6.300 euroko zorra zuen emakume bat etxetik kaleratu du Alokabidek »

Alaitz Armendariz

Etxe kaleratze bat izan zen aurreko astean Bilbo Zaharrean Alokabidek dituen etxebizitzetako batean, EH Bilduk deitoratu duenez. Eusko Jaurlaritzaren sozietateari 6.300 euro zor zizkion kaleratutako emakumeak. Aitziber Ibaibarriaga Bilboko EH Bilduko zinegotziaren esanetan, kaleratutako pertsonak proposamen bat aurkeztu zuen irailean zorra kitatzeko, baina Eusko Jaurlaritzak ez zuen proposamen hori onartu. Horrelako kasu “larriek” EAJren “hipokrisia” agerian uzten dutela salatu du: “Pertsonak ardatza direla diote, baina prest daude 6.300 eurogatik jendea kalean uzteko”.

Koalizioko kideak gaitzetsi duenez, udalak badu etxe kaleratzeei aurre egiteko protokolo bat, baina protokolo horrek “ez ditu etxebizitza publiko batetik kaleratuak diren pertsonak barne hartzen”. Bilboko Udalak bi alternatiba dituela esan du Ibaibarriagak: “Eusko Jaurlaritzarengana jo eta Begoñak aurkeztutako akordiorako proposamen hori onartzea exijitzea”, edo “beste udal etxebizitzen bitartez indarrean dagoen protokoloa aldatzea, eta mota horietako kasuei aurre egiteko baldintzak ezartzea”.

Etxebizitza hutsen errolda

Iker Casanova EH Bilduko legebiltzarkideak etxebizitza politika guztia “koordinatuko” duen erakunde baten beharra aldarrikatu du, administrazioen arteko desadostasunak eta koordinaziorik ezak saihesteko. Horretaz gain, adierazi du “funtsezkoa” dela hutsik dauden etxebizitza guztien errolda bat egitea, eta, errolda horretatik abiatuta, etxebizitza horiek merkaturatzeko neurriak hartzea. “EH Bildun uste dugu etxebizitza politikaren ardatza alokairuzko etxebizitzen eskaintza dela, eta erakunde publiko guztiek inplikazioa erakutsi behar dute arazoak saihesteko”.

Casanovaren ustez, gaur egun etxebizitza publikoak lortzeko dauden minimo ekonomikoak ezabatzea beharrezkoa da. “Erakundeen babesa gehien behar dutenak dira, hain zuzen, diru sarrera txikienak dituztenak”, azaldu du. Haren hitzetan, oraingo parametroetan jende hori da “kanpoan” gelditzen dena. Horregatik, eskatu du etxebizitza publiko bat izateko pertsona edo familia bati eskatzen zaion ahalegina ez dadila izan bere diru sarreren %30 baino handiagoa. “Eta, gutxieneko soldataren azpiko diru sarrerak baldin badituzte, %15 baino ez liekete eskatu behar”, aldarrikatu du.

Pertsona bat bere etxebizitzatik kanporatzea “muturreko egoera bat” izan behar dela uste du EH Bilduko legebiltzarkideak. “Iruzur argien kasuetan bakarrik bota beharko litzateke pertsona bat etxebizitza publiko batetik”.

Zor “handiegia”

“Kasu partikularrei” buruz hitz egiteko ahalmenik izan ez arren, Eusko Jaurlaritzako Enplegu eta Gizarte Politiketako Sailak azaldu du pertsona bat etxetik kaleratu aurretik “hainbat bide” bilatzen dituztela egoera konpontzeko, diru gutxiago ordainduta edo zorrak era erosoagoan ordaintzea ahalbidetuta, adibidez. Baina, zorra “handia” bada, kuota oso txikia ordainduta ez da lortzen zorra kitatzea: “Pertsonei jartzen zaien kuota diru sarreraren araberakoa da; hori dela eta, andre horri ere bere diru sarreren arabera jarriko zioten kuota, eta ez dute lortu akordiorik”, arrazoitu du kaleratzea sailak.

Bestetik, zenbait lagunek protesta egin zuten atzo kanporatutako emakumearentzat irtenbide bat eskatzeko. Udaletxe aurrean elkarretaratzea egin zuten, udalbatzarra egiten ari ziren bitartean.

