazioa izango da arratsalde osoan, Txikuri fanfarrearen eskutik.

Herriko giroa ikusi gura dutenentzat, txutxu trena ibiliko da goizez eta arratsaldez; 11:30etik 14:00etara eta 16:30etik 20:00etara, Elorduigoitia kaletik atera eta leku berera bueltatuko da.