Gabarra ere, erasoen aurka konkistatzera »

Aitziber Laskibar Lizarribar
Bizkaiko industrializazio prozesuari lotuta daude gabarrak. XIX. mende amaieran, meatze guneetako mendietatik ateratako burdina Labe Garaietara eta Bilbo inguruko zein Ezkerraldeko lantegietara eramateko sortu ziren motor g…

Euskarazko istorioen agertokia »

Natalia Salazar Orbe
Atzean istorio onik ez duen film batek ez dauka zentzurik”. Hala ondorioztatu du Arantza Ibarrak. Euskal Herriko Gidoigile Profesionalen Elkarteko zuzendaritzako kidea da. Eta, hala ere, behar duten garrantzirik ez zaie aitortzen l…

Haur eta gazteentzako 120 film Zinetxiki zikloan »

N. S. O.

Zinetxiki zikloa iritsi da, lehenengoz, Bilbora. Batik bat, haur eta nerabeentzako filmak eta jarduerak prestatu dituzte. Denera, 120 film eskainiko ditu, familia osoarentzako saioetan eta ikastetxeetan egin dituzten emanaldietan banatuta. Hamabost herrialdetan ekoitzitako lanak dira. Joan den astean hasi zen, eta gaurtik domekara bitartean, 38 saiorekin gozatzeko aukera izango da.

Hainbat kategoriatan nazioarteko lehiaketarako deialdia eginda, 500 lanetik gora jaso dituzte: film laburrak eta film luzeak. Horietatik 51 aukeratu dituzte sei kategoriatan parte hartzeko: adinaren arabera bereizitako lau atal, Egile Berrien lanen aurkezpena eta Zine Eskolek egindako filmen aurkezpen atala. Zinema egileen belaunaldi berrien aldeko apustua egin du Zinetxikik.

Haur eta nerabeentzako zinema zikloak programa berezi bat eskaini du eskoletarako: haur hezkuntzako, lehen hezkuntzako, bigarren hezkuntzako eta batxilergoko zikloetarako. Hainbat ikastetxetako 1.500 ikaslek baino gehiagok hartuko dute parte saio horietan guztietan. Ziklo bakoitzerako proiekzio bereziak antolatu dituzte. Horrez gain, ikasleek eskoletan lan ditzaketen gida didaktikoak banatu dituzte antolatzaileek, osagarri moduan.

Jatorrizko bertsioak

Lehiaketatik kanpo, Zinetxikik hainbat film emango ditu jatorrizko bertsioan. Saio horiek Bilborocken, Arte Ederren Museoan, Docken, El Carmen aretoan, Itsasadarra Itsas Museoan eta Fnac saltokian izango dira.

Japoniar Animazioaren atzera begirakoa da nabarmendu daitekeen sailetako bat. Hayao Miyazakiren lanak ditu protagonista. Bihar eta etzi bi film proiektatuko dituzte: Nausicaä eta Arrietty. Biak ala biak El Carmen aretoan ikusi ahalko dira, 19:00etatik aurrera.

Estreinaldiak atalerako animazioko zazpi film luze eta film labur bakarra iritsi dira, lehenengoz, Bilbora. Bihar Mune, Ilargiaren zaindaria ikusi ahalko da, Arte Ederren Museoan, 18:30etik aurrera.

Haurrak, protagonista

Beste Begirada atalerako hainbat adinetako umeak protagonista dituzten filmak aurkeztu dituzte. Errealitate sozial desberdinei buruz ikuspuntu komuna duten lanak dira. Igandean, Danimarkako Antboy eta Mexikon egindako Little Boy emango dituzte.

Sail berezia antolatu dute Zinetxiki zikloan Zinearen Magia eta Iraganerako Bidaia ataletarako. Animazioko zineman aitzindari izan diren hainbat egileren lanak bildu dituzte bertan. Igandean hamabost saio eskainiko dituzte, Arte Ederren Museoan eta El Carmen aretoan. AEBetako, Brasilgo, Frantziako, Suitzako eta Erresuma Batuko lanak izango dira. Film laburrak dira guztiak. Filmik luzeenak 20 minutuko iraupena du. 11:30ean hasita emango dituzte.

Haurren Nazioarteko Lehiaketaren barruan parte hartzen duten hainbat film ere ikusteko aukera izango da datozen egunetan. Nazioarteko lehiaketako egileen, Zinema Eskoletakoen eta egile berrien lanak ere emango dituzte.

‘.eus’ domeinuaren aldeko apustua handitzen ari da »

Euskara eta euskal kulturaren komunitatearen Interneteko lehen mailako domeinua da .eus. Euskara eta euskal kultura sustatu, eta euskara eta euskal kulturaren komunitatea kohesionatzea du helburu.

Ia bi urte dira .eus domeinua erabilgarri dagoela, eta, bi urte hauetan, 6.000 enpresa, hainbat erakunde eta norbanakok bat egin dute komunitatearekin domeinu izenak erregistratuz.

Gaur egun, .eus da Hego Euskal Herrian hazkundean dagoen Interneteko domeinu bakarra; gainerako domeinu guztiak (.com, .net, .es eta abar), batez beste, %7 jaisten ari dira, baina .eus-ek %18ko hazkundea izan du 2016ko lehen bederatzi hilabeteetan.

Lurralde guztietan eta sektore guztietan ari da gertatzen .eus domeinuaren hazkundea. Bizkaian, esate baterako, domeinu-izenen %30 enpresek erregistratu dituzte, %16 erakunde publikoek eta %20 euskararen eta kulturaren arloko erakundeek. Webgune askok egin du .eus domeinuaren aldeko jauzia; eta, horri esker eta webgune horien kalitateari esker, munduko 783 domeinu berriren artean egindako azterketan 4. postua lortu du .eus-ek kalitateari eta SEOri (Search Engine Optimization) dagokionez, hau da, bilaketa motorretan hobereneratzean.

Bizkaiko erakunde publiko nagusien .eus domeinuaren aldeko apustua garbia da. Bizkaiko Foru Aldundia eta Eudel elkartea adibide batzuk dira. Domeinua erabiltzeaz gain, erakunde horiek dei egin diete Bizkaiko enpresei, erakundeei eta abarri beren webguneetan .eus domeinua erabil dezaten.

6.000 .eus horiek asko eta askotarikoak dira, izaeran eta motibazioan. Izen handiko erakundeak daude komunitatean. Bizkaiko Foru Aldundia eta Eudel elkarteaz gain, Eusko Jaurlaritza, Euskal Herriko Unibertsitatea, Bilboko Udala, Athletic Club eta BERRIA egunkaria, besteak beste. Baita, enpresa handiak ere: hala nola Petronor, Gallastegi Harategiak eta Bidaguren Gozotegia saltokiak, Gaurko Abokatuak bulegoa, edota kulturaren munduko hainbat idazle eta musikari —Bernardo Atxaga, Kepa Junkera, Gatibu, Esne Beltza eta Petti—.

Azken batean, edonork atera diezaioke probetxua .eus domeinuari.

Batz Group kooperatiba igorreztarrarentzat, batz.eus webgunea baliabide bat da, “zuztarrak bertan eutsita eta adarrak mundura zabalik, gure hizkuntza eta kultura garatzeko”.

Gero eta gehiago dira webgunea duten merkatariak. Gili-Gili, Bilboko alde zaharreko arropa dendako arduraduna da Manoli Bengoetxea, eta .eus domeinupean dauka webgunea: “giligili.eus gara, euskaldunak garelako. Bizitzako arlo guztietan euskaraz bizi garenez .eus-ekin identifikatzen gara”.

Nabarnizen dagoen Nabarniz jatetxeko Lorena Zubizarretak nortasunarekin lotzen du jatetxenabarniz.eus helbidea: “Guk .eus izatea pentsatu dugu, gure jatetxearen markari nortasuna ematen diolako”.

Profesionalen arloan, Aiert Buruaga Durangoko arkitektoaren webgunea ab-ark.eus da: “Nire marka mundu digitalean kokatzeko eta euskararekin lotzeko, .eus naiz”.

ESKAINTZA BEREZIA

.eus domeinuak bi urte beteko ditu abenduaren 3an, Euskararen Nazioarteko Egunean eta Durangoko Azokaren erdian. Urtemuga hori ospatzeko, eskaintza berezia egingo da azaroaren 25etik abenduaren 6ra, eta domeinua 9,95 euroren truke erregistratu ahal izango da.

Gainerako domeinuak bezalaxe, .eus domeinu izenak enpresa erregistratzaileen bitartez eskuratzen dira. Aukeraketa errazteko, www.domeinuak.eus Interneteko helbidean begira daiteke aukeratutako izena eskuragarri dagoen. Baita enpresa erregistratzaileen eskaintzak ere. Domeinu izena erregistratzeko informazio guztia, berriz, helbide horretan lor daiteke.

Zalantzak izanez gero, Puntu Eus fundazioan atsegin handiz argitzen dituzte, eta lagundu ere egiten dute erabiltzaileak erraztasun guztiak izan ditzan. Telefonoz (943-08 50 51), posta elektronikoz (laguntza@omeinuak. eus) eta Whatsapp bidez (665-77 09 45).

Behar dena eta dagoena harilkatzen »

Ikerbiltza programa martxan du Udalbiltzak: heziketa zentroetan egiten diren ikerketak eta herriek behar dituzten azterketak lotzeko egitasmoa da. Egitasmoa babestu dute Lea-Artibaiko udalek, eta eskualdeko ikasle eta ikerlariek programan parte hartzeko indar egingo dute datozen hilabeteetan. - Irakurri gehiago...

Atxuriko tren geltokia desagertuko da metroko 3. linea osorik ezartzean »

Aitziber Laskibar Lizarribar
Oraindik ez dago data zehatzik. Baina asmoa argia da: Bermeotik eta Durangotik Bilbora doazen trenen geralekua aldatu egingo da. Atxuriko geltokira heldu ordez, Zazpikaleetara iritsiko dira tren horiek, Txorierritik hiribur…

Bertsolari beteranoak eta gazteak aurrez aurre biharko finalaurrekoan »

N. Salazar Orbe

Aukera guztiak zabalik daude. Gauza bakarra da jakina: txapela orain arte eskuratu ez duen bertsolari batengana joango dela. Bizkaiko Bertsolari Txapelketa emozioz beterik ari da jokatzen aurten, eta, motorrak ondo berotuta, azken txanpan sartu aurreko bidean da. Lehenengo finalaurrekoa lehiatzeko eguna iritsi da. Bihar egingo dute, Markina-Xemeinen. Sei lehiakideak erabakita daude: Eneko Abasolo Abarkas, Jone Uria, Joseba Barandiaran, Nerea Ibarzabal, Oihana Bartra eta Txaber Altube.

Saio “erakargarria” iragarri du txapelketako arduradun Jone Narbaizak: iazko finalista bi daude —Uria eta Bartra—. Lehen aldiz txapelketan kantatu duen gazteetako bat ere badago —Altube—. Beste bi beteranoagoak dira —Abarkas eta Barandiaran—. Horrek guztiorrek egiten du Markinako kartela askotariko: “Esperientziadunak eta gazteak elkartuko dira, eta orekatuta dago gizon eta emakumeen presentzia”.

Gazteak, ugarituz

Gero eta bertsolari gazte gehiago ari dira parte hartzen txapelketan. Udazkeneko faseko kanporaketetara sailkatu ziren 25 bertsolarietatik seik lehenengoz kantatu dute txapelketan. “Horrek esan nahi du badatozela belaunaldi berriak”. Udaberriko fasera 56 bertsolari aurkeztu ziren. Handik 25 igaro ziren udazkeneko kanporaketetara. “Oso positiboa da horietatik sei izatea lehenengoz kantatzen dutenak”.

Bertsolari gazteak eta helduak jarriko ditu, aurrez aurre, biharko saioak. Esperientzia dute alde batzuek. Hala ere, horrek ez du emaitza bermatzen. “Badaude zenbait gazte fresko-fresko datozenak, eta ondo ari direnak. Baina esperientzia beti da lagungarria oholtza gainean, jendaurrean eta epaileen aurrean presiopean kantatzeko. Beldurrik ez duten gazte ugari ere badago, ordea”.

Finalaurrekoez gain, finalaren emaitza ere zehaztu gabe dago. “Jakin badakigu txapela buru berri batera joango dela; eta erakargarritasun handia dauka horrek. Ikusteko dago baita ere nortzuk sailkatuko diren finalera”.

Abenduaren 17ko finala baino lehen hiru finalaurreko lehiatuko dira. Hamazortzi bertsolarik kantatuko dute saio horietan, eta horietatik bost aurreko txapelketetan finalista izanak dira. Gainerako hamahiruak sailkatu egin dira: bost kanporaketetako irabazleak izan dira, eta gainerako zortziak puntuazioagatik pasatu dira.

Orain arteko saioetan maila “ona” erakutsi dute bertsolariek. “Saio guztiak ez dira ateratzen berdin. Denetarik dago, baina saio batzuk bereziki ondo atera dira”. Beraz, Bizkaiko Bertsozale Elkartea “pozik” dago txapelketak egin duen ibilbidearekin.

Gainerako saioak

Biharkoaren ostean, Basaurin izango da hurrengo saioa. “Saio orekatua eta maila altukoa” iragarri du Narbaizak: aurreko finaletik Onintza Enbeita eta Xabat Galletebeitia iritsiko dira. Gazteen ordezkari gisa, Aitor Bizkarra eta Imanol Uria ariko dira. Eta “esperientziadunak” Joseba Artza eta Beñat Ugartetxea izango dira. “Denetarik izango du; orekatua izango da”.

Larrabetzukoa izango da azken agertokia. “Azkena beti da erakargarria, hor erabakiko da-eta nortzuk sailkatuko diren finalera”. Horrez gain, “esperientzia gehiagodun bertsolariak” ariko dira kantuan. Eta Etxahun Lekuek etxean kantatuko du. “Hor erabakiko da finala. Plaza polita izango da”.

Biharko saioan garaile ateratzen den bertsolaria zuzenean pasatuko da finalera. Gainerakoek puntuazioaren arabera izango dute horretarako aukera. Sarrerak aurretik zein egunean bertan eros daitezke. Finalaurrekoak eta finalekoak Bertsosarrerak.eus webgunean daude salgai. Txarteldegiak 16:00etan zabalduko dituzte. Abian da ofiziotan zein kartzelan onena ematen saiatuko diren bertsolarien ikuskizuna.

Gorbeia inguruko ipuin, mito, istorio eta hizkerek badute gordelekua »

Aitziber Laskibar Lizarribar
Mari Anbotokoa. Jentilak. Gizotsoa. Aduak. Laminak. Sorginak. Sarri agertzen dira Bizkaiko mitologia, istorio eta ipuinetan. Deabrua, landareak, arimak eta animaliak ere bai. Kantak. Usadioak. Pasadizo aberatsak gordetzen d…

Musika, alde guztietatik »

Natalia Salazar Orbe

Musikarekiko lotura estua dauka Urduña herriak. Datuek hala uzten dute agerian: 4.000 biztanle pasatxo ditu, eta musika talde ugari; denetarikoak: Santa Zezilia musika banda, abesbatza bat, Getxa Goi txistulari taldea, Kolektibo Liborio musika taldeen elkartea, hainbat musikari profesional eta euskal musika tresnen Fita Fik eskola. Era horretako herri bat izanik, aspalditik ospatzen dute musikarien eguna. Azken urteetan, denek elkarrekin antolatu dute. Hala, hilaren 22a Santa Zezilia eguna dela eta, Urduñako Musika Astea egingo dute.

Gaur hasita, bi asteburutarako hogei kontzertutik gora prestatu dituzte, eta hainbat jarduera. Betiere, “musika bizitzara ekartzeko asmoz. Nahiz eta berez Urduña herri musikala izan, eta musikarekin harreman zuzena duen”. Hala azaldu du Eriz Perezek. Santa Zezilia bandarekin batera Musika Astea antolatzen duen Kolektibo Liborio elkarteko kidea da, eta Kultura zinegotzia.

Denetariko musika estiloez gozatzeko aukera emango du jaialdiak: rock, blues, pop, jazz, runba… Aurten berritasunak ere izango dira, gainera: “Bolero talde bi izango dira, rockabilly taldeak, flamenkoa, kubatar musika eta funkya. Denetarik dago entzuteko. Edozein gunetan edozein kontzertu” aurkituko dute bertakoek eta bisitariek.

V. Poteo Musikalaren barruan egingo dira kontzertu gehienak, Kolektibo Liborio elkarteak antolatuta. Bospasei tabernatan egiten dira saioak, aldi berean. Eguerdi edo gau aldera antolatzen dituzte kontzertuok. “Urduñan, jende ugari elkartzen duten lekuak dira tabernak”. Hala, musika eramaten dute gune horietara. Virginia Alonso eta The Pushermen ariko dira gaur, lehen saioan.

Bihar eta etzi egingo dituzte aldi berean talde gehien elkartuko duten bi saioak. Arrakasta handiko ekitaldia izan ohi da. “Jendeak eskuko egitaraua hartzen du, eta tabernaz taberna joaten da leku bakoitzean zer dagoen entzutera”.

Jarduera berezia

Urteekin kontzertu saioak antolatzen eta egokitzen asmatu dute. “Lehen aldian hamar kontzertu egin genituen aldi berean. Baina jendea kexatu egin zen, ezin zituztelako talde guztiak ikusi. Beraz, moldatu egin ditugu”. Jarduera “bitxia” da. Eta, aurten, taberna gehiagok bat egin dute proiektuarekin.

Herriko musikari askoren lanak bertatik bertara ezagutzeko aukera ematen du jaialdiak. Beti izaten dute lekua Musika Astean. The Pushermen, Versen, Peri & Gros, Siroka… Harrobi handia eta kalitatezkoa eta profesional mordoa dituzte Urduñan.

Agertokiei dagokienez, hainbat izango dira: Romulo, Mugalde eta Amnesia Inn tabernak, besteak beste. Foru plaza, gaztetxea, Alondegia, Andra Mari eliza eta herriko kaleak ere astinduko dituzte batzuen eta besteen soinuek.

Izan ere, musika modernoaz gain, klasikoak eta herrikoiak ere izango dute lekua. Urduñako musika taldeen kontzertuak emango die hasiera ospakizunei, gaur. Hainbat taldek parte hartuko dute: Fita Fik musika eskolak, Biguri eta Barcina jota abeslariek, herri kantak abesten dituen taldeak, Fernando Egiluzek, Urduñako Oilarrak taldeak, Getxa Goi Txistu taldeak, Urduñako Abesbatza elkarteak eta Santa Zezilia bandak.

Bestelako jarduera bitxi bat ere prestatu du bandak berak: Kontzertua familian. Datorren asteko ostiralean egingo dute, Alondegian. Zinemako, telebistako eta telesailetako soinu banden abestien kontzertua emango dute. Jarduera horrek ez daukala berritasunik aitortu du bandak berak. Baina, musikaz gain, bideo zatiak eta mozorroak ere baliatuko dituzte.

Familia osoarentzako ikuskizuna izango da. Hala iragarria zuen Jesus Urrutia Graciak. Santa Zezilia bandaren zuzendari gonbidatua da bera: “Denek gozatuko dute, adina gorabehera. Oso melodia ezagunak ditugu esku artean: Game of Thrones telesailarena eta The Magnificent Seven filmarena, kasurako. Haurrentzako filmen doinuak ere izango dira. Musikaren festa handi bat izan dadin saiatuko gara”.

Berritasunak eta emozioak ematen diote xarma musikari, haren esanetan. “Jendeak gustuko izaten du musika klasikoa, eta ez da galdu behar; beti egongo da hor. Esperimentatzeko aprobetxatu behar dugu, ordea, eta gauza berriak egin behar ditugu”.

Urteetan musika talde edo eragile bakoitzak bere kabuz antolatzen zituen musika emanaldiak bateratu egin ditu Musika Asteak. Santa Zezilia bandak lan handia egin du hainbat urtetan. Hala sinetsita dago Eriz Perez. “Oso garrantzitsua da musika banda bat izatea Urduña bezalako herri txiki batean. Tradizio handiko elkartea da”. Taldeak egitarau propioa du jaialdiaren barruan.

Musika Astearen sustraiek heldu diote Urduñari; urteekin finkatu egin da jaialdia. “Jendea zain izaten da, euren agendetan sartua izaten dute”. Etorkizunean ere bide horretatik jarraitzeko modua izan nahiko lukete. Eta berritasunak ere ez dituzte baztertu. “Ondo legoke pauso bat aurrera ematea”. Hori lortzeko bidea egiten lagunduko dieten bidelagunen bila jarraitzen dute. “Bisitariei bertaratzeko deia egin nahi diegu. Asteburu bakar batean hogei kontzertutik gora ikusi ahal izango dituzte gurea bezalako herri txiki batean”